Read Jinghpaw Common Language Bible 2009 HPAJI NINGLI 7 Bible Online

HPAJI NINGLI 7 - Jinghpaw Common Language Bible 2009 bible

HPAJI NINGLI 7

¹Kaja ai mying gumhkawng ai gaw hpu reng ai manam pyaw ai baw hta grau mai kaja nga ai; nang si wa ai nhtoi gaw shangai wa ai nhtoi hta grau kaja nga ai.

²Pyaw hpa poi de sa lawm na hta sharung shayawt nga ai nta de sa na mahtang grau kaja nga ai, hpa majaw nga yang, si hkrung si htan gaw anhte yawng hpe ala nga ai rai nna hkrung nga ai ni tinang hkum hpe nan tut nawng shadum ang mai nga ai.

³Yawn hkyen ai gaw mani ai wa hta grau kaja nga ai; dai gaw na a myi man hpe n tsawm shangun ti mung chye na hkawn hkrang ai na a nyan hpe sam shangun nga ai.

⁴Kabu gara ai lam hpe tut nawng myit aru yu nga ai wa gaw angawk angak re ai wa rai nga ai. Hpaji rawng ai wa chyawm gaw si hkrung si htan a lam hpe myit aru yu nga ai.

⁵Myit n su ai masha ni nang hpe shakawn kungdawn ai nsen hpe hkam la na hta hpaji rawng ai masha ni nang hpe daru sharin shaga ai hpe hkam la na gaw grau kaja nga ai.

⁶Angawk ai masha wa mani ai shaloi, dai gaw wan kata e ju hpun hkru kahpre ai hte bung nga ai. Dai gaw hpa lachyum mung n pru nga ai.

⁷Hpaji rawng ai wa marai langai ngai hpe masu hkalem yang, shi gaw angawk ai wa zawn galaw nga ai. Mayun kumhpa la sha ai rai yang, na a arawn alai hpe jahten kau nga ai.

⁸Arai lama ma a jahtum gaw de a npawt hpang ai hta grau kaja nga ai. Hkam sharang ai gaw gumrawng gumtawng ai hta grau kaja nga ai.

⁹Na a myit hkang u; masin kahtet ai gaw angawk angak amu rai nga ai.

¹⁰“Moi prat hta pru ai arai ni gaw hpa majaw grau kaja a ta?,” nga nna galoi mung hkum san et. Dai gaw zai byeng-ya hte seng ai ga san n rai nga ai.

¹¹Asak hkrung ai ni kadai mung hpaji rawng na mai nga ai; dai gaw sali wunli hkam la lu ai zawn mai kaja nga ai;

¹²gumhpraw gaw nang hpe shim lam dang lu ai made jaw ya lu ai zawn jaw na ra ai. Hpaji byeng-ya gaw nang hpe makawp maga ya nga ai-dai gaw machye machyang a akyu rai nga ai.

¹³Karai Kasang galaw nu ai amu hpe myit yu mu. Karai Kasang magaw da sai arai hpe kadai wa malan lu nga a ta?

¹⁴Nang ngamu ngamai wa ai shaloi, kabu gara nga u; ru yak tsin-yam tsindam hkrum ai shaloi, Karai Kasang gaw kabu gara ai hte ru yak tsin-yam tsindam lahkawng yan hpe dat da nga ai hpe dum u; hpang e, hpa baw bai byin wa na hpe nang galoi mung n chye nga ndai.

¹⁵Nye a asak hkrun lam gaw kaman lila nan rai mat sai, rai ti mung dai hta lam magup hpe ngai mu la se ai. Shanhte n hkru n hkra nga ai hte asak hkrung nga lu yang, mai kaja ai masha ni si mat chye nga ai.

¹⁶Dai rai nna nau wa hkum kaja dum et; nau wa mung hpaji hkum rawng dum et-hpa majaw na a hkum hpe sat kau na rai ta?

¹⁷Rai ti mung, nau wa n tara ai hku hkum rai et, nau wa angawk ai hku mung hkum rai et. Aten garai n du yang hpa majaw si mayu n ta?

¹⁸Ladu shalai ai lam ni hpe koi yen u. Nang Karai Kasang hpe hkrit kamyin ai rai yang, lam maga ga hku nna awng dang lu na rai ndai.

¹⁹Mare langai a matu up hkang du marai shi jawm galaw lu ai amu hta hpaji byeng-ya rawng ai marai langai mi gaw grau nna galaw lu nga ai.

²⁰Ndai ginding aga ntsa hta galoi mung n shut n shai ai sha, aten shagu jaw hkrak ai hku amu galaw lu ai masha n nga nga ai.

²¹Masha ni tsun matsun ai ga ni hpe hkum myit shang sha nga et; nang hpe na a shangun ma wa jahpoi asawng ai ga hpe na lu na rin dai;

²²nang nan masha kaga ni hpe law law lang jahpoi asawng kau nit dai hpe nang nan bai chye lu na rin dai.

²³Ngai gaw dai lam yawng mayawng hpe chyam dinglik yu na matu nye a hpaji byeng-ya lang yu ni ai. Ngai gaw hpaji chye na matu myit daw dan da ti mung dai amu hpe ngai n dang di lu nngai.

²⁴Asak hkrun lam a lachyum hpa rai nga ai hpe kadai wa sawk tam lu nga a ta? Dai gaw anhte a matu nau wa sung nna, chye na hkawn hkrang na matu nau wa yak la nga ai.

²⁵Rai ti mung ngai nan chyawm gaw hpaji machye machyang hte sharin achyin ai hta myit jung nga nngai, hpaji byeng-ya tam ai hta mung, nye a ga san ni hpe htai na lam hta mung, tara n lang ai hte myit n su ai gaw kade sha angawk angak re ai amu ni hpe sharin la na matu mung, ngai myit daw dan da nngai.

²⁶Ngai gaw si hkrung si htan hta grau ahkup ahka nga ai arai lama mi mu se ai, dai gaw mahkam zawn re ai numsha rai nga ai. Shi nang hpe nawng ya ai tsaw ra myit gaw sumgawn zawn nang hpe rim la na ra ai; Shi a lata lahpum gaw hpri saidawng zawn nang hpe gyit hkang la na ra ai. Karai Kasang hpe awng sharawng ai wa hprawng lawt lu ti mung, yubak kap ai wa hpe chyawm gaw shi rim la lu nga ai.

²⁷Rai sa, Myit Sumru Ninghkrin wa gaw dai mahtai ni hpe ngai naw sawk tam yu nga yang, dai lam hpe lang mi kachyi chyi rai mu hkrup nngai, nga nna tsun ai.

²⁸Kaga mahtai ni hpe ngai tam yu ti mung, hpa mung n lu tam sawk la lu ni ai. Ngai hkungga ging na zawn re ai lasha hkying mi hta na lasha langai hpe ngai mu tam tim, numsha langai hpe chyawm gaw n mu lu nga ai.

²⁹Ngai gaw ndai lam yawng mayawng hpe sharin la ni ai; Karai Kasang gaw anhte hpe asan sha hpan da ti mung, anhte mahtang anhte a hkum hpe kashuk kashak shabyin nga ga ai.