Read Jinghpaw Common Language Bible 2009 Shawlumon A Mahkawn Ga 7 Bible Online

Shawlumon A Mahkawn Ga 7 - Jinghpaw Common Language Bible 2009 bible

Shawlumon A Mahkawn Ga 7

¹Nang gaw mauhpa numsha she rai nga n hka! Na a lagaw hta kyepdin din da ai gaw kade sha tsawm htap nga lit hka! Wang wang re ai na a magyi ni gaw sumla soi sara wa a amu zawn rai nga ai.

²Dai yang e jarung langai nga nga ai, dai hta manam pyaw ai sabyi ntsin hte galoi mung hpring nga ai. Dai yang e, hkaulan mam hkauling langai taw nga nna, hka law pan ni hte shinggrup da nga ai.

³Na a madoi chyu hpang yan gaw chyahkyi marun yan hte mung, shannga lahkawng hte mung bung nga ai.

⁴Na a du gaw magwi kawng langchyi hte bung nga ai. na a myi ni gaw Heshbon mare dai mare kaba a chyinghka makau na hka lawng ni hte bung nga ai. Na a ladi gaw tsawm htap nga nna Damasku mare sin ai Lebanon langchyi hte bung nga ai.

⁵Na a baw gaw tsaw ai Hkarmela bum zawn rai nga ai. Hkri da ai na a kara gaw mani tsawm dik ai lai sumpan zawn tu ala nga ai; de a tsawm htap ai gaw hkawhkam wa hpe pyi ahkang la lu nga ai.

⁶Nang gaw kade sha sumnung shingdi nna kade sha tsawm htap nga n hka; na a tsaw ra kabu pyaw lam gaw kade sha hkum tsup nga a hka!

⁷Nang gaw namhtan hpun langai zawn hkum shingyan tsawm htap nna, na a madoi chyu hpang yan gaw namhtan si sumbaw ni hte bung nga ai.

⁸Ndai namhtan hpun de ngai lung na nngai de a asi hpe di la na nngai. Na a madoi chyu hpang yan gaw nye a matu sabyi si sumbaw zawn rai nna; nang sa ai nsa gaw ja magaw si sama hte bung nna,

⁹na a n-gup gaw jet htum ai sabyi ntsin hte bung nga ai. Shing rai, dai sabyi ntsin gaw nye a nja jan hpang de ading sha lwi yu wa nhtawm, shi a nten ni hte awa ni de lwi du nga ai.

¹⁰Nye a tsaw ra ai wa hpe ngai madu ai rai nna shi ngai hpe ra sharawng nga ai.

¹¹Ngai tsaw ra ai wa e, sa rit, pa ga de pru hkawm nna, shana hpe kahtawng ni hkan nga shalai hkawm ga.

¹²An gaw jahpawt jau rawt nna sabyi ru tu wa, n tu wa ai hpe mung, pu majawm, n majawm ai hpe mung, hkainu si hpun ni pu ai, n pu ai hpe mung sa mada yu ga. Dai yang e, nye a tsaw ra myit nang hpe ap ya na de ai.

¹³Nang gaw dudim si hpun a sama hpe manam lu nga ndai; anhte a chyinghka makau e dwi sau ai namsi ni nga nga ai. Tsaw ra ai wa e, manam pyaw ai baw dingsa hte nnan mahkra na a matu mahkawng da ya nngai.