Read Jinghpaw Common Language Bible 2009 ESAIA 41 Bible Online

ESAIA 41 - Jinghpaw Common Language Bible 2009 bible

ESAIA 41

¹Karai Kasang gaw, “Sumtsan mungdan ni e, Atsin sha nga nna nye a ga madat mu! Tara rung hta na a amu shawn na matu shajin da u; nang gaw ga shaga lu na ahkaw ahkang lu na ra ai. Kadai wa teng man nga ai hpe daw dan ya na matu rau sa wa ga.

²“Sinpraw mung kaw na awng padang lu ai wa hpe kadai sharawt tawn nna, shi du hkawm ai shara shagu hta shi hpe awng padang kadai jaw ya nga a ta? Hkawhkam ni hte masha amyu baw ni a ntsa e awng dang na ahkang shi hpe kadai jaw a ta? Shi a nhtu shanhte hpe ga nhpu hpe zawn kahtam kau nga ai. Shi a ndan pala ni gaw nbung bungsha hta yihku poi lawm ai zawn shanhte hpe shabra kau na ra ai.

³Shi gaw shanhte hpe hkan shachyut ai hte shim lum ai hku rawt hkawm sa lu nga ai, shi gaw ga ntsa e grai chyang ai hte kabye lai mat wa nga ai.

⁴Ndai zawn re ai hpe shabyin dat ai wa gaw kadai rai nga a ta? Masha ban hte ban a labau hpe kadai gawn dan a ta? Dai MADU ngai gaw shawng npawt e nga nga nngai, Dai MADU ngai gaw ahpang jahtum e mung nga nga na nngai.

⁵“Sumtsan mung na masha ni gaw ngai galaw sai amu ni hpe mu manu ai; shanhte gaw kajawng ai hte hkrit gari nga ma ai. Dai rai nna shanhte yawng zup hpawng nna sa wa ma ai.

⁶Lata hpaji kung kyang ai ni gaw shada karum nna n-gun jaw hkat ma ai.

⁷Lasama gaw ja janghkam wa hpe, ‘Ara rai sa!’ ngu nna tsun nga ai. Hpara sumla hpe tawk shatsawm ai wa gaw dai sumla hta hpri dit shakap ai wa hpe n-gun jaw nga ai. Shanhte gaw, ‘Namsan gaw kaja nga ai,’ ngu nna tsun ma ai. Shanhte gaw dai hpara sumla hpe manu ai shara hta hpri hte ngang ngang dit shakap nga ma ai.

⁸Rai ti mung, nang nye a shangun ma Israela e, nanhte gaw ngai lata la sai amyu masha ni rai nga myit dai; nanhte gaw nye a jinghku Abraham a aru arat ni rai nga myit dai.

⁹Ngai gaw nang hpe ginding aga a jahtum kaw na woi la nngai; Ngai gaw nang hpe tsan htum ai jut shara ni kaw na shaga la nna nang hpe, ‘Nang gaw nye a shangun ma rai ndai,’ ngu nna tsun sai. Ngai nang hpe ningdang kau ai n rai, nang hpe lata la ni ai.

¹⁰Hkum hkrit et-Ngai nang hte rau rai nga nngai! Ngai gaw na a Karai Kasang rai nga nngai-nang hpe hpa mung n jahkrit shama u ga! Ngai gaw nang hpe n-gun shaja ya ai hte karum la na nngai; Ngai gaw nang hpe makawp maga ai hte hkye la na nngai.

¹¹“Nang hpe pawt sindawng ai ni gaw hkrat sum ai a kaya kahpa lam hpe chye wa na mara ai. Nang hpe gasat ai ni si mat na mara ai

¹²ginding aga ntsa kaw na shanhte hkoi mat na mara ai.

¹³Ngai gaw dai MADU na a Karai Kasang rai nga nngai; Ngai gaw nang hpe n-gun jaw nna nang hpe, ‘Hkum hkrit et; ngai nang hpe karum na nngai,’ ngu nna tsun nngai.

¹⁴Dai MADU gaw, “Israela e, nang gaw kaji ai hte n-gun kya nga ndai, hkum hkrit et, ngai nang hpe karum na nngai. Israela a chyoi pra ai Karai Kasang Ngai gaw nang hpe hkye la ai wa rai nga nngai.

¹⁵Ngai gaw nang hpe awa rawng ai mam dup gawng nnan zawn shatai na we ai. Nang gaw bum ni hpe adup nna dai ni hpe jahten kau na ndai; kawng ni ga nhpu de ayai taw mat na ra ai.

