Read Jinghpaw Common Language Bible 2009 ESAIA 10 Bible Online

ESAIA 10 - Jinghpaw Common Language Bible 2009 bible

ESAIA 10

¹Nanhte gaw dingnye hkrum nga myit dai! Nanhte gaw n teng n man ai tara ni hpe galaw shapraw nna nye a amyu masha ni hpe dip gamyet da nga myit dai.

²Dai re ai majaw she, nanhte gaw matsan mayan masha ni lu la ang ai ahkaw ahkang hte teng man rap ra ai tara lu la na hpe hkum pat da nga myit dai. Nanhte gaw gaida gaina ni hte jahkrai nmai ni madu da ai sut gan ni hpe la kau ya nga myit dai.

³Karai Kasang nanhte hpe ari jaw ai shaloi, nanhte hpa galaw na rai myit ni? Shi gaw sumtsan mung kaw nna nanhte hpang de tsin-yam tsindam la sa ya wa ai shaloi, nanhte hpa galaw na rai myit ni? Karum la lam mu tam la hkra nanhte gara shara de hprawng hkawm na myit ni? Nanhte a sut gan hpe gara shara e makoi da na myit ni?

⁴Nanhte gaw majan ginra hta sat kau ai hkrum na rai myit dai, bawng masha ni hpe zawn dun garawt mat wa ai hkrum na marin dai. Dai rai tim pyi, dai MADU a masin kahtet ai gaw kawp mat na ra ai n rai; shi a lata gaw ari jaw na matu naw ladawn da na ra ai.

⁵Dai MADU gaw, “Asuri e, ngai masin pawt nga ai ni hpe ari jaw na matu hkawn langai zawn Asuri hpe ngai lang nngai.

⁶Ngai gaw ngai hpe masin shapawt ai amyu masha, karai kata ai amyu baw hpe gasat na matu Asuri hpe shangun dat nngai. Ngai gaw shanhte hpe lanep hta, arai lagu na hte lam nmaw na ga nhpu hpe zawn amyu masha ni hpe kabye anut kau na matu dat dat nngai,” ngu nna tsun wu ai.

⁷Rai ti mung Asuri hkawseng wa gaw shi a myit masin hta du daw sai hkaw na maw mawn lam ni rawng nga ai. Shi gaw masha amyu baw law law ni hpe gasat shamyit kau na matu daw dan jahkut da nga ai.

⁸Shi gaw, “Nye a hpyen du shagu hte gaw hkawhkam rai masai!

⁹Ngai gaw Hkalno hte Hkarhkeme a mare ni hte Hamat hte Arpad a mare ni hpe mung, Samari hte Damasku mare ni hpe mung gasat dang kau ni ai.

¹⁰Ngai gaw Yerusalem hte Samari hta nga ai hpara sumla ni hta grau law ai hpara sumla nawku nga ai mungdan ni hpe ari jaw na matu hkan dep nang nga nngai.

¹¹Ngai gaw Samari mare hte de a hpara sumla ni yawng hpe jahten kau ni ai, dai hte maren, Yerusalem hte dai shara hta nawku nga ai hpara sumla ni hpe jahten kau na we ai,” nga nna shakawng nga ai.

¹²Rai ti mung Madu gaw, “Ziun Bum ntsa hte Yerusalem hta ngai galaw ra ai amu ngut boi ai shaloi, ngai gaw Asuri hkawseng wa hpe shi a shakawng shakat ai hte gumrawng gumtawng ai lam yawng a majaw ari jaw na we ai,” ngu nna tsun ai.

¹³Asuri hkawseng wa gaw, “Ngai gaw dai lam yawng hpe ngai hkum nan galaw se ai. Ngai gaw n-gun ja ai hte hpaji rawng nna myit let nga nngai. Ngai gaw masha amyu ni a lamu ga jarit ni hpe sit kau nna shanhte kyem mahkawng da ai arung arai ni hpe kashun la ni ai. Dai shara hkan shanu nga ai amyu masha ni hpe dumsu usu langai zawn kabye anut kau ni ai.

¹⁴Mungkan ga na masha amyu baw ni gaw u tsip langai hte bung nga ai, ngai gaw udi ni hpe aloi sha hkan magawn la lu ai zawn shanhte a sut gan ni hpe magawn la nngai. Ngai hpe jahkrit shama na singkaw langai mi mung n kahprap lu nga ai, ngai marawn kyek bun na n-gup kadai n hpaw mahka lu nga ai!,” nga nna shakawng nga ai.

¹⁵Rai ti mung dai MADU gaw, “Nwa gaw dai hpe lang ai masha wa hta grau nga ai ngu, hkrak lu tsun nga a ni? Zingret gaw dai hpe ret ai masha wa hta grau ahkyak mai nga a ni? Dawhkrawng gaw masha hpe n sharawt nga ai; masha mahtang dawhkrawng hpe sharawt nga ai,” ngu nna tsun nga ai.

