Read Jinghpaw Common Language Bible 2009 HPAJI NINGLI 12 Bible Online

HPAJI NINGLI 12 - Jinghpaw Common Language Bible 2009 bible

HPAJI NINGLI 12

¹Dai rai nna, ram prat naw rai nga yang, nang gaw, “Asak hkrun lam hpe ngai n ra sharawng nngai,” ngu nna myit ru myit tsang ai nhtoi ni hte shaning ni garai n du yang, na a Hpan Wa Ningsang hpe adum nga u.

²Ajan, shata hte shagan ni a nhtoi gaw na a matu sin mat wa na ra a, marang sumwi gaw galoi mung lai mat wa na ra ai n rai.

³Nang hpe makawp maga da ai na a lata lahpum ni gari ashun wa nna, n-gun ja ai na a lagaw ni n-gun kya mat wa na ra ai. Lusha maya sha na, na a awa ni run mat na ra ai; na a myi mung nau wa amam mat nna asan sha n mu lu na ra ai.

⁴Nang gaw nmaw lam hkan garu ai nsen hpe na na n rai, na a ana ni lahpang mat na ra ai. Htumrin nsen hte mahkawn mangoi dum ai nsen hpe ayak ahkak rai na lu ti mung, u ngoi ai nsen gaw nang hpe yup sharawt na ra ai.

⁵Nang gaw tsaw ai shara ni hpe hkrit na rai ndai, lam hkawm ai mung hkrit tsang shara tai na ra ai. Na a kara ni hpraw wa nna na a hkum hpe maga mi de du hkra dasang tsam mari rai hkrawn sa wa lu na ndai. Na a ra sharawng mayu ai myit yawng htum mat na ra ai. Anhte gaw anhte a jahtum na bansa shara de sa wa nga ga ai; shing rai nmaw lam ni hkan sharung shayawt ai gaw nga nga na ra ai.

⁶Gumhpraw saidawng di mat na ra ai; aja pyengdin mung hkrat ga mat na ra ai, hka htung sumri di mat na ra ai, hka di bu mung ga gamang mat na ra ai.

⁷Anhte a hkum hkrang ni gaw ga nhpu de nhtang mat wa na ra ai. Asak a nsoi nsa chyawm gaw anhte hpe jaw ya ai Karai Kasang hpang de nhtang wa na ra ai.

⁸Kaman lila, kaman lila, nga nna Sumru Ninghkrin wa tsun ai. Dai yawng mayawng gaw kaman lila hkrai rai nga ai.

⁹Rai ti mung, Sumru Ninghkrin wa hpaji rawng nga ai majaw shi chye ai lam, mung masha ni hpe sharin achyin ya nga ai. Shi gaw ga shagawp ga ni hpe sawk yu nna teng man ai lam hpe ding man ai hku sawk manaw hpajang da nu ai.

¹⁰Dai Sumru Ninghkrin wa gaw shalan shabran ga ni hpe tam shakut yu wu ai, rai ti mung, shi ka ai ga ni gaw teng man nga ai.

¹¹Hpaji rawng ai ni a ga ni gaw sagu ni hpe lam woi na matu sagu rem ni lang ai majawn hte bung nga ai rai nna ka mahkawng da ai ga shagawp ni gaw dit jung da ai hpri masen zawn grin nga ai. Dai ni gaw anhte yawng a sagu Rem ai Wa, Karai Kasang a lata hku jaw ya ai ni rai nga ai.

¹²Ngai sha e, ndai lam ni hta kaga, sadi na lam langai naw nga nga ai; laili laika ka da ai gaw n htum hkraw nga ai; law law sharin la ai gaw nang hpe hki ba shangun na ra ai.

¹³Ya ndai lam yawng mayawng shapraw ngut ai hpang, tsun dan na lama mi sha nga sai: Karai Kasang hpe hkrit hkungga u, shi a hkang da ai lam ni hpe madat mara nga u, hpa majaw nga yang dai gaw anhte hpan da hkrum nga ga ai a lam madung rai nga ai.

¹⁴Karai Kasang gaw anhte galaw ai amu magup hpe kaja ai rai ti mung, n kaja ai rai ti mung, makoi magap da ai amu ni hpe pyi, jeyang na ra ai.