Read Jinghpaw Common Language Bible 2009 ESAIA 19 Bible Online

ESAIA 19 - Jinghpaw Common Language Bible 2009 bible

ESAIA 19

¹Ndai gaw Egutu mung hte seng ai mungga rai nga ai. Dai MADU gaw sumwi ntsa e jawn nna Egutu mung de tin tin sa wa nga ai. Egutu hpara sumla ni shi a man e gari ashun nna Egutu masha ni nden marai sum mat ma ai.

²Dai MADU gaw, “Ngai gaw Egutu mung kata hta dinghku majan shabyin dat nna, kahpu kanau shada da, htingbu htingbyen shada da hpe hpyen tai shangun na we ai. Shingjawng kashun mare ni hte shanhte shada da htim gasat wa nna, shingjawng kashun ai hkawhkam ni mung shanhte a magam tingnyang a matu malan da ting shakut wa na ra ai.

³Ngai gaw Egutu masha ni a hpaji daw maw mawn ai lam ni hte shanhte a myit jasat lam ni hpe jahten sharun kau ya na we ai. Shanhte gaw shanhte a hpara sumla ni hpe karum la na matu hpyi lajin wa na mara ai. Shanhte gaw nat myihtoi ni kaw sa du nna bawng ban jahkrup ai hte hpaji jaw ga a matu si mat sai ni a tsu minla hte ga shaga na lajin wa na mara ai.

⁴Ngai gaw Egutu amyu masha ni hpe gumshem nna mazut nhtawm shanhte hpe up lu na hkawhkam wa a lata de ap kau na we ai. Chyahtum Chyalai N-gun rawng ai dai MADU Ngai nan tsun ni ai,” ngu nna tsun wu ai.

⁵Hka gaw Nila hka nu lwi shadang hta yawm mat wa na ra ai; dai hka nu gaw angwi ngwi sha hkun hkraw mat wa na ra ai.

⁶Dai hka ni angwi ngwi hkraw mat wa ai shaloi, hka shi kaji ni yat manam mat wa na ra ai. Mai-aw hte kungji ni hkraw nyip mat wa na mara ai.

⁷Nila hka nu hka kau mayan hku hkai tawn da ai nsi naisi ni yawng hkraw kyip mat nna, nbung e ahpawt kau ai hkrum na mara ai.

⁸Nila hka nu hta nga hkwi sha let kan bau nga ai masha hkum shagu hte gaw, jahtau hkrap ai hte madai sharung na mara ai; Shanhte lang ai nga myek ni hte sumgawn ni akyu n pru mat na mara ai.

⁹Lachyit sumpan da ai ni mung myit daw myit htum mat na mara ai;

¹⁰Ri da maka galaw ai ni hte kung kyang ai amu galaw masha ni mung myit daw mat nna myit kaji mat na mara ai.

¹¹Zoan mare ningbaw ni gaw mana nga ma hka! Egutu mung na hpaji rawng htum ai masha ni gaw angawk ai hpaji jaw nga ma hka! Shanhte gaw moi na hpaji ninghkrin ni hte hkawhkam ni a hkringhtawng dagraw ai ni rai nga ga ai nga nna hkawhkam wa a man e shanhte kaning rai gwi tsun na rai nga ma ta?

¹²Egutu hkawhkam wa e, na a myit let ai hpaji jaw masha ni kanang nga nga ma ta? Shanhte gaw nang hpe Chyahtum Chyalai N-gun rawng ai dai MADU gaw Egutu a matu hpa baw shatawng shada da nga ai lam mahkoi lu tsun dan lu na ma ai kun?

¹³Zoan hte Memhpi mare ningbaw ni gaw mana nga ma hka! Shanhte gaw masha amyu baw hpe lam woi lu na zawn nawn ma ai, rai ti mung shanhte gaw dai ni hpe lam woi shadam kau manu ai.

