Read Jinghpaw Common Language Bible 2009 GA SHAGAWP 4 Bible Online

GA SHAGAWP 4 - Jinghpaw Common Language Bible 2009 bible

GA SHAGAWP 4

¹Sha ni e, nwa nanhte hpe sharin shaga ai ga ni hpe madat mu, dai ni hta myit maju jung mu; shaloi, chye na hkawn hkrang ai nyan nanhte lu na marin dai.

²Nanhte hpe ngai sharin achyin ya ai lam gaw mai kaja nga ai majaw, dai lam yawng hte hpe adum nga mu.

³Nye nu yan wa a kasha shingtai, ngai ma kaji naw rai nga yang, nye wa ngai hpe sharin achyin yu ni ai.

⁴Shi gaw ngai hpe, “Ngai tsun sharin ai ga hpe dum nga u, dai lam hpe galoi mung hkum malap kau nga et, nang hpe ngai tsun ai ga hte maren galaw u, shing rai yang, nang asak hkrung nga lu na ra ai.

⁵Hpaji byeng-ya hte myit kraw hpaji hpe tam la u! Ngai tsun shaga ai ga hpe mung hkum malap kau et, dai lam hpe hkum hprai kau nga et.

⁶Hpaji byeng-ya hte myit kraw hpaji hpe tam la u! Ngai tsun shaga ai ga hpe mung hkum malap kau da et; dai gaw nang hpe makawp maga na ra ai, dai hpe tsaw ra nga u, dai gaw nang hpe bau sin na ra ai.

⁷Hpaji byeng-ya lu la ai gaw nang lu galaw ai amu ni yawng hta grau nna ahkyak madung rai nga ai; nang hpa baw mi tam la lu ai rai tim, myit kraw hpaji hpe n lu la n mai shakut la u.

⁸Hpaji byeng-ya hpe tsaw ra nga u; nang hpe shi galu kaba shangun na ra ai; shi hpe manoi manat nga u, nang hpe shi shagrau shatsaw na ra ai.

⁹Shi gaw na a janmau hte seng ai hpung shingkang tai ya na ra ai,” nga nna tsun ai.

¹⁰Sha e, nye a ga hpe madat mara u; nang hpe ngai tsun matsun ai ga ni hpe ja ja madat u, shing rai jang, nang asak galu na rin dai.

¹¹Ngai gaw nang hpe hpaji byeng-ya hte teng man ai asak hkrun lam hpe sharin ya ni ai.

¹²Hpaji rawng ai hku nang hkawm sa wa ai rai yang, na a hkrun lam gaw asan apan rai mat na ra ai, nang gat wa yang pyi, ahtu kataw na ra ai n rai.

¹³Nang sharin hkam la lu sai lam hpe tut nawng e adum nga u; na a hpaji gaw na a asak rai nga ai majaw, dai hpe atsawm sha sin da u.

¹⁴N hkru n shawp ai masha ni hkawm sa ai shara de hkum sa et; tara n lang ai ni a kasi hpe hkum hkan nang nga et.

¹⁵Dai zawn re ai amu hpe hkum hkan galaw et! N hkru ai amu hpe koi kau u! Dai lam hpe ningdang kau nna nang hkawm nga ai lam dingyang hkawm sa nga u.

¹⁶N hkru n shawp ai masha ni gaw shut hpyit ai amu lama mi hpe n lu galaw yang, shanhte n lu yup nga ma ai; marai langai ngai hpe n machyi shangun lu yang, shanhte yup n pyaw nga ma ai.

¹⁷N hkru n shawp ai hte kashun kashe du daw sai hkaw amu gaw, shanhte a lusha shahpa zawn rai nga malu ai.

¹⁸Ding hpring ai ni a hkrun lam gaw jan pru wa ai zawn rai nga ai; dai gaw shani nhtoi hkung wa ai aten du hkra, grau grau nna, htoi leng wa nga ai.

¹⁹Tara n lang ai ni a lam chyawm gaw shana zawn sin mak nga ai. Shanhte gaw kashawt ti mung, shanhte kaning rai kataw ai hpe n chye nga ma ai.

²⁰Sha e, ngai tsun ai ga hpe myit maju jung u; nye a matsun maroi ga ni hpe madat mara la u.

²¹Dai hpe nang kaw nna galoi mung hkum jahka et; dai ni hpe na a myit masin kraw lawang hta kyem da nna matsing da u.

²²Shanhte gaw dai lam ni hpe chye na hkawn hkrang ai masha kadai hpe mung asak hkrung ai lam hte hkam kaja ai lam jaw ya na ra ai.

²³Na a myit mang ai lam gaw na a asak hpe hkrang shapraw ya nga ai majaw, nang myit mang ai lam gara hku rai nga ai hpe sadi sahka nga u.

²⁴N teng n man ai ga hpe galoi rai tim hkum tsun nga et; masu magaw ai ga hte kajam kalam shabyin ai ga ni hte hpa mung hkum galaw nga et.

²⁵Ding man kam hpa ai myit hte shawng de ading sha mada nga u; na a myi man sum let hkum gum dagup nga et.

²⁶Nang galaw ai amu hpe sadi sahka hte hpajang lajang u; shing rai, nang galaw ai amu hpa hta rai tim, jaw ai hku byin pru wa na ra ai.

²⁷N hkru ai hpe koi kau nna, lam dingyang hkawm sa nga u; ding man ai lam kaw nna lahkam mi pyi, hkum yit mat et.