Read Jinghpaw Common Language Bible 2009 GA SHAGAWP 8 Bible Online

GA SHAGAWP 8 - Jinghpaw Common Language Bible 2009 bible

GA SHAGAWP 8

¹Madat mu! Hpaji byeng-ya gaw shaga nga ai. Myit sawn dinglik yu ai lam gaw shi hpe na lu hkra, galaw nga ai.

²Nmaw lam makau na kawng pungding ntsa hte lam numshe hta mung, shi tsap nga ai.

³Mare de shang wa na chyinghka lam hkan e mung chyinghka makau hkan e mung, shi shaga nga ai:

⁴Shi gaw, “Shinggyim masha ni e ngai nanhte hpe hpyi lajin nga nngai; ginding aga ntsa e shanu nga ai masha hkum shagu hte hpe ngai shaga nga nngai.

⁵Nanhte myit n kung nga myit ni? Myit kunghpan wa na matu sharin la mu. Nanhte angawk angak rai nga myit ni? Chye myit chye mang lu hkra, sharin la mu.

⁶Nye a kaja htum ai ga ni hpe madat mara nga mu; nanhte hpe ngai tsun dan ai lam yawng mayawng hte gaw ding man nga ai.

⁷Ngai tsun ai ga gaw teng man nga ai rai nna, masu magaw ga ni hpe ngai n dawng nga nngai.

⁸Ngai tsun ai lam yawng mayawng hte mung teng nga ai rai nna, n shut hpyit ai hte numshe shang ai lam hpa mung n nga nga ai.

⁹Myit kraw hpaji hte hpring nga ai masha wa hta dai lam yawng dan leng nga ai; dam lada ai machye machyang hte hpring nga ai masha wa hta dai lam yawng, asan apan sha rai nga ai.

¹⁰Gumhpraw a malai, nye a sharin shaga ai ga hpe lata la u; ja jet hta grau nna hpu reng ai machye machyang hpaji hpe lata la u.

¹¹Shi gaw, “Ngai gaw hpaji byeng-ya rai nga nngai, ngai gaw ja lung seng ni hta grau kaja nga ai rai nna, nang ra ai arung arai hpa mung ngai hte shadawn lu na n rai.

¹²Ngai gaw hpaji byeng-ya rai nga nngai; myit kraw hpaji hpe mung ngai lu nga nngai; machye machyang hpaji hte teng man re ai tara dara lam hpe mung ngai lu nga nngai.

¹³Dai MADU hpe shagrau sha-a ai lam gaw n hkru ai lam hpe n dawng ai lam rai nga ai; ngai gaw gumrawng gumtawng ai hte myit tsaw myit dap ai n hkru ai lam hte n teng n man ai ga ni hpe n dawng nngai.

¹⁴Ngai gaw hpaji daw nna, dai ni hpe galaw shapraw nga nngai; ngai hta chye na hkawn hkrang ai myit rawng nna, n-gun atsam hte hpring nga nngai.

¹⁵Hkawhkam ni mung up hkang ai hta ngai karum nngai; mai kaja ai tara ni hpe galaw shapraw na matu, mung du ni hpe mung ngai shingtau nga nngai.

¹⁶Mungkan ga na mung du shagu, mung masa salang ni hte du magam masha ni yawng hte gaw, nye a karum madi shadaw ya ai atsam hte woi awn up hkang lu nga ma ai.

¹⁷Ngai hpe tsaw ra ai ni hpe ngai tsaw ra nga nngai; ngai hpe tam ai ni kadai rai ti mung, ngai hpe mu tam lu nga ai.

¹⁸Sut su ai hte shagrau sha-a na lam, ngamu ngamai lam hte awng dang ai lam jaw ya na matu mung, ngai lu nga nngai.

¹⁹Nanhte ngai kaw na hkam la lu ai hpaji gaw jet htum ai ja hte kaja htum ai gumhpraw hta grau kaja nga ai.

²⁰Ngai gaw ding hpring ai lam hta hkawm sa nna, teng man ai tara dara lam hta ngai hkan nga nngai.

²¹Ngai hpe tsaw ra ai ni hpe sut gan a jaw ya nna, shanhte a dum nta ni hta ja gumhpraw, sut gan ni hte jahpring ya nga nngai.

²²Dai MADU gaw ngai hpe nga yawng danghta yawng a shawng e hpan da ni ai hte, moi chyaloi nhkoi na, shi galaw ai amu ni a shawng nnan na rai nga ai.

²³Lamu ga garai n nga ai, chyi n ma pri n pra ngu ai, shawng ningpawt kaw nna ngai gaw hpan da ai hkrum nga ni ai.

²⁴Sung htum ai nammukdara hte hka hpawk ni garai n nga ai a shawng e; ngai shangai ni ai.

²⁵Bum ni hte kawng ni a shawng e, ngai pra ni ai;

²⁶Karai Kasang gaw ginding aga hte, de a dam lada ai pa ni hte, dinghta ga na ga nhpu latup mi pyi garai n nga ai aten kaw nna, ngai hpe hpan da ni ai.

²⁷Shi gaw sumsing lamu hpe hpajang da ai hte nammukdara hpe lai di nna, lamu wunkau jarit hpe gawan da ai shaloi, dai hta ngai lawm nga ni ai.

²⁸Sumsing lamu e, sumwi ni hpe shamawng ai hte sung ai panglai hka hpawk ni hpe hpaw dat nhtawm,

²⁹panglai hka ni hpe shi hkang da ai jarit hta lai nna, n rawt hta wa na matu, tsun da nu ai hte mungkan ga a npawt nhpang ni hpe shi gaw da ai shaloi, dai ni hta ngai nga nga ni ai.

³⁰Ngai gaw shi a makau e nta hpe gaw gap ai ninghkrin wa zawn nga nga nngai; ngai gaw shi a shani shagu na kabu gara ai a npawt tai nga nna, shi a man e, tut nawng kabu gara nga nngai.

³¹Ginding aga hta ngai kabu gara nga nna, masha amyu baw ni hte rau ngai sharawng awng nga nngai;

³²Ya chyawm gaw, shabrang ni e, nye a ga hpe madat mu; ngai tsun ai ga hte maren, hkan galaw ai rai yang, nanhte a lu na marin dai.

³³Nang sharin hkam la lu sai hpe madat mara u; hpaji rawng nga u; dai hpe hkum hprai kau nga et,

³⁴Nye a ga madat mara ai hte nye a chyinghka e shani shagu nga nga nna; nye a nta nhku de shang wa ai chyinghka lam hta ala nga ai wa gaw a nga ai.

³⁵Ngai hpe mu tam ai masha wa gaw asak hpe mu la nna, dai MADU mung shi hta awng sharawng nga na ra ai.

³⁶Ngai hpe n mu tam ai masha wa gaw machyi hkrum nga nna; ngai hpe n dawng n yawt ai ni kadai mung si hkrung si htan hpe tsaw ra nga ai,” nga nna tsun nga ai.