Read Jinghpaw Common Language Bible 2009 HPAJI NINGLI 10 Bible Online

HPAJI NINGLI 10 - Jinghpaw Common Language Bible 2009 bible

HPAJI NINGLI 10

¹Jinu chyasi ni gaw manam pyaw ai sau palin mi hpe manam hkying shangun lu nga ai zawn, kaji mi angawk ai gaw galu kaba htum ai hpaji byeng-ya hpe jahten kau ya lu nga ai.

²Hpaji rawng ai wa gaw jaw ai amu galaw nna angawk ai wa shut ai amu chye galaw ai gaw shingra htung tara langai rai nga ai.

³Shi a angawk angak ai amu gaw lam dingyang e shi hte hkrum ai tsasam masha ni hta pyi, dan dawng nga ai. Shi gaw angawk ai wa rai nngai nga nna masha shagu hpe chye shangun na wu ai.

⁴Na a mungdu wa nang hpe masin pawt ai rai yang, bungli kaw na hkum pru mat et; dai hpe nang atsin sha sharang kau ai rai yang, grai sawng ai shut hpyit lam hpe raw dat kau mai nga ai.

⁵Ndai mungkan ga hta n teng n man ai lam langai nga nga ai; dai gaw mung up hkang du ni a majaw byin wa ai n teng n man lam rai nga ai.

⁶Sut su ai ni n sawn n sang di hkrum nga ma yang, angawk ai masha ni ahkang aya ap ya ai hkrum ma ai.

⁷Mayam ni gaw gumra jawn, du magam ni gaw mayam ni zawn lagaw hte hkawm nga ma ai hpe ngai mu nngai.

⁸Nang nhkun htu ai rai yang, dai hta nang di hkrat na ndai; bunghku hpe nang run ai rai yang, nang hpe lapu achye na ra ai.

⁹Nang gaw nlung maw hta amu galaw ai rai yang, nlung ni a majaw hkala machyi hkrum nga ai. Hpun chye ai rai yang, shingdi ai majaw hkala hkrum nga ai.

¹⁰Na a nwa tawn mat nna, dai hpe nang n garang ai rai yang, dai hpe lang ai shaloi n-gun grau dat ra nga ndai. Tau nna myit mang ai lam gaw grau nna htuk manu nga ai.

¹¹Nang gaw lapu hpe shawng achye shangun ai rai yang, lapu hpe kaning rai shalen ai lam chye da ai gaw hpa akyu n rawng nga ai.

¹²Hpaji rawng ai wa tsun ai ga gaw shi hpe shagrau sha-a hkam la shangun nga ai; rai ti mung angawk ai wa chyawm gaw shi tsun ai ga ni a majaw hten byak nga ai.

¹³Shanhte gaw angawk ai ga ni hte tsun hpang nna mana bu ai ga san hte hpungdim dat nga ai.

¹⁴Angawk ai wa gaw ga tut tut atsun nga ai. Hpang e hpa byin wa na ra ai hpe kadai mung n chye lu nga ai; anhte si mat ai hpang, hpa byin wa na lam kadai mung anhte hpe n tsun dan lu nga ai.

¹⁵Amu bungli hta hki ba nga ai majaw; shi gaw nta wa lam hpe n chye tam la hkra grai wa angawk nga ai.

¹⁶Hkawhkam wa ma naw rai nga yang, mungdan gaw tsin-yam tsindam hkrum nga ai; shi a mungdan a ningbaw ni shana tup lusha poi galaw ma ai.

¹⁷Rai ti mung, mungdan hta shi myit hte daw dan lu ai hkawhkam langai hte aten hkrak hkrak lu sha nna tinang nang a hkum ni hpe n lu nang hkra hkang lu ai ningbaw ni nga ai rai yang, dai mungdan gaw kaja ai maka kumla pru nga ai.

¹⁸Marai langai mi shi a nta numgaw kapa na matu nau lagawn ai rai yang, dai gaw kayun wa nna nta mung tsam mat na ra ai.

¹⁹Lusha poi galaw ai gaw nang hpe kabu gara shangun nga ai; sabyi ntsin gaw nang hpe myit pyaw shangun nga ai; rai ti mung gumhpraw n lu yang dai hta na langai ngai hpe nang galaw lu ai n rai.

²⁰Hkawhkam wa hpe kraw kata e pyi hkum dagam et; na a yup gawk kata hta pyi sut su ai ni hpe hkum dagam et. Ntsa malen u gaw nang hpa tsun ai shiga gun mat wa nna shanhte hpe tsun dan chye nga ai.