Read Jinghpaw Common Language Bible 2009 ESAIA 26 Bible Online

ESAIA 26 - Jinghpaw Common Language Bible 2009 bible

ESAIA 26

¹Amyu masha ni Yuda mung hta ndai mahkawn mangoi ga hpe mahkawn shakawn ai nhtoi du wa nga ai: Anhte a mare gaw ngang kang nga a hka! Karai Kasang shi nan de a bunghku ni hpe makawp maga da nga ai!

²Mare chyinghka ni hpe hpaw malang da mu, kangka ai masha amyu baw hte jaw ai amu galaw ai masha amyu baw ni shang lu mu ga.

³MADU e, nang gaw ngang kang ai yaw shada lam shatup ai ni hte nang hpe kam hpa ai ni hpe hkum tsup ai ngwi pyaw sim sa lam jaw ya nga ndai.

⁴Dai MADU hpe htani htana kam hpa nga mu; shi gaw anhte hpe tut nawng makawp maga na ra ai.

⁵Shi gaw gumrawng gumtawng ai ni hpe shagrit kau nu ai; shanhte shanu nga ai ngang kang ai mare hpe shi jahten kau nu ai, de a bunghku ni hpe ga nhpu tai mat hkra agrawp mani kau nu ai.

⁶Dip gamyet sha hkrum ai ni gaw de a ntsa hkan ya jang kabye hkawm lu nna dai hpe shanhte a lagaw lahpan hte kabye anut nga ma ai.

⁷MADU e, nang gaw mai kaja ai amyu masha ni a matu lam shatsawm ya nga ndai; shanhte hkawm sa ai lam gaw ra nga ai.

⁸Anhte gaw na a myit hkan ga ai hte nang hpe myit mada ga ai; nang gaw anhte ra sharawng ai lam yawng rai nga ndai.

⁹Shana e ngai gaw nye a myit masin mahkra hte nang hpe ala nngai; ginding aga hte dai hta nga ai masha ni hpe nang jeyang ai shaloi, shanhte yawng gaw teng man rap ra ai tara hpa rai nga ai hpe sharin la na mara ai.

¹⁰N hkru ai ni hpe nang matsan yu dum ti mung, shanhte gaw jaw ai amu galaw na matu galoi mung n sharin la nga ma ai. Ndai ding hpring ai amyu masha ni a lamu ga hta pyi shanhte gaw shut hpyit ai amu naw galaw ma ai; shanhte gaw na a galu kaba ai lam hpe hkap la na matu ningdang nga ma ai.

¹¹Nang gaw na a gumlau hpyen ni hpe ari jaw na ra ai lam hpe shanhte n chye ma ai. MADU e, shanhte hpe kaya kahpa jahkrum nna nni nkri hkam sha shangun u; nang hkyen da ya sai ari ahpri shanhte hpe hkam sha shangun u. Na a amyu masha ni hpe nang kade daram tsaw ra nga ndai gaw, shanhte hpe madun dan u law.

¹²MADU e, nang gaw anhte hpe ngamu ngamai lam shakat ya na rai nga ndai, anhte hkam la lu ai arai yawng mayawng hte gaw nang galaw ai amu a akyu chyeju hkrai rai nga ai.

¹³Dai MADU anhte a Karai Kasang e, anhte gaw kaga masha ni a up hkang ai npu hta nga lai wa saga ai, rai ti mung nang chyu sha anhte a MADU rai nga ndai.

¹⁴Ya chyawm gaw shanhte si mat masai, bai hkrung wa lu na ma ai n rai; shanhte a minla ni rawt wa na mara ai n rai, hpa majaw nga yang nang gaw shanhte hpe ari jaw nna shanhte hpe jahten kau nit dai. Kadai mung shanhte hpe galoi mung dum nga ai n rai.

¹⁵MADU e, nang gaw anhte a amyu baw hpe shalaw jahtam ya nit dai, de a lamu ga hpe man maga shagu de shadam dat ya nga ndai; dai gaw nang hpe arawng sadang jaw ya nga sai.

¹⁶MADU e, nang gaw na a amyu masha ni hpe ari jaw nga ndai, nni nkri hkrum ai shaloi shanhte nang kaw akyu hpyi ma ai.

¹⁷MADU e, nang gaw anhte hpe shinggyim machyi hkrum ai majaw jahtau nga ai numsha zawn, jahtau shangun nga ndai.

¹⁸Anhte gaw nchyi nmu hte tsin-yam hkrum lai wa saga ai, rai ti mung anhte gaw kaman sha shangai kau saga ai. Anhte gaw anhte a mungdan a matu awng padang hpa mung n lu la ga ai; anhte gaw hpa mung n lu shangut ga ai.

¹⁹Si mat sai anhte a amyu masha ni bai hkrung wa na mara ai! Shanhte a hkum hkrang ni hta asak bai rawng wa na ra ai. Shanhte a lup sung hku ni hta yup pyaw nga ai ni yawng hprang wa nna kabu gara mahkawn mangoi wa na mara ai. Htoi tu kabrim ai numri gaw ginding aga hpe n-gun awai ya ai zawn, dai MADU gaw moi chyaloi nhkoi kaw nna si mat sai ni hpe jahkrung la na ra ai.

²⁰Nye a amyu masha ni e, nanhte a dum nta kata de shang nna chyinghka la mu. Karai Kasang a pawt sindawng ai kawp mat ai aten du hkra, tinang hkum nan loi hkring mi makoi nga mu.

²¹Dai MADU gaw ginding aga na masha ni galaw ai yubak ni a matu ari jaw na nga, shi sumsing lamu nga shara kaw nna sa wa nga ai. Ginding aga ntsa e masha asak mayun sat ai ni dan dawng wa na mara ai, lamu ga gaw dai zawn sat kau hkrum sai ni hpe loi mi pyi makoi magap da na ra ai n rai.