¹⁴Dai MADU gaw shanhte hpe shanut shanat rai nga ai hpaji jaw nu ai. De a akyu gaw, chyaru nang ai wa gaw tinang a nhpat hta bai galwi la ai zawn Egutu mung gaw lam shagu hta shut hpyit amu galaw ai hte ndi nda rai nga ai.

¹⁵Egutu mung hta matsan lu su n nga, ahkyak ai wa hte hpa n chye n chyang ai mi n nga, kadai mung karum ya lu ai n rai.

¹⁶Egutu masha ni gaw numsha ni zawn hkrit kaya agam wa ai aten du wa nga ai. Shanhte gaw dai MADU shanhte hpe ari jaw na matu shi a lata ladawn da nu ai hpe mu ai shaloi hkrit kajawng ai hte gari mat na mara ai.

¹⁷Egutu masha ni gaw Chyahtum Chyalai N-gun rawng ai dai MADU gaw shanhte a matu hkyen lajang ya nu ai hpang jahtum na lam hpe shanhte aten shagu myit dum nga ma ai majaw Yuda hpe hkrit kajawng na mara ai.

¹⁸Dai aten du ai shaloi, Egutu mung na mare manga hta Hebre ga shaga wa na mara ai. Dai masha ni gaw Chyahtum Chyalai N-gun rawng nga ai dai MADU a mying nsang hta shanhte a ga shaka dagam da na mara ai. Mare langai mi gaw “Jan a Mare,” ngu shamying hkrum na ra ai.

¹⁹Dai aten du ai shaloi, Egutu mung hta dai MADU a matu tawn hkungri langai nga wa na ra ai, Egutu mung lamu ga jarit hta shi a matu ap nawng ya ai nlung shadaw langai nga na ra ai.

²⁰Dai ni gaw Egutu mung hta e, Chyahtum Chyalai N-gun rawng ai dai MADU a hpung shingkang masat kumla tai na mara ai. Dai shara hta roi rip dip gamyet da hkrum nga ai amyu masha ni gaw karum la na matu dai MADU hpe hpyi jahtau dat ai shaloi, shi gaw shanhte hpe hkye mawai la na matu marai langai mi hpe dat dat ya na ra ai.

²¹Dai MADU gaw shi nan Egutu mung masha ni hpe shadan dan na ra ai, shanhte gaw shi hpe yin la nna nawku daw jau wa na mara ai. Shanhte gaw shi hpe shagu hkungga hte mahku hkungga ni nawng jau wa na mara ai. Shanhte gaw shi hta dagam ga sadi tawn da na mara ai, dai ga sadi hte maren shanhte galaw na mara ai.

²²Dai MADU gaw Egutu masha ni hpe ari jaw na ra ai, rai ti mung shi gaw shanhte hpe shamai shatsai ya na ra ai. Shanhte gaw shi kaw kayin wa na mara ai, shi gaw shanhte a akyu hpyi ga ni hpe na ya ai hte shanhte hpe shamai shatsai ya na ra ai.

²³Dai aten du ai shaloi, Egutu mung hte Asuri mung lapran ningmaw lam kaba hku wa na ra ai. Dai mungdan lahkawng na amyu masha ni gaw mungdan lahkawng a lapran htinglet hkawm sa wa na mara ai, dai mungdan lahkawng gaw rau sha nawku wa na mara ai.

²⁴Dai aten du ai shaloi, Israela gaw Egutu hte Asuri ni hte arawng sadang wa bung na mara ai, ndai amyu baw masum ni gaw mungkan ga yawng mayawng a matu shaman chyeju tai na mara ai.

²⁵Chyahtum Chyalai N-gun rawng ai dai MADU gaw shanhte hpe shaman ya nna, “Egutu mung na nye a amyu masha ni, ngai hpan shalat dat hkrum ai Asuri hte ngai lata la sai Israela amyu masha ni hpe ngai shaman ya na we ai,” nga nna tsun nga ai.