Read Jinghpaw Common Language Bible 2009 HPAJI NINGLI 6 Bible Online

HPAJI NINGLI 6 - Jinghpaw Common Language Bible 2009 bible

HPAJI NINGLI 6

¹Ngai gaw ndai mungkan hta grai sawng ai n tara lam amu galaw nga ai hpe mung yu matsing ni ai.

²Karai Kasang gaw anhte hpe ja gumhpraw sut gan, arawng sadang hte sut rai ni jaw ya na ra ai, rai sa, anhte ra sharawng ai arai shagu lu la ti mung dai hta kabu gara shangun mi ai n rai. Kaga tsasam masha wa mahtang de a malai kabu gara na ra ai. Dai gaw kaman lila rai nga ai, de a teng man lam gaw n jaw nga ai.

³Anhte gaw shaning law law nga lu nna kashu kasha latsa shaprat let kade ning mi hkrung nga lu ti mung, anhte a kabu gara ai kamhtaw n lu la ai hte atsawm sha makoi mayang n hkam la lu ga ai rai yang, nbya bya mat ai pyi grau kaja nga ai ngu ngai tsun mayu nngai.

⁴Dai ma gaw n shangai na mahtang grau kaja nga ai; dai gaw n dum shangun lu ai shara ngu ai nsin kata hta hkoi mat na ra ai.

⁵Dai ma gaw shani nhtoi hpe galoi mung n mu lu ai hte asak gaw hpa hte bung nga ai hpe mung n chye lu nga ai; rai ti mung dik nna ban sa lam hpe mu tam la nga ai;

⁶shaning hkying lahkawng ning hkrung nga lu ti mung, kabu gara ai asak hkrun lam hpe galoi mung n hkam la lu ai wa hta chyawm gaw grau nga ai. Hpang jahtum e shan gaw shara mi de sha sa mat wa na mara ai.

⁷Anhte gaw shahpa lama mi lu hkra nga, anhte a makan amu yawng mayawng hpe galaw shakut ti mung galoi mung hkru kat hkraw ga ai n rai.

⁸Hpaji rawng ai wa gaw angawk ai wa hta kade wa grau kaja nga a ni? Asak hkrun lam hpe kaning rai hkrum kadup na chye na na matu matsan mayan wa gaw mai kaja ai amu hpa hpe galaw nga a ta?

⁹Dai mung kaman lila rai nga ai; dai gaw nbung hpe shachyut ai zawn rai nga ai. Nang lu ai hta myit dik lu ai gaw arai lama ma hpe tut e ra marit nga ai hta grau kaja nga ai.

¹⁰Byin mabyin mahkra gaw moi moi kaw nna daw dan jahkut da sai hkrai rai nna nang gaw nang hta grau n-gun ja ai marai langai ngai hte dangrang hkat lu ai n rai, nga ai hpe anhte yawng chye ga ai.

¹¹Aten na na dangrang hkat magang akyu n rawng ai baw law jat magang rai nna nang gaw mai kaja nga ndai n rai.

¹²Masha a asak gaw shingnip zawn lai mat wa ai rai nna, akyu n rawng nga ai majaw ndai zawn kadun la ai aten hta anhte a matu mai kaja htum ai gaw hpa baw rai nga ai hpe kadai wa kaning rai chye lu na rai ta? Anhte si mat ai hpang mungkan ga hta hpa byin wa na hpe kadai wa kaning rai chye lu na rai ta?