Read Jinghpaw Common Language Bible 2009 ESAIA 40 Bible Online

ESAIA 40 - Jinghpaw Common Language Bible 2009 bible

ESAIA 40

¹Anhte a Karai Kasang gaw, “Nye a amyu masha ni hpe shalan shabran mu, shanhte hpe shalan shabran mu!

²Yerusalem amyu masha ni hpe n-gun jaw mu. Shanhte aten galu mi hkrum sha lai wa sai nni nkri hte ya raw dat hkrum sai shanhte a yubak mara ni a lam shanhte hpe tsun dan mu. Ngai gaw shanhte hpe shanhte galaw ai yubak mara yawng a matu hpring tup hkra ari jaw ni ai,” ngu nna tsun ai.

³Nsen langai gaw, “Dai MADU a matu nam mali e lam lajang mu! Anhte a Karai Kasang a matu zaibru jang e lam jasan jaseng mu!

⁴Kadit shagu hpe jahpring mu; bum shagu hpe shara mu. Kawng ni gaw pa layang tai mat nna rawk marak re ai mungdan gaw pri tsawm mat na ra ai.

⁵Dai hpang dai MADU a hpung shingkang gaw dan dawng wa nna, amyu masha ni yawng dai hpe mu na mara ai. Dai MADU gaw shi nan ndai amu hpe ga sadi jaw nu ai,” ngu nna ja ja jahtau tsun nga ai.

⁶Nsen langai gaw, “Mungga htawn tsun mu!,” ngu nna tsun yang, Ngai gaw, “Hpa baw mungga ngai htawn tsun na rai ta?,” ngu nna san we ai. “Shinggyim masha yawng hte gaw tsingdu hte bung nna; shanhte gaw nam nampan ni hta grau jan nna grin nga lu ai n rai.

⁷Dai MADU gaw dai ni a ntsa e nbung ahpawt dat ai shaloi, tsingdu ni nyui mat nna nampan ni run mat nga ai. Amyu masha ni gaw tsingdu hta grau nna n grin nga ai.

⁸Rai sa, tsingdu ni nyui mat nna nampan ni run mat nga ai, rai ti mung anhte a Karai Kasang a mungga gaw htani htana agrin nga ai,” ngu nna htawn tsun u.

⁹Yerusalem e, tsaw ai bum ntsa de lung nna kabu gara shiga htawn tsun u! Ziun e, ja ai nsen hte shaga nna, kabu gara shiga ndau shabra u! Dai hpe jahtau tsun u, hkum hkrit nga et. Shanhte a Karai Kasang du sa wa nga ai ngu, Yuda mare ni hpe tsun mu!

¹⁰Tsaw Htum ai dai MADU gaw daru magam n-gun hte up hkang na du sa nga ai, shi hkye mawai la sai amyu masha ni gaw shi hte rau woi sa wa nga ai.

¹¹Shi gaw sagu rem ai wa zawn shi a sagu hpung hpe lanu lahku na ra ai; shi gaw sagu kasha ni hpe shinggyin la nna dai ni hpe shi a lata lahpum hta pawn da na ra ai; shi gaw dai ni a kanu ni hpe angwi sha woi sa na ra ai.

¹²Nammukdara hpe lata latup mi hte kadai shadawn lu a ta? Sumsing lamu hpe shi a lata hte kadai shadawn lu a ta? Ginding aga a ga sau hpe gawm hta bang nna kadai lang lu a ta? Bum ni hte kawng ni hpe joi jang hta bang nna kadai shen lu a ta?

¹³Dai MADU gaw hpa baw amu galaw na lam hpe kadai tsun lu a ta? Shi hpe kadai sharin lu, shi hpe kadai hpaji jaw lu a ta?

¹⁴Karai Kasang gaw kaning re ai arai ni hpe kaning rai galaw ang na lam chye na na matu mung, hkawn hkrang na matu mung, sharin la na matu mung kadai hte bawng ban jahkrup ra nga a ta?

