Read Jinghpaw Common Language Bible 2009 GA SHAGAWP 9 Bible Online

GA SHAGAWP 9 - Jinghpaw Common Language Bible 2009 bible

GA SHAGAWP 9

¹Hpaji byeng-ya gaw shi a nta hpe shadaw kaba sanit bang nna, jung da nu ai.

²Shi gaw yam nga ni hpe sat nna, sabyi ntsin hta mu hawm ai ntsin kayau nhtawm, lusha poi sha ku hpe hkyen lajang tawn nu ai.

³Shi gaw shi a mayam num ni hpe shangun dat let, mare a tsaw htum ai shara kaw nna,

⁴“Hpaji n chye ai masha ni e, shang wa marit! Angawk Angak re ai wa e, sa rit!

⁵Nye a lusha hpe sha mu, ngai kayau ai sabyi ntsin hpe lu mu.

⁶Myit n su ai masha u hpung ni hpe kau da nna, asak hkrung nga mu; hpaji machye machyang lam hta hkan hkawm nga mu,” nga nna jahtau tsun wu ai.

⁷Gumrawng gumtawng re ai masha wa hpe nang shading sharai ai rai yang, jahpoi asawng ai sha bai hkrum sha na rin dai; n hkru n kaja ai masha wa hpe nang daru sharin ai rai yang, machyi ai nang hkrum sha na rin dai.

⁸Gumrawng gumtawng ai masha wa hpe galoi mung hkum shading sharai nga et; dai lam a majaw, shi nang hpe n ju n dawng wa na ra ai. Rai ti mung, hpaji rawng ai masha wa hpe nang shading sharai ai rai yang, shi nang hpe hkungga lara rai na ra ai.

⁹Hpaji rawng ai masha wa hpe nang tsun dan ai hpa lam rai tim, shi hpe grau hpaji chye shangun nga ai; ding hpring ai masha langai mi hpe nang tsun shaga ai hpa rai tim, shi a machye machyang hpe hpung jat shangun nga ai.

¹⁰Dai MADU hpe hkrit hkungga ai myit gaw hpaji byeng-ya a npawt rai nga ai; Chyoi Pra Ai Wa hpe chye chyap ai rai yang, chye na hkawn hkrang ai hpaji nang lu la nga ai.

¹¹Hpaji byeng-ya gaw nang hpe asak galu shangun na ra ai.

¹²Nang hpaji byeng-ya hkam la lu ai rai yang, nang nan akyu hkam sha lu na ndai. Dai hpe nang ndang kau ai rai yang chyawm gaw nang nan nni nkri hkam sha na rin dai.

¹³Angawk ai lam gaw, sheng mareng re ai, nyan tang ai hte myi man htat ai num hte bung nga ai.

¹⁴Dai num gaw nta ndaw e dung nna mare a tsaw htum ai shara ntsa hta e,

¹⁵dung nga ai hte, shanhte a bungli yi ngam de, lai sa wa ai masha ni hpe,

¹⁶“Nyan tang ai masha ni e, shang wa marit,” nga nna saw shaga nga ai.

¹⁷Bai nna angawk angak re ai masha ni hpe, “Lagu la ai ntsin gaw grau dwi nga ai, mayun sha ai muk gaw grau mu nga ai,” nga nna shi tsun nga ai.

¹⁸Dai num a nta de shang sai masha ni gaw, Katsan ga a krung sin wa de, rai nga masai hte shi a nta de shang sa wa ai masha ni gaw si hkrum nga ai hpe, shi e lau la lu ai ni dai lam hpe n chye nga ma ai.