Read Jinghpaw Common Language Bible 2009 HPAJI NINGLI 2 Bible Online

HPAJI NINGLI 2 - Jinghpaw Common Language Bible 2009 bible

HPAJI NINGLI 2

¹Kabu gara ai lam hpe ngai nan ra sharawng ai hte mu tam la na matu daw dan da nngai. Rai ti mung dai mung kaman lila rai nga ai hpe ngai mu ni ai.

²Mani ai wa gaw angawk angak re ai wa rai nna sharawng awng hpa lam gaw nang hpe mai kaja lam n shabyin ya lu nga ai hpe ngai sawk tam lu ni ai.

³Hpaji byeng-ya a matu nye a myit ra sharawng ai hku shadut ai hta hkan let, nye a hkum hpe sabyi ntsin hte shapyaw nna mai kaja lam hkam la na nngai ngu daw dan da ni ai. Dai gaw ginding aga ntsa e hkring mi sha asak hkrung ai shinggyim masha ni aten shama kau lu ai kaja htum ai lam rai na re ngu, ngai myit nawn la nngai.

⁴Ngai gaw amu kaba ni shangut ni ai. Ngai hkum nan nta ni gap ai hte sabyi sun ni hkai da ni ai.

⁵Ngai gaw shat mai sun ni hte namsi namsaw sun ni hta namsi hpun amyu hkum sumhpa hkai sharing da nngai;

⁶Ngai gaw dai ni hpe hka shalen jaw na matu nawng ni htu da nngai.

⁷Ngai gaw mayam law law mari da nngai, nye a nta hta mayam ni mayat maya wa ma ai. Nye a shawng shawng kaw nna Yerusalem e nga nga sai ni hta ngai grau nna yam nga hpung ni hpe madu da nga nngai.

⁸Ngai up ai mungdan a hkawhkam sut rai ni hta na aja, gumhpraw hpe mung sumpum da nngai. Numsha lasha ni gaw ngai hpe shapyaw ya na matu mahkawn mangoi ma ai. Lasha langai yu ra lu ai numsha ni yawng mung ngai lu nngai.

⁹Rai sa, ngai gaw galu kaba nga ni ai, Yerusalem hta shawng nga nga sai ni mahkra hta grau galu kaba nga nngai; nye a hpaji byeng-ya gaw ngai hpe galoi mung hkrat sum shangun ai n rai.

¹⁰Ngai ra ai hpa rai tim ngai lu la lu nngai; myit pyaw lam hpa hpe mung ngai hkum nan ningdang kau nngai n rai. Ngai galaw ai amu magup a majaw ngai gumrawng lu nngai. Dai yawng gaw nye a shagrau kumhpa rai nga li ai.

¹¹Dai hpang, ngai galaw da lu sai amu yawng hte seng ai lam hte dai amu hpe ngai kade ayak ahkak hte galaw da sai hpe mung, ngai myit sawn yu nngai, dai mung hpa lachyum n pru nga ai hpe ngai myit dum nngai. Dai gaw nbung hpe shachyut ai zawn rai nna hpa akyu mi n pru nga ai.

¹²Hpang jahtum gaw, lai sai hkawhkam ni galaw kau sai amu hpe chyu sha hkawhkam wa galaw lu nga ai. Dai rai nna, hpaji byeng-ya chye ai, myit n su ai hte angawk angak re ai ni gaw kaning re ai lachyum rai nga ai hpe ngai myit sawn sumru hpang wa nga nngai.

¹³Oh, “Nhtoi gaw nsin hta grau kaja nga ai zawn, hpaji byeng-ya gaw angawk angak re ai hta grau kaja nga ai hpe ngai chye nngai.

¹⁴Hpaji chye ai ni gaw shanhte gara de sa wa nga ai hpe mu lu ma ai, angawk ai ni chyawm gaw mu lu ai n rai.” Rai ti mung anhte yawng a matu ala nga ai hpang jahtum na lam gaw maren rai nga ai hpe ngai chye nngai.

