Read Jinghpaw Common Language Bible 2009 Shawlumon A Mahkawn Ga 3 Bible Online

Shawlumon A Mahkawn Ga 3 - Jinghpaw Common Language Bible 2009 bible

Shawlumon A Mahkawn Ga 3

¹Nye a yup ra ntsa e yup nga yang, lana mi a hpang lana mi hta ngai tsaw ra ai wa hpe yup mang mu nngai; Ngai shi hpe tam yu ti mung n mu lu nngai.

²Ngai gaw mare hkan e mung, de a nmaw lam ni hte lam kaji hkan e mung kahkrang hkawm nngai. Ngai gaw ngai tsaw ra ai wa hpe tam hkawm nngai; ngai mada yu ti mung shi hpe mu lu ai n rai.

³Mare gawan hkawm ai sin langa ni ngai hpe mu ma ai. Ngai gaw shanhte hpe, “Nye a tsaw ra wa hpe mu myit ni?,” ngu nna san we ai.

⁴Ngai shanhte kaw na pru mat wa ai shaloi jang, ngai shi hpe mu nngai. Ngai shi hpe jum shingdang nna nye nu a nta hte ngai hpe shangai ai gawk de shi hpe woi shang wa ai aten du hkra n dat hkraw nngai.

⁵Yerusalem numsha ni e, ngai hpe ga sadi jaw mi; anhte a tsaw ra myit hpe ginjang n shawn lu myit ga, laram ai chyahkyi hte shannga ni hta dagam da mu.

⁶Mura, lawban hte hpaga ga ai ni dut ya ai manam pyaw ai baw amyu myu gaw, wan hkut shadaw zawn zaibru jang na pru wa ai gaw hpa rai nga a ta?

⁷Shawlumon du sa wa nga ai, shi a tingnyang ntsa e dung nga ai; Israela na kaja htum ai hpyenla kru shi gaw sin langa tai ya nga ma ai.

⁸Shanhte yawng gaw nhtu hta kungkyang ma ai; shanhte gaw majan htat ai shara de shawng majen je ai salang ni rai ma ai. Shanhte langai hte langai gaw tinang nhtu hpye let, shana e htim gasat na hpe hkap nga ma ai.

⁹Hkawhkam Shawlumon hpe kaja htum ai hpun hte galaw ai tingnyang hta hpai ma ai.

¹⁰De a shadaw ni hpe gumhpraw hte sup nna; de a ntsa aja hte maka ka ai sumpan rai nga ai. De a dung shara ni gaw Yerusalem numsha ni shawang myit hte mani tsawm hkra da da ai shaba pu nsam rawng ai sumpan hte nep da nga ai.

¹¹Ziun numsha ni e, Hkawhkam Shawlumon hpe sa yu yu mu. Shi a hkungran poi galaw ai shani, shi a kabu gara ai hte kabu awng sharawng ai shani hta, shi a kanu gaw shi a baw hta shagup ya ai janmau hpe shi gup nga ai.