¹⁵Masha amyu baw ni gaw dai MADU a matu kaman lila rai nga ai, dai ni gaw hka kahte mi hta pyi grau ma ai n rai; sumtsan ga na zunlawng ni gaw ga nhpu zawn tsang nga ai.

¹⁶Lebanon nam maling hkan nga ai dusat yawng hte gaw anhte a Karai Kasang a matu hkungga nawng ya na law ram nga ai n rai, maling hpun ni mung wan ju na matu nau nan n law nga ai.

¹⁷Masha amyu baw ni gaw shi a matu kaman be be rai ma ai.

¹⁸Karai Kasang hpe kadai hte shadawn lu a ta? Shi gaw kadai hte bung nga ai lam nang kaning rai tsun dan lu na n ta?

¹⁹Shi gaw masha e tawk galaw nna, janghkam wa aja hte sup nhtawm gumhpraw hte mawn sumli da ai hpara sumla langai hte bung ai n rai.

²⁰Aja gumhpraw n dang di lu ai wa kadai mung tsam mat n chye ai hpun lata la nga ai. Shi gaw n kadawng mat ai gawkngu sumla galaw na matu kung kyang ai lasama langai tam nga ai.

²¹Nang n chye n ni? Moi chyaloi nhkoi kaw nna nang hpe n tsun dan yu a ni? Mungkan ga gara hku lat hpang wa ai hpe nang n na yu n ni?

²²Dai gaw mungkan ga ntsa tsang, lamu madin a ntsa e shi a tingnyang hta dung nga ai wa shabyin dat nga ai; de a npu e nga ai amyu masha ni hpe kaji la ai kagyin ni hpe zawn yu nga ai. Shi gaw sumsing lamu hpe sumpan grang zawn kahpyan da nga ai, shanu nga na matu sum langai zawn kahpyan da nga ai.

²³Shi gaw daru magam rawng ai mung du ni hpe shayu kau nhtawm shanhte hpe kaman lila de shagrit kau nga ai.

²⁴Shanhte gaw gat hkai nna ru garai n jung ai aten na hkai bawng ni zawn rai ma ai. Dai MADU gaw nbung hpe dat dat ai shaloi, dai ni hkraw mat ai hte yihku zawn shapoi kau ai hkrum nga ma ai.

²⁵Chyoi pra ai Karai Kasang hpe kadai hte shadawn lu a ta? Shi hte bung ai wa mi nga nga a ni?

²⁶Sumsing lamu de mada yu mu! Nanhte mu ai shagan ni hpe kadai hpan da a ni? Hpyen luksuk hpe zawn lam woi ai wa gaw dai yang e kade nga nga ai hpe shi chye ai hte dai ni langai hte langai hpe amying shaga lu nga ai! Shi a daru magam n-gun gaw grai galu kaba nga ai- dai ni hta na langai mi gaw galoi mung yet lu na n rai.

²⁷Israela e, dai MADU gaw na a tsin-yam tsindam hpe n chye nga ai nga nna, nang hpa majaw aput angun nga n ni? Nang gaw n teng n man ai tara a nni nkri hpe hkam sha yang shi nang hpe n yu ai ngu hpa majaw tsun nga n ta?

²⁸Nang n chye n ni? Nang n na yu n ni? Dai MADU gaw tut nawng agrin nga ai Karai Kasang rai nga ai; shi gaw mungkan ga yawng hpe hpan da nga ai. Shi gaw galoi mung gawng run ai n rai, hki ba ai n rai. Kadai mung shi a myit mang ai lam ni hpe n chye lu nga ai.

²⁹Shi gaw n-gun yawm ai ni hte hki ba ai ni hpe n-gun shajat ya nga ai.

³⁰Brang ji ni pyi n-gun yawm nna; wa-ngan shabrang ni hki ba ai hte kataw lu nga ma ai.

³¹Rai ti mung karum la na matu dai MADU hpe kam hpa ai ni gaw shanhte a n-gun atsam ningnan mu tam la na mara ai. Shanhte gaw galang ni zawn singkaw nnan ni hte pyen lung na mara ai; shanhte gaw gat ti mung hki ba na n rai; shanhte gaw hkawm ti mung n-gun kya na ma ai n rai.