¹⁵Ngai gaw nye a kraw kata e, “Angawk ai ni hta byin wa ai sha, ngai hta mung byin nga ai. Dai re ai majaw hpaji byeng-ya grau rawng ai hta na hpa baw lu la sahka?,” ngu nna tsun ni ai. Ngai chyawm gaw, “Kaman lila hkrai rai nga ai, arai langai mung n rai nga ai,” ngu nna htan we ai.

¹⁶Kadai mung hpaji rawng ai ni hpe dum ai n rai; kadai mung angawk angak ni hpe dum ai n rai. Anhte yawng gaw htawm hpang prat e malap kau hkrum na ni hkrai rai nga ga ai. Anhte yawng gaw hpaji rawng ai wa hte angawk ai wa zawn maren sha si ra na ga ai.

¹⁷Dai rai nna, asak hkrun lam hta ru yak tsin-yam tsindam hkrum hkra ai hta kaga lam magup gaw nye a matu kaman lila hkrai rai nga ai majaw nye a matu hpa lachyum n pru nga ai. Dai ni yawng gaw kaman lila hkrai rai nga sai; ngai mung nbung hpe hkan shachyut kau ni ai.

¹⁸Nye a matu ngu nna ngai galaw shachyen da ngut sai amu gaw kaman lila rai nga ai, hpa majaw nga yang, nye a hpang du sa ai wa a matu htawng da ya ra nga ai hpe ngai chye nngai,

¹⁹dai wa gaw hpaji rawng ai wa mung mai byin nga ai, shing n rai shi gaw angawk ai wa mung mai byin nga ai-kadai chye lu a ta? Ti mung, shi gaw ngai galaw da sai amu magup hpe mung, ndai mungkan ga hta nye a matu ngu nna nye a hpaji byeng-ya hte ngai tam da ai arai magup hpe madu la na ra ai. Dai yawng mayawng mung kaman lila rai nga ai.

²⁰Dai rai nna, ngai grai shakut shaja let galaw kau ai amu a majaw yu lahpawt dum kau nngai.

²¹Na a hpaji byeng-ya, machye machyang hpaji hte kung kyang ai maka kumla yawng hte arai lama mi hpe nang galaw da ti mung, dai hpe n galaw shakut lawm ai marai langai ngai a lata de nang tawn kau da ya na rai nga ndai. Dai mung kaman lila rai nga ai hte dai amu mung n jaw nga a hka!

²²Nang gaw amu galaw ai hte na a asak hkrun lam ting hta myit ru ai hte de a matu madun dan na nang hpa lu a ta?

²³Nang hkrung nga dingsa, nang galaw ai lam magup gaw kaman rai nga ai rai ti mung, myit ru ai hte baw machyi ai hkrai rai nga ai. Shana e pyi na a myit ban sa lu ai n rai. Dai yawng mayawng mung kaman lila rai nga ai.

²⁴Anhte galaw lu ai kaja htum ai amu gaw lu lu sha sha hte anhte galaw lu ai amu hta kabu gara na lam sha rai nga ai. Ti mung, dai pyi Karai Kasang kaw na rai nga ai hpe ngai dum hprang nngai.

²⁵Nang nan lu sha nna nang hkum nan pyaw lu ai lam hpe kaning rai hkam la lu na n ta?

²⁶Karai Kasang gaw shi awng sharawng ai ni hpe hpaji byeng-ya, machye machyang hte kabu gara ai lam jaw nga ai, rai ti mung shi gaw mara kap ai ni hpe amu galaw shangun ai, asak kan bau shangun ai hte mahkawng da shangun nga ai, shaloi shanhte lu ai arai gaw shi awng sharawng ai ni a lata de jaw ya lu nga ai. Dai yawng mayawng mung kaman lila rai nga ai. Dai gaw nbung hpe shachyut nga ai zawn rai nga ai.