Read Jinghpaw Common Language Bible 2009 HPAJI NINGLI 4 Bible Online

HPAJI NINGLI 4 - Jinghpaw Common Language Bible 2009 bible

HPAJI NINGLI 4

¹Dai hpang, ngai gaw ndai mungkan ga hta a byin nga ai n teng n man lam hpe bai yu yu nngai. Dip gamyet sha hkrum nga ai ni hkrap nga ti mung, shanhte hpe kadai mung karum la nga ma ai n rai. Dai dip gamyet sha ai ni mahtang shanhte a hpang maga de daru magam n-gun rawng nga ai majaw kadai mung shanhte hpe n karum la ma ai.

²Ngai gaw si mat sai ni hte lai mat wa sai ni hpe hkan yu manawn nngai; shanhte gaw naw hkrung nga ai ni hta grau nna pyi kaja nga ma ai.

³Rai ti mung, galoi mung garai n shangai sa wa ai ni gaw ndai mungkan ga hta byin nga ai n rap ra ai lam hpe galoi mung n mu yu ai ni hta grau kaja nga ma ai.

⁴Masha gaw awng dang na matu hpa majaw amu grai shaja galaw ra ai hpe mung ngai sharin la se ai; dai gaw hpa majaw nga yang, shanhte a htingbu ni lu ai arung arai ni hpe yu manawn ai majaw rai nga ai. Rai ti mung dai gaw kaman lila rai nga ai. Dai gaw nbung hpe shachyut nga ai zawn rai nga ai.

⁵Shanhte gaw tinang a lata hkatum kau nna tinang hkum kyet si shangun ai gaw angawk angak rai nga ai nga nna tsun ma ai.

⁶Dai hku mung mai byin nga ai, rai ti mung dai gaw ngwi pyaw sim sa ai myit kachyi mi lu ai gaw lata lahkawng hte aten tup amu galaw ai hta grau kaja nga ai. Dai gaw nbung hpe hkan rim shakut ai rai nga ai.

⁷Ngai gaw asak hkrun lam hta hpa asung n shang ai lama mi matsing da ni ai.

⁸Ndai yang e shi chyu sha nga ai masha langai nga nga ai. Shi gaw shadang sha n lu, kahpu kanau n lu ti mung tut nawng amu galaw nga ai. Shi lu ai sut gan hta galoi mung myit yu dik nga ai n rai. Shi gaw bungli galaw shaja ai hte shi hkum nan pyaw hpa lam hpa hpe mung ningdang kau ai gaw kade a matu rai kun? Dai mung kaman lila hte asak hkrung nga na matu nchyi nmu re ai lam sha rai nga ai.

⁹Marai lahkawng gaw marai mi hta grau kaja nga ai; hpa majaw nga yang, shan lahkawng rau galaw lu ai amu gaw grau nna tang du nga ai.

¹⁰Shan hta na langai wa kataw mat yang, kaga langai mi shi hpe karum shadaw ya lu nga ai. Rai ti mung, langai sha nga nna kataw ai rai yang, dai gaw n kaja nga ai; hpa majaw nga yang, kadai mung shi hpe karum shadaw na n nga nga ai.

¹¹Kashung ai shaloi, marai lahkawng rau yup yang lum nga ai, rai ti mung nang hkrai rai yang, kaning rai lum lu na rai ta?

¹²Marai lahkawng gaw marai mi sha htim gasat ai hpe manga kau lu nga ai. Rit sumri masum hte rit da ai sumri hpe gang di kau na yak la ai.

¹³Masha gaw matsan nga ai kaw na shi a mungdan hkawhkam tai wa lu nga ai zawn, htawng rawng nga ai kaw na hkawhkam tingnyang de rawt lung wa mai nga ai; rai ti mung shi asak kaba ugut gu ai aten du hkra hpaji jaw ai hpe n chye hkam la ai wa gaw nau wa angawk nga ai; shi gaw matsan tim hpaji machye machyang rawng ai shabrang wa zawn kaja nga ai n rai.

¹⁵Ngai gaw ndai mungkan hta nga ai masha ni yawng a lam hpe myit yu nngai. Shanhte nga ai shara ra hta hkawhkam aya hkam la na shabrang langai nga nga ai gaw ngai dum chye nngai.

¹⁶Hkawhkam wa up hkang ai masha amyu ni gaw shadawn shadang n nga hkra law nga ai; shi si mat jang, shi galaw ai amu hpe kadai mung chyeju dum na ma ai n rai. Dai mung laman lila rai nga ai. Dai gaw nbung hpe hkan shachyut ai zawn rai nga ai.