Read Jinghpaw Common Language Bible 2009 GA SHAGAWP 31 Bible Online

GA SHAGAWP 31 - Jinghpaw Common Language Bible 2009 bible

GA SHAGAWP 31

¹Da ndai gaw hkawhkam Lemuela a kanu shi hpe tsun shadum ai sung htum ai matsun ga ni rai nga ai.

²Shi gaw, “Nang gaw nye a tsaw ra ai, nye a akyu hpyi ga hte maren, lu la ai kasha rai nga ndai. Ngai nang hpe hpa hte seng ai lam tsun na rai ta?

³Na a shinggyim n-gun yawng hpe shinggyim maka ngang gayut ai amu hta n-gun maku hkum shadaw kau et. Nang jai lang ai na a gumhpraw yawng hpe numsha ni hta hkum jai shama kau nga et. Shanhte gaw hkawhkam ni hpe alau jahten kau yu masai.

⁴Lemuela e, madat u, hkawhkam ni gaw sabyi ntsin lu na, tsa chyaru marin na, lam ni hpe koi gam ra nga ai.

⁵Shanhte lu nga ai shaloi, tara ni hpe malap kau nna, mung masha ni hta ra kadawn nga ai ahkaw ahkang hpe hpa zawn n nawn chye nga ma ai.

⁶Chyaru gaw si wa magang sai masha ni a matu hte myit daw myit htum nga ai ni a matu rai nga ai.

⁷Shanhte lu nna, shanhte a yak hkak matsan chyaren re ai hte myit n pyaw ai lam ni hpe malap kau nga mu ga.

⁸“Tinang a lam n lu shaga ai ni a matu tsun ya u; karum la na masha n lu ai ni yawng a ahkaw ahkang hpe makawp maga ya u.

⁹Shanhte a matu ga shaga ya nna, ding hpring ai tara agyi tai ya u. Matsan mayan ni hte ra kadawn nga ai ni a ahkaw ahkang hpe makawp maga ya u.

¹⁰Atsam marai rawng ai dinghku num hpe mu lu na, gade wa yak nga a hka! Shi gaw lung seng ni hta grau hpu nga ai!

¹¹Shi a madu wa, shi hta kam hpa nga ai hte shi gaw galoi mung matsan mayan hkrum na n rai.

¹²Shi asak hkrung nga dingsa, shi madu wa a matu, kaja ai amu galaw let, akyu shayawm kau ya ai amu, galoi mung n galaw nga ai.

¹³Shi gaw sagu mun ri ri ai hte lachyit nba galaw let n rau n htau rai nga ai.

¹⁴Shi gaw hpaga sanghpaw li ni galaw ai zawn, tsan ai shara kaw nna, dum nta de lusha la wa nga ai.

¹⁵Jahpawt manap nhtoi garai n htoi yang, shi rawt nna, shi a dinghku masha ni a matu shahpa lusha ni hpe shi lajang shajin ya nhtawm shi a shangun ma numsha ni galaw na amu hpe tsun matsun nga ai.

¹⁶Shi gaw lamu ga hpe yaw jahtuk yu nna, dai hpe mari la nga ai; shi tam la lu ai gumhpraw hte sabyi sun hkai nga ai.

¹⁷Shi gaw bungli galaw shaja ai num rai nna, n-gun atsam hte marai rawng nga ai.

¹⁸Shi galaw shapraw ai arai yawng a manu hpe shi chye nga ai hte shana yup tung du hkra amu galaw nga ai.

¹⁹Shi gaw gawng ri ri nna, shi a sumpan a matu ri da da nga ai.

²⁰Shi gaw matsan mayan ni hte ra kadawn ai ni hpe nhpaw n-ya jaw lu jaw sha kam nga ai.

²¹Hkyen hkrat ai shaloi, shi myit n ru nga ai. Hpa majaw nga yang, shi a dinghku masha ni lum palawng yawng lu da sai majaw rai nga ai.

²²Shi gaw yup ra panep nep da ai hte hkyeng sawm nsam pru nna tsawm ai lachyit sumpan hte hpun sumli da nga ai.

²³Shi a madu wa gaw mare hpe woi awn ai du salang, langai mi rai nna, mying dan hkung nga ai.

²⁴Shi gaw sumpan hte shingkyit ni hpe da nna, hpaga ga ai ni hpe dut ya nga ai.

²⁵Shi gaw n-gun lagaw hte sari sadang hpring nga ai rai nna, du na ra ai aten hpe, shi n tsang nga ai.

²⁶Shi gaw si mani ai hpaji ga hte tsun shaga nga ai.

²⁷Shi gaw tut e n rau n htau bungli law nga nna, shi a dinghku kata na ra kadawn ai lam ni hpe mada mara nga ai.

²⁸Shi a kasha ni shi hpe shareng hkungga jaw nna, shi a madu wa mung shi hpe shakawn nga ai.

²⁹Shi gaw, “Num law law ni gaw kaja ai nta madu jan ni hkrai rai nga ma ti mung, dai ni yawng hta nang gaw kaja htum rai nga ndai,” nga nna tsun wu ai.

³⁰Hkum shingyan tsawm ai gaw hkalem chye nga nna, ahpraw nsam gaw hkoi mat chye nga ti mung, dai MADU hpe hkungga ai num chyawm gaw shakawn ging nga ai.

³¹Shi galaw ai amu yawng mayawng a manu jahpu hpe matsing ya u; masha shagu shi hpe hkungga lara na mai kaja nga ai.