¹⁶Chyahtum Chyalai N-gun rawng ai dai MADU gaw ya hpum sau nga ai ni hpe ari jaw na matu ana zinli dat dat na ra ai. Shanhte a hkum ni hta wan rawng nga nna, dai gaw hkru chyu hkru nga na ra ai.

¹⁷Karai Kasang, Israela a nhtoi gaw wan tai na ra ai. Israela a chyoi pra ai Karai Kasang gaw wan shinglet tai na ra ai, dai gaw lani mi hta sha arai shagu hte hpe hkru kau na ra ai, ju hpun ni hte sumwum ni hpe pyi hkru kau na ra ai.

¹⁸Sut nhprang hte hpring ai nam maling ni hte yi sun lamu ga ni tsep kawp jahten kau hkrum na ra ai, dai hte maren, si shangun lu ai machyi makaw gaw masha langai ngai hpe jahten lu nga ai.

¹⁹Dai shara hta n law n la rai tu nga ai hpun ni naw ngam nga nna, dai ni hpe ma kaji sha pyi hti matsing lu na ra ai.

²⁰Naw ngam nga ai Israela amyu masha ni gaw shanhte hpe ganoi jahten kau sai amyu baw a ntsa e loi mi mung shamyet shanat n ra ai aten du wa nga sai. Shanhte gaw dai MADU Israela a chyoi pra ai Karai Kasang hpe kam hpa wa na mara ai.

²¹N law n la rai naw ngam nga ai Israela amyu masha ni gaw chyahtum chyalai n-gun rawng ai shanhte a Karai Kasang hpang de nhtang wa na mara ai.

²²Israela amyu masha ni gaw ya rai tim panglai hkin-gau na zaibru tum ni daram law htam nga ma ti mung, ngam ai loi mi chyu sha nhtang wa na mara ai. Sharun jahten ai gaw amyu masha ni a matu mahkawng da ya nga ai, dai gaw hpring tup hkra hkam la lu na mara ai.

²³Rai sa, Chyahtum Chyalai N-gun rawng ai Tsaw Htum ai dai MADU gaw dai mungdan ting hta jahten shabyak ai amu hpe shi tsun da sai hte maren shabyin dat na ra ai.

²⁴Chyahtum Chyalai N-gun rawng ai Tsaw Htum ai dai MADU gaw Ziun Bum hta shanu nga ai shi a amyu masha ni hpe, “Egutu masha ni galaw ga ma ai zawn Asuri masha ni nanhte hpe dip gamyet tim, shanhte hpe hkum hkrit nga myit.

²⁵Kade n na yang, ngai nanhte hpe ari jaw nga ai hpe jahtum kau na nngai, dai hpang ngai shanhte hpe jahten kau na nngai.

²⁶Chyahtum Chyalai N-gun rawng ai Ngai MADU gaw Oreb Lunghkrung e nga ai Midian masha ni hpe galaw kau we ai zawn nye a lasik hte shanhte hpe kayat na nngai. Ngai gaw Egutu hpe ari jaw ai zawn Asuri hpe mung ari jaw na nngai.

²⁷Dai aten du jang, ngai gaw nanhte hpe Asuri a daru magam n-gun kata kaw nna shalawt dat na nngai, shanhte a kandang mung nanhte a lahpa ntsa e galoi mung hpai da ra sana n rai,” ngu nna tsun wu ai.

²⁸Gumlau hpyen luksuk gaw Ai mare hpe zing la kau nu hka! Shanhte gaw Migron mare hku ga lai mat wa masai! Shanhte gaw Mikmasha mare e hpyen madi shadaw arai ni hpe tawn da nga masai!

²⁹Shanhte gaw bum lam hku ga lai wa nna, Geba mare e lana mi nga shalai kau ma hka! Rama mare hta nga ai masha ni gaw hkrit kajawng nga ma ai, Hkawhkam Shawlu a daidaw buga Gibea e nga ai masha ni mung hprawng mat nga masai.

³⁰Galim masha ni e, jahtau garu mu! Laisha masha ni e, madat mu! Anahtot masha ni e, htan mu!

³¹Madmena hte Gebim masha ni gaw shanhte a asak a matu hprawng nga ma ai.

³²Dai ni jang, gumlau hpyen ni gaw Noba mare hta nga nga ma ai, dai yang e shanhte gaw Ziun Bum ngu ai Yerusalem mare hpe sha-ang nna shanhte a lata latup nna kanga dan ma ai.

³³Chyahtum Chyalai N-gun rawng ai dai MADU gaw hpun lakung lakying ni hpe krum kau ai zawn shanhte hpe gang agrawp daw kau na ra ai. Shanhte kaw na gumrawng gumtawng dik ai ni hte tsaw dik htum ai ni gaw kran kau ai hte shagrit kau ai hkrum na mara ai.

³⁴Dai MADU gaw shanhte hpe maling kata na hpun ni hpe nwa hte kran kadang kau ai hte tsawm ai Lebanon hpun ni hpe pyi kran daw kau ai zawn shanhte hpe kran kadawng kau na ra ai.