Read Jinghpaw Common Language Bible 2009 GA SHAGAWP 30 Bible Online

GA SHAGAWP 30 - Jinghpaw Common Language Bible 2009 bible

GA SHAGAWP 30

¹Da ndai gaw Yake a kasha Agura a sung ai ga matsun ni rai nga ai; “Karai Kasang ngai hte rau n rai nga ai, Karai Kasang ngai hte rau n rai nga ai majaw, ngai garen gari hkrum nga nngai.

²Ngai gaw shinggyim masha hta dusat hte mahtang grau bung nga nngai; masha hta nga ang ai machye machyang ngai hta n nga nga ai.

³Ngai gaw kaning re ai hpaji byeng-ya hpe galoi mung n sharin la yu ai hte; Karai Kasang hte seng ai lam hpa hpe mung, ngai n chye nga nngai.

⁴Sumsing lamu hte seng ai machye machyang hpaji hpe, kadai wa hkrak dang chye lu nga a ta? Shi a lata hta nbung hpe rim latup da yu sai gaw, kadai wa nga nga yu sata? Sumpan hkyep hte hka hpe makai hkayawp yu sai gaw, kadai wa nga nga yu sata? Ginding aga a jarit ni hpe, kadai wa shangang shagrin da yu sata? Shi gaw kadai wa rai nga a ni? Shi a kasha gaw kadai wa rai nga a ni? Nang chye ai rai yang, tsun u.

⁵“Karai Kasang gaw shi tawn da ai ga shaka sha-u hta sadi dung nga ai. Shi gaw shi a makawp maga ai hta shingbyi shara hpe hkan tam ai masha ni yawng a matu ninggang zawn rai nga ai.

⁶Shi galoi mung n tsun yu ai lam lama mi hpe, shi tsun nu ai ngu nna hkrak tsun ai rai yang chyawm gaw nang masu ai wa rai nga ai hpe, shi madun nna nang hpe daru sharin na ra ai,”

⁷Karai Kasang e, ngai garai n si yang, ngai nang kaw lam lahkawng hpyi nngai;

⁸Masu magaw ga tsun ai kaw na, ngai hpe shatsan shagang kau ya e; sut su ai hte matsan ai mung, ngai hta n rai u ga. Dai majaw ngai hta ra kadawn nga ai shat lusha hpe sha, ngai hpe jaw ya e.

⁹Dai hta jan nna ngai grau lu wa ai rai yang, ngai nang hpe n ra dum nngai ngu nna, tsun kau hkrup na ra ai. Rai ti mung, ngai matsan mayan hkrum nga yang chyawm gaw, ngai lagu nna, nye a Karai Kasang hpe kaya kahpa awu asin di kau na ring nngai.

¹⁰Madu man e, shangun ma wa hpe galoi mung mara tam ai ga hkum shatan et. Shing rai yang, dagam dala ai gaw nang hkrum nna, de a nni nkri hpe hkam sha ra na rin dai.

¹¹Kawa ni hpe dagam dala ga tsun nna, kanu ni hpe hkungga shareng ai lam n madun ai masha ni nga nga ma ai.

¹²Shanhte gaw dik hkra matsat shabat re nga ai shaloi, san seng nga ga ai nga nna, myit la ai masha ni mung nga nga ma ai.

¹³Shanhte gaw gade wa mai kaja nga ma hka! shanhte gaw grai kaja nga ma ai nga nna myit la ai masha ni mung nga nga ma ai.

¹⁴Matsan mayan masha ni hte n lu n lawm, ra kadawn nga ai ni hpe zai hku nna dip da ai ni hte jahten sharun ai masha ni nga nga ma ai; dai zawn galaw ai gaw shanhte a kan bau magam bungli rai nga ai.

¹⁵Wawtbyin hta shayi sha lahkawng lu ai; shan lahkawng yan a mying shingteng gaw, “Ngai hpe jaw rit,” ngu ai mying ni rai nga malu ai. Myit n dik hkraw ai lam mali nga nga ai:

¹⁶Katsan ga, maudung num, Marang n htu ai hkun hkraw ai lamu ga, n sat shangap lu ai sharaw wan ni rai nga ai.

¹⁷Kawa hpe asaw ale nga nna, asak kaba sai kanu a hkang da ai ga hpe asawng asang di kau ai wa kadai hpe rai ti mung, zai ai u hka ni gaw shi a myi hpe achye malawk kau ya nna langda ni mung, shi a mang hpe sha kau ya na ging nga ai.

¹⁸Nye a matu n dang chye lu ai mauhpa lam mali mung nga nga ai.

¹⁹Lamu ntsa e pyen ai galang, lunghkrung ntsa e hkawm nga ai lapu, panglai ntsa e shi a lam hta hkawm ai sanghpaw li, tsaw ra hkat ai shinggyim num hte shinggyim la

²⁰Ndai gaw sadi n dung ai dinghku num a sat lawat ni rai nga ai; shi gaw la shaw ai amu hpe shut nna, hka shin ngut ai hpang, “Ngai hpa mung n shut nngai,” nga nna shi tsun nga ai.

²¹Lamu ga shi nan n hkam sharang lu ai lam mali nga nga ai: dai ni gaw,

²²Hkawhkam tai wa ai mayam, hkru hkru kat kat sha lu ai angawk ai wa,

²³Tsaw ra myit n hkam la ai hkungran num, madu num a shara hta shang madu la ai shangun ma numsha, ni rai nga ai.

²⁴Ga ningtsa e, kaji ti mung, hpaji grai rawng ai dusat amyu mali nga nga ai;

²⁵Kagyin: shanhte gaw n-gun n ja ti mung, ginhtawng ta shanhte a lusha a matu shahpa mahkawng da nga ma ai.

²⁶Lungpu gwi tingsung: dai ni gaw n-gun grai wa n ja ti mung, lungpu lapran hkan shanhte a nga shara ni hpe gap da lu nga ma ai.

²⁷Dinggam-yaw: shanhte hta hkawhkam tai ai wa n nga ti mung, shanhte mahkra rau pyen kanawng hkawm lu ma ai.

²⁸Dingsing: na a lata hte jum da lu tim, dai gaw hkawhkam htingnu hkan shanu nga ai hpe mu lu ai.

²⁹Shanhte hkawm sa wa yang, myit hta chyung shangun hkra yu azi mai ai amyu mali mung nga nga ai.

³⁰Dai ni gaw, hkanghkyi: dusat yawng hta n-gun ja htum rai nna kadai hpe mung n hkrit nga ai,

³¹bainam, akam asham rai hkawm ai nta u la hte, mung masha ni a man e tsap nga ai hkawhkam ni rai ma ai.

³²Myit tsaw myit dap rawng nna angawk ai hte n hkru n shawp ai amu hpe nang galaw maw mawn ai rai yang, dai ni hpe jahkring kau nna myit yu u!

³³Nang ngachyu hpe garu ai rai yang, htawbat hpe lu la nga ndai. Marai Langai mi a ladi hpe nang htwi yang, dai kaw na sai pru nga ai. Nang gaw sindawng kahtet ai hpe shalut kabrawng ya ai rai yang, ru yak tsin-yam tsindam hkrum nga ndai.