Read Jinghpaw Common Language Bible 2009 ESAIA 30 Bible Online

ESAIA 30 - Jinghpaw Common Language Bible 2009 bible

ESAIA 30

¹Dai MADU gaw ning nga tsun nu ai: “Yuda mung hpe up ai ni gaw dingnye hkrum ma ai, hpa majaw nga yang shanhte ngai hpe gumlau ma ai. Shanhte gaw ngai n hpajang lawm ai maw mawn lam ni hta hkan ma ai, nye a myit ra ai hte nhtan shai ai ga shaka ni hpe myit hkrum ta masat galaw let yubak kahtap kala galaw ma ai.

²Shanhte gaw ngai kaw hpaji n hpyi ai sha, karum la lam a matu Egutu mung de sa ma ai. Shanhte gaw shanhte hpe makawp maga la na matu Egutu hpe ra marit nga ma ai, dai rai nna shanhte gaw Egutu hkawhkam wa hpe kam hpa nga ma ai.

³Rai ti mung, shanhte hpe karum la na matu hkawhkam wa hta daru magam n-gun n rawng mat na ra ai, Egutu a makawp maga lam gaw ru yak tsin-yam tsindam kata hta htum mat na ra ai.

⁴Shanhte a dat kasa ni Egutu mung na Zoan hte Hanet mare ni de du nga masai rai tim,

⁵Yuda amyu masha ni gaw karum la lam a matu shanhte myit mada nga ma yang, shanhte galoi mung akam nga ai amyu baw gaw n mai kam hpa sai, shanhte hpe karum la na lam n jaw lu sai amyu baw rai nga sai majaw lahpawt dum wa na mara ai.”

⁶Ndai gaw dingda nam mali e nga ai dusat ni hte seng ai Karai Kasang a mungga rai nga ai: “Dat kasa ni gaw hkanghkyi ni, atuk rawng ai lapu ni hte pyen ai baren ni nga nga ai dai hkrit tsang ra ai mungdan hku ga lai mat wa ma ai. Shanhte gaw shanhte a lawze ni hte gawla-uk ni hta manu dan ai kumhpa ni mara nna, shanhte hpe loi mi pyi n karum ya lu ai amyu baw ni a matu htaw sa ma ai.

⁷Egutu jaw ai karum la lam gaw kaman lila rai nga ai. Dai rai nna ngai gaw Egutu mung hpe, ‘Atuk N Rawng Ai Baren,’ ngu nna shamying na we ai.”

⁸Karai Kasang gaw ngai hpe ndai amyu masha ni hpa hte bung nga ai lam laika buk langai hta ka da na matu tsun wu ai, shaloi dai gaw shanhte kade wa n hkru nga ai a dinggrin matsing da lam tai na ra ai.

⁹Shanhte gaw Karai Kasang hpe tut nawng gumlau ma ai, tut nawng masu magaw ma ai, dai MADU a sharin shaga ga ni hpe madat na matu tut nawng ningdang nga ma ai.

¹⁰Shanhte ni gaw myihtoi ni hpe atsin sha nga na matu tsun ma ai. Shanhte gaw, “Teng man ai amu anhte hpe hkum tsun dan mi. Anhte na mayu ai hpe sha tsun mu. Anhte a n teng n man ai ga ni hpe atsun na ga ai.

¹¹Anhte a lam kaw na yen mu, anhte a lai lam hkum pat myit. Anhte gaw nanhte a Israela a chyoi pra ai Karai Kasang hte seng ai lam n na mayu ga ai.

¹²Rai ti mung, ndai gaw Israela a chyoi pra ai Karai Kasang tsun ai ga rai nga ai: “Nanhte gaw ngai nanhte hpe tsun ai ga hpe hpa n nawn ya myit dai, nanhte gaw kashun kashe du daw sai hkaw amu hte masu magaw amu hta myit manoi nga myit dai.

¹³Nanhte gaw mara kap nga myit dai. Nanhte gaw ga kaprang yu wa ai tsaw ai mare bunghku hte bung nga myit dai; nanhte gaw akajawng sha agrawp daw mat na marin dai.

¹⁴Nanhte gaw ga di bu langai zawn ga gamang mat na marin dai, shing rai laja lana ga mat ai majaw, wan n-ga hta na matu mung, ntsin ja na matu mung lang ram na di hkyep pyi ngam nga na ra ai n rai.”

¹⁵Tsaw Htum ai dai MADU Israela a Chyoi Pra ai Wa gaw shi a amyu masha ni hpe, “Nhtang wa nna ngai hpe atsin sha kam hpa mu. Dai hpang nanhte gaw n-gun ja wa nna shim lum lam lu na rai myit dai,” ngu nna tsun ai. Rai ti mung nanhte gaw dai hku hkan galaw na ningdang nga myit dai.

¹⁶Shing rai na malai, Nanhte gaw gumlau hpyen ni a lata kaw na hprawng lawt lu na matu laram ai gumra ni jawn na she yaw myit dai. Hprawng lawt na matu nanhte lajang ai gaw jaw nga ai! Nanhte gaw nanhte a gumra ni laram nga ai ngu myit nawn la nga myit dai, rai ti mung nanhte hpe hkan shachyut ai ni gaw grau nna lawan na mara ai!