¹⁶Nang gaw dai ni hpe nbung hta katsap kau na rin dai; nbung gaw dai ni hpe ahpawt mat wa na ra ai, dai ni gaw nbung laru hte shabra kau hkrum na mara ai. Dai hpang nang kabu gara lu na ndai hpa majaw nga yang, ngai gaw na a Karai Kasang rai nga nngai; nang gaw chyoi pra ai Israela a Karai Kasang ngai hpe shakawn kungdawn na ra ai.

¹⁷“Nye a amyu masha ni hka ntsin tam la na ra ai aten hta mung, shanhte a yuhkraw ni hpang gara nna hkraw wa ai shaloi mung, dai MADU ngai nan shanhte a akyu hpyi ga hpe htan ya na nngai; Israela a Karai Kasang ngai gaw shanhte hpe galoi mung kau da na nngai n rai.

¹⁸Ngai gaw krin ai kawng ni a lapran e hka nu ni hpe shalwi dat nna kadit ni hta hka hpawk ni hpe jahpaw ya na nngai. Ngai gaw zaibru jang hpe hka la-ing shatai nna, hkun hkraw ai lamu ga hpe hka hpawk lwi shangun na nngai.

¹⁹Ngai gaw nam mali hta arit hpun shaji hpun, maihting hpun hte tsanlun hpun ni hpe shatut na nngai. Nam maling ni gaw akrin akraw re ai lamu ga hta tu wa nna marau maling, shinglim hpun maling hte chyamka hpun maling ni tai wa na ra ai.

²⁰Amyu masha ni ndai amu hpe mu nna dai MADU ngai nan dai amu galaw ni ai hpe chye wa na mara ai. Shanhte gaw dai Israela a chyoi pra ai Karai Kasang gaw dai amu shabyin nu ai lam hpe chye na wa na mara ai.”

²¹Dai MADU Israela a hkawhkam gaw ning ngu tsun nu ai: “Masha amyu baw ni a karai ni e, nanhte a amu madun mu. Nanhte lu ai kaja htum ai sakse arai ni shawn mu!

²²Ndai de sa nna hpa byin wa na lam tau tsun yu mu, shaloi anhte gaw dai amu galoi byin wa na hpe chye lu na ga ai. Lai sai aten na mabyin lam ni hpe tara rung de tsun shaleng dan mu, shanhte kaning rai lachyum shapraw ai lam anhte hpe tsun dan mi.

²³Du na ra ai aten hta byin magang wa na lam ni anhte hpe tsun dan mi- dai hpang nanhte karai ni rai nga myit dai hpe anhte chye lu na ga ai! Kaja ai amu lama mi galaw mu, shing n rai tsin-yam tsindam shabyin dat mu; anhte hpe hkrit ai myit hte hkrit kamyin ai myit jahpring ya mi!

²⁴Nang hte nanhte yawng galaw ai amu gaw kaman lila rai nga ai; nang hpe nawku ai ni mung matsat shabat rai nga a hka!

²⁵“Ngai gaw sinpraw maga de nga ai masha langai mi hpe lata la ni ai; ngai gaw shi hpe dingdung maga de nna gasat na matu woi la na nngai. Shi gaw mung du ni hpe hkumpup zawn, di bu sama wa kagam ga hpe kabye gumchya ai zawn kabye anut nga ai.

²⁶Nang jaw nga ndai ngu anhte chye lu hkra, ndai lam byin wa na re ngu nna nanhte kadai mahtang tau tsun da yu mtit ni? Dai hte seng ai ga hkum mi pyi nanhte hta na kadai mung n tsun nga ai; nang tsun ai lama mi hpe mung kadai n na yu ma ai!

²⁷Dai MADU ngai gaw Ziun a shiga hpe shawng tsun dan ai wa rai ni ai; Ngai gaw Yerusalem hpe ning ngu tsun na matu kasa dat ni ai: ‘Na amyu masha ni gaw du wa na mara ai! Shanhte gaw dum nta de du wa mara ai!’

²⁸Ngai gaw karai ni hpe mada yu ai shaloi, shanhte hta na lama mi tsun dan lu ai mi kadai n nga; ngai san ai ga san ni hpe langai mi mung n htan lu nga ai.

²⁹Ndai karai ni yawng kaman lila ni rai nga ma ai; shanhte gaw kaja wa hpa n lu galaw ma ai- ndai hpara sumla ni gaw n-gun kya ai hte daru magam n-gun n rawng nga ma ai.”