Read Jinghpaw Common Language Bible 2009 ESAIA 21 Bible Online

ESAIA 21 - Jinghpaw Common Language Bible 2009 bible

ESAIA 21

¹Ndai gaw Babelon mung hte seng ai mungga rai nga ai. Zaibru jang hpe lai di nna bung wa ai bung hpoi zawn, tsin-yam tsindam gaw hkrit na zawn re ai mung kaw nna sa wa na ra ai.

²Ngai gaw mazut byin masa ni a shingran, gumle gumlau ai hte jahten shabyak ai shingran ni hpe mu se ai. Elam hpyen luksuk e, htim gasat mu! Medi hpyen luksuk e, mare ni hpe wang tawn mu! Karai Kasang gaw Babelon mung e shabyin nu ai nni nkri hpe jahtum kau na ra ai.

³Ngai mu ai hte na ai shingran hta shinggyim machyi ai num zawn hkam sha ai hkrit hpa lam hte nchyi nmu gaw ngai hta hpring nga li ai.

⁴Nye a baw sin mat li ai, ngai gaw hkrit gari nga nngai. Ngai gaw shana de du wa na matu la kau ni ai, rai ti mung dai gaw hkrit kahpra ai hta jan nna nye a matu kaman lila rai nga ai.

⁵Shingran hta lusha poi jin jin rai nga sai; manam ni dung na matu sagu panep ni hpe hpyan nep da nga sai. Shanhte gaw lu lu sha sha rai ma ai. Hpyen du langai mi gaw akajawng sha ning ngu sadi jaw dat wu ai: “Du salang ni e, nanhte a ninggang ni hpe hkyen da manu!”

⁶Dai hpang Madu gaw ngai hpe, “Sa nna sin langa langai tawn u, shi hpa mu ai lam shiga jaw na matu shi hpe tsun u.

⁷Marai lahkawng yep yep rai gumra jawn sa wa ai masha ni hte lawze ni hte gawla-uk ni hta jawn ai masha ni hpe shi mu ai rai yang, shi gaw shanhte hpe sadi maja ai hte maram yu nga u ga,” ngu nna tsun wu ai.

⁸Dai sin langa wa gaw, “Madu e, Ngai gaw nye a sin shara hta shani shana tsap let sin nngai,” ngu nna jahtau tsun wu ai.

⁹Lahkawng yep yep rai gumra jawn ai ni ndai shara hta akajawng sha du mara ai. Sin langa gaw, “Babelon mung hkrat mat sahka! Shanhte nawku ai hpara sumla ni ga ntsa e ga gamang taw mat sai,” ngu nna shiga jaw wu ai.

¹⁰Nye a amyu masha Israela e, nang gaw hkaulan mam zawn kabye anut ai hkrum nga nit dai, rai ti mung ya chyawm gaw Chyahtum Chyalai N-gun rawng ai dai MADU Israela a Karai Kasang kaw na ngai na ni ai kabu gara shiga ngai nang hpe tsun ndau ni ai.

¹¹Ndai gaw Edom hte seng ai mungga rai nga ai. Marai langai mi gaw Edom mung kaw nna ngai hpe, “Sin langa wa e, Shana gaw kade na jang lai mat wa na rai nga a ta? Dai gaw kade na yang lai mat wa na lam, ngai hpe tsun dan e,” ngu nna shaga nga ai.

¹²Ngai gaw, “Jahpawt manap gaw du wa ra ai, rai ti mung shana bai du na ra ai. Nang bai san mayu ai rai yang, nhtang sa wa nna san u,” ngu nna htan we ai.

¹³Ndai gaw Arabi hte seng ai mungga rai nga ai. Dedan masha ni e, nanhte gaw Arabi mung a hkun hkraw ai shara hta hpaga dabang hku but nga myit dai,

¹⁴nang kaw du sa wa ai hpang gara ai masha ni hpe lu na ntsin jaw ndai. Tema mung na masha ni e, nang gaw tsin-yam hkrum ai masha ni hpe lusha jaw nga ndai.

¹⁵Shanhte gaw shanhte hpe sat na matu jin jin rai nga ai nhtu kaw nna mung, gap na matu jin jin rai nga sai ndan kaw nna mung, majan a shoihpa shoirang yawng kaw na mung, hprawng lawt wa ai ni rai ma ai.

¹⁶Dai hpang Madu gaw ngai hpe, “Kedara amyu bawsang ni a galu kaba ai gaw laning mi tup hta htum mat wa na ra ai.

¹⁷Ndan gap ai ni gaw Kedara a share shagan lu ai masha ni rai nga ma ai, rai ti mung shanhte hta na nkau mi gaw hti ngam nga na mara ai. Dai MADU Israela a Karai Kasang ngai nan tsun ni ai,” ngu nna tsun wu ai.