Read Jinghpaw Common Language Bible 2009 ESAIA 43 Bible Online

ESAIA 43 - Jinghpaw Common Language Bible 2009 bible

ESAIA 43

¹Israela e, nang hpe hpan da sai dai MADU gaw, “Hkum hkrit et-ngai nang hpe hkye la na nngai. Na a mying hte ngai nang hpe shaga ni ai-nang gaw nye a rai nga ndai.

²Sung ai hka hku nang rap wa ai shaloi, ngai nang hte rau rai nga na nngai; na a ru yak tsin-yam tsindam ni nang hpe ka-up kau na ra ai n rai. Nang gaw wan hku kabye lai wa ai shaloi, hkru na ndai n rai; dai laja lana re ai chyam dinglik ai gaw nang hpe machyi hkra na ra ai n rai.

³Ngai gaw dai MADU na a Karai Kasang, Israela a chyoi pra ai Karai Kasang, nang hpe hkye la ai wa rai nga nngai. Dai majaw nang hpe shalawt dat na matu, Egutu mung hpe mung, Ehtiopi mung hpe mung, Seba mung hpe mung ngai jaw na nngai.

⁴Nang gaw nye a matu hpu ging nga ndai; ngai nang hpe tsaw ra ai hte nang hpe shagrau sha-a nngai majaw, na a asak hkye la na matu, masha amyu baw ting hpe ngai ap ya na nngai.

⁵Hkum hkrit nga et-ngai nang hte rau nga nga nngai! “Tsan ai sinpraw maga hte tsan gang nga ai sinna maga de na, na a amyu masha ni hpe dum nta de ngai woi wa na nngai.

⁶Shanhte hpe wa shangun na matu dingdung maga de ngai tsun na nngai; shanhte hpe n shingdang lu na matu dingda maga de tsun na nngai. Nye a amyu masha ni tsan ai mung ni kaw na nhtang wa mu ga, mungkan jut shara shagu kaw na nhtang wa mu ga.

⁷Shanhte gaw nye a amyu masha ni nan rai nga ma ai, nye a hpung shingkang a matu ngai shanhte hpe hpan da ni ai,” ngu nna tsun ai.

⁸Karai Kasang gaw, “Nye a amyu masha ni hpe tara rung de shaga dat mu. Shanhte gaw myi tu ti mung myi n mu ma ai; shanhte gaw na tu ti mung na lahpang ma ai.

⁹Tara jeyang hkam na matu masha amyu baