Read Jinghpaw Common Language Bible 2009 GA SHAGAWP 25 Bible Online

GA SHAGAWP 25 - Jinghpaw Common Language Bible 2009 bible

GA SHAGAWP 25

¹Da ndai gaw, Yuda hkawhkam Hezekia a hkaw kata na masha ni ka lajang da ai, Shawlumon a ga shagawp kaga ni rai nga ai.

²Shi makoi magap da ai majaw, anhte Karai Kasang hpe shakawn shagrau ga ai; shanhte tsun shaleng dan ai majaw, hkawhkam ni hpe anhte shagrau sha-a ga ai.

³Sumsing lamu gaw tsaw nga nna, nammukdara hka gaw sung nga ai zawn, hkawhkam wa a myit mang ai lam hte shi a myit sumru ai lam hpe anhte n dang dep hkawn nga ai rai nna, dai hpe nang galoi mung, chye lu ai n rai.

⁴Gumhpraw hta na nhprang hkyi hpe shaw kau ngut ai hpang, janghkam wa gaw tsawm htap ai arai hpe galaw shapraw lu nga ai.

⁵Hkawhkam wa hte shi a mung up rap daw magam dap kaw nna n hkru n shawp ai hpaji jaw kasa ni hpe shapraw kau jang, shi a up hkang ai lam gaw teng man ai tara re nga nna, kajai gumhkawng wa na ra ai.

⁶Hkawhkam wa a man e, nang tsap nga ai shaloi, shi myit jung wa hkra, ahkyak ai wa zawn hpyi hkum hpun shakut et.

⁷Na a dung shara hpe grau ahkyak ai marai langai ngai a lata de ap ya na matu, shadut hkrum ai hta, grau tsaw ai madang de lung wa na matu, tsun hkrum ai gaw grau nna kaja nga ai.

⁸Lama ma byin ai hpe nang mu hkrup yang tara rung de sa tang na hkum tin. Nang shut ai lam hpe hpang e kaga masha wa sakse hkam yang, nang kaning di na ngu n ta?

⁹Nang hte na a htingbu wa a lapran e, hpai shai nga ai rai yang, dai hpe nan a lapran e, shawng htingrai nna, ip da mai ai lam hpa hpe mung, hkum shadan shadawng nga myit.

¹⁰Shing n rai nang n ip da lu ai lam hpe masha shagu chye la na ra ai hte, nang gaw kaya kahpa hpe galoi mung malap kau na ra ai n rai.

¹¹Myit mang kaja hpe tup hkrak chye shaleng tsun lu ai gaw, gumhpraw hta ja ginshi sup da ai kasi hte bung nga ai.

¹²Madat mara hkam la mayu ai wa hpe, mahkrum madup nga ai wa hku nna shadum jahprang ga tsun dan ai gaw, ja lachyawp hte mung, ja jet hte galaw da ai ja lung seng rai hta grau nna manu dan nga ai.

¹³Kang kahtet ai mam dan ten hta katsi ai ntsin gaw n-gun shabran ya ai zawn, kam ging ai kasa gaw shi hpe shangun dat ai wa a matu, n-gun awai ya nga ai.

¹⁴Jaw na ngu nna, ga sadi hkam la nhtawm, galoi mung n jaw ya ai ni gaw marang n jahtu ai sumwi hte nbung ni zawn rai ma ai.

¹⁵Myit galu ai hte shadut ga chye tsun ai gaw ngang kang ai hpyen dap hpe sharun jahten lu ai hte mungdu ni hpe pyi kam hpa mat shangun lu nga ai.

¹⁶Nang ra ai hta jan nna, lagat ntsin hpe galoi mung hkum lu et; lu lai ai gaw nang hpe madawn shangun chye nga ai.

¹⁷Na a htingbu nta de, jahkring hkring sha, hkum sa dam et; shi gaw nang hpe hkalum jin ai hte n dawng n yawt chye nga ai.

¹⁸N teng n man ai hku mara shagun ai lam gaw si shangun lu ai nhtu, adup ai hkawn hte masen ai pala ni zawn rai nga ai.

¹⁹Kyin dut hkrum ai ten hta sadi n dung ai wa hpe shamyet shanat ai gaw, kanga taw nga ai wa hte maya ai hte hten taw nga ai lagaw hte lam hkawm ai zawn rai nga ai.

²⁰Myit si myit htum hkrum nga ai wa hpe mahkawn mangoi ai gaw kashung ai shani e palawng raw ai hte nma hkang hta jum chya ai zawn rai nga ai.

²¹Na a gumlau hpyen wa kawsi hkrum ai shaloi, shi hpe lusha jaw u; shi hpang gara nga ai rai yang, lu sha ntsin jaw u.

²²Nang gaw shi hpe kaya kahpa hte myi man hkyeng shangun na ra ai hte MADU gaw nang hpe shabrai jaw na ra ai.

²³Dingdung nbung gaw marang hpe htu shangun ai zawn, kadum kahte ai gaw teng teng myit kahtet ai hpe shabyin ya nga ai.

²⁴Aput angun nga ai nta madu jan hte nta e rau nga na hta, nta numgaw htap hta wa dung nga na gaw grau nna mai kaja nga ai.

²⁵Sumtsan kaw na na la sai kabu hpa shiga lu la ai gaw, hkun hkraw ai hte hpang gara ai shaloi ntsin katsi gawm mi lu ai zawn rai nga ai.

²⁶Mai kaja ai masha n hkru ai wa a myit ra hkan ya ai gaw, n san seng ai hka hpawk hte gung rawng ai hka htung hpe myit dum shangun nga ai.

²⁷Lagat ntsin ladu lai lu ai gaw na a matu n kaja ai zawn arawng nau mala ai gaw na a matu n kaja nga ai.

²⁸Na a sindawng hpe nang n hkang lu yang nang gaw hpyen ni hpe n shingdang da lu ai bunghku n kum da ai mare zawn rai nga ndai.