Read Jinghpaw Common Language Bible 2009 ESAIA 3 Bible Online

ESAIA 3 - Jinghpaw Common Language Bible 2009 bible

ESAIA 3

¹Chyahtum Chyalai N-gun rawng ai MADU e, Madu gaw ya jang Yerusalem hte Yuda mung na amyu masha ni a myit mahta shara hte shamyet shanat shara rai nga ai arung arai shagu hte masha hkum shagu hte hpe la kau na hkyen nga ai. Shi gaw shanhte a malu masha hte shanhte a lu hka ni hpe mung,

²shanhte a share ninghkrin ni hte hpyenla ni, shanhte a tara agyi ni hte myihtoi ni, shanhte a gumhpan hpan ai ni hte mungdan rap daw salang ni,

³shanhte a hpyen luksuk hpyen du ni hte ninghtawn ningbaw ni, mung masa ninghkrin ni hte mandan chye bau ai masha shagu hpe la kau na ra ai.

⁴Dai MADU gaw amyu masha ni a ntsa e, n kung n kyang ai ma ni hpe up hkang shangun na ra ai.

⁵Masha hkum shagu hte gaw shada da zai hku nna adip arip di hkat na mara ai. Shabrang ni gaw asak kaba ai ni hpe hkungga lara na mara ai n rai, hpa n tai ai masha ni gaw shanhte a ntsa na masha ni hpe hkungga lara na mara ai n rai.

⁶Amyu lakying langai gaw shanhte a amyu kaw na marai langai ngai hpe lata la nhtawm shi hpe, “Nang gaw yawm dik bu hpun na lama mi lu nga ndai, dai rai nna ndai zawn ru yak tsin-yam tsindam hkrum ai aten e anhte a ningbaw tai ya mi,” ngu nna tsun ai aten du wa na ra ai.

⁷Rai ti mung shi gaw, “Ngai n tai ya lu na nngai! Ngai nanhte hpe n lu karum la na nngai. Ngai gaw lusha mung, bu hpun palawng mung n lu nngai. Ngai hpe nanhte a ningbaw hkum tai shangun mi!,” ngu nna htan na ra ai.

⁸Rai sa, Yerusalem gaw dingnye lu nga sai! Yuda gaw kadawng mat sai! Shanhte tsun ai hte galaw ai lam magup gaw dai MADU hte nhtan shai nga ai; shanhte gaw Karai Kasang hpe nan dan dan leng leng n kaw n law di ma ai.

⁹Shanhte a myi man tam ai amu ni gaw shanhte a akyu jasum ya nga ai. Shanhte gaw Sodom masha ni galaw ai zawn yubak hpe adan sha galaw nga ma ai. Shanhte gaw dingnye hkrum nga masai, shanhte gaw yubak hpe shanhte hkum nan de shadu la nga manu ai.

¹⁰Ding hpring ai wa gaw a lu na ra ai, arai shagu shanhte a matu mai kaja na ra ai. Shanhte gaw shanhte galaw ai amu a majaw kabu gara na mara ai.

¹¹Rai ti mung n hkru ai masha ni gaw dingnye hkrum nga sai; shanhte gaw kaga ni hpe galaw kau mu ai hte maren, shanhte hta mung ya jang dai hku hkrum hkra na mara ai.

¹²Gumhpraw hkoi sha ai ni gaw nye a amyu masha ni hpe dip gamyet sha nga ma ai, shanhte a hka madu ni gaw shanhte hpe masu hkalem nga ma ai. Nye a amyu masha ni e, nanhte a ningbaw ni gaw nanhte hpe lam woi shadam nga ma ai, dai rai nna nanhte gaw gara hku kayin wa na lam n chye nga myit dai.

¹³Dai MADU gaw shi a amu tsun na matu jin jin rai nga ai; shi gaw shi a amyu masha ni hpe jeyang na matu jin jin rai nga ai.

¹⁴Dai MADU gaw salang ni hte shi a amyu masha ni a ningbaw ni hpe tara tingnyang man de woi sa wa nga ai. Shi gaw ning ngu mara shagun nga ai: “Nanhte gaw sabyi sun ni hpe hpya kau nga manit dai, nanhte a dum nta ni gaw matsan mayan masha ni kaw na nanhte la wa ai arai ni hte hpring nga myit dai.

¹⁵Nanhte hta nye a amyu masha ni hpe agrawp mani kau na hte matsan mayan masha ni hpe zai hku nna dip gamyet sha na ahkang hpa mung n lu myit dai. Ngai Chyahtum Chyalai N-gun rawng ai Tsaw Htum ai MADU nan tsun ni ai.”

¹⁶Dai MADU gaw, “Yu u, Yerusalem numsha ni kade wa gumrawng gumtawng nga ma hka! Shanhte gaw shanhte a baw ni sharawt nhtawm hkawm sa ma ai. Shanhte gaw galoi mung apyaw sha hkalem sha nga ma ai. Shanhte gaw lagaw lahkam kaji sha hte nawt sa nhtawm shanhte a lagaw lahkawn ni mung sharat nga ai.

¹⁷Rai ti mung ngai gaw shanhte hpe ari jaw na we ai. Ngai gaw shanhte a baw ni hpe rep kau nna shanhte hpe pung krin tawn da na we ai.”

¹⁸Dai Madu gaw Yerusalem numsha ni grai gumrawng gumtawng ai hte lu ai arai magup ngu na, shanhte a lagaw ni, baw ni, du ni hte

¹⁹shanhte a nshang ni hkan sumli da ai shakya rai ni hpe htawm kabai kau ya na ra ai. Shi gaw shanhte a myi man magap ni hte

²⁰shanhte a baw chyawp ni, shanhte a lata lahpum hte nshang hkan sumroi da ai mandan lak hpoi ni,

²¹shanhte a layung ni hte ladi ni hta sumli ai shanghkawng ni;

²²shanhte a tsawm ai ntsa palawng galu ni yawng, bu gawt ni, baw htinggrum ni hte gumhpraw tingsan ni;

²³shanhte a kata palawng ni, lachyit hpajet du gyit sumpan hte shanhte a baw ni hpe magap ai za sumpan galu ni hpe la kabai kau ya ai nhtoi du wa na ra ai.

²⁴Manam pyaw ai baw lang na malai, shanhte gaw ahpu ahkying nga manam na ra ai, tsawm ai shingkyit ni a malai, shanhte gaw ahtat awat re ai sumri ni kyit ra na mara ai; tsawm htap ai kara a malai, shanhte gaw abaw shakrin kau hkrum na mara ai; kaja ai bu hpun palawng ni a malai, shanhte gaw tsupni ni hpun ra na mara ai; shanhte a tsawm htap ai gaw kaya kahpa tai mat na mara ai!

²⁵Mare salang ni e, rai sa, n-gun ja htum ai ni pyi majan hta sat kau ai hkrum na mara ai.

²⁶Mare chyinghka ni gaw sharung shayawt ai hte hkrap na mara ai, mare dai nan gaw singgu krin raw sharun kau nna ga ntsa e dung nga ai numsha langai zawn tai mat na ra ai.