¹⁷Nanhte gumlau hpyenla langai mu ai shaloi, nanhte a masha hkying mi hprawng te mat wa na mara ai, hpyenla manga hte nanhte a masha yawng hpe jahtaw kau na matu ram na ra ai. Kawng pungding ntsa e dawnghkawn hta lai nna nanhte a hpyen luksuk hta hpa mung ngam nga na ra ai n rai.

¹⁸Ti mung, dai MADU gaw nanhte hpe matsan dum la na matu ala nga ai. Shi gaw teng man ai amu tut nawng galaw ai majaw, nanhte hpe matsan dum la na matu jin jin rai nga ai. Dai MADU hpe kam hpa ai ni gaw a nga ai.

¹⁹Yerusalem hta shanu nga ai amyu masha ni, nanhte gaw galoi mung hkrap sana n rai. Dai MADU gaw matsan chye dum ai wa rai nga ai, nanhte shi kaw karum la na matu jahtau ai shaloi, shi nanhte hpe htan ya na ra ai.

²⁰Dai Madu gaw nanhte hpe nni nkri hkrum shangun nga ai, rai ti mung shi nan dai shara hta nanhte hpe sharin achyin ya na matu nga nga na ra ai, nanhte gaw shi hpe loi mi mung hkan tam la ra na ra ai n rai.

²¹Nanhte gaw hkra de, pai de lam yit wa ai rai yang, nanhte a shingdu e, “Ndai gaw lam rai nga ai, de a hpang hkan mu,” ngu nna shaga ai shi a nsen hpe na lu na rai myit dai.

²²Nanhte gaw gumhpraw hte sup ai hpara sumla ni hte ja hte sup ai hpara sumla ni hpe la nna matsat shabat arai zawn dai ni hpe kabai kau nna, “Nye a man kaw na pru mat wa mu!,” ngu nna jahtau tsun na rai myit dai.

²³Nanhte gaw nanhte a nsi naisi ni hpe hkai ai aten shagu, Madu gaw dai ni hpe tu shangun na matu marang jahtu ya nna nanhte hpe ja kat ai mangai jaw ya na ra ai, nanhte a yam nga hpung gaw udat shara law law madu lu na mara ai.

²⁴Nanhte a yi hkauna galau ya nga ai dumsu ni hte lawze ni gaw tsawm htum ai hte kaja htum ai ushat sha lu na mara ai.

²⁵Nanhte a gumlau hpyen ni a hpyen dap ni run hkrum nna shanhte a masha ni sat kau hkrum ai shani hta, bum shagu hte kawng shagu de na hka shi ni lwi pru wa na mara ai.

²⁶Shata gaw ajan zawn htoi tu wa na ra ai, jan a nhtoi gaw mi na hta htam sanit grau htoi wa nna sanit ya na nhtoi gaw kalang mi htoi ai n-gun zawn tai na ra ai. Dai MADU gaw shi a amyu masha ni hpe shakap da ya sai nma ni hpe ahkyen kayawp nna shamai shatsai ya ai shaloi ndai lam byin wa na ra ai.

²⁷Dai MADU a daru magam n-gun hte hpung shingkang hpe sumtsan shara hta mu lu nga ai. Wan hte wan hkut gaw shi a masin kahtet ai hpe madun dan nga ai. Shi ga shaga ai, shi shaga ai ga ni gaw wan zawn hkru nga ai.

²⁸Shi gaw arai yawng mayawng hpe agre shayawng kau dat ai mawru hka hpungla zawn shi a man e nbung hpe dat dat nga ai. Dai gaw masha amyu baw ni hpe hten byak lam de ye magawn mat wa nna shanhte a n hkru n shawp ai maw mawn lam ni hpe jahtum kau ya na ra ai.

²⁹Rai ti mung, Karai Kasang a amyu masha ni e, nanhte gaw chyoi pra ai lusha poi hpe shana e galaw ai zawn, kabu gara ai hte mahkawn mangoi lu na rai myit dai. Nanhte gaw Israela a lunghkrung ngu ai dai MADU a Htingnu de sumpyi dum let shanhte hkawm lung wa ai zawn kabu gara na rai myit dai.

³⁰Dai MADU gaw shi a daru magam nsen hpe masha shagu hpe na la shangun nna, shi a masin kahtet ai n-gun hpe hkam sha shangun na ra ai. Dai shara hta wan hkru ai, marang kaba htu ai, sin marang hkrat ai, hte marang hka hpungtun ni hte hpring na ra ai.

³¹Asuri masha ni gaw dai MADU a nsen hpe na ai shaloi hkrit gari wa nna shi a ari jaw ai n-gun hpe hkam sha wa na mara ai.

³²Dai MADU gaw shanhte hpe lang hte lang hkawn hte kayat nga ai, shi a amyu masha ni gaw chying bau, shup sheng, tingse mahku ni hte aten shagu ngoi na mara ai. Karai Kasang shi nan Asuri masha ni hpe gasat na ra ai.

³³Moi chyaloi nhkoi kaw nna Asuri hkawseng hpe nat na matu wan htung kaba shara mi hkyen da nga ai. Dai gaw sung ai hte dam lada rai nna hpun ni hte sumpum shatsaw da nga ai. Dai MADU gaw dai shara hta wan shachyi na matu wan shinglet gawut bang dat na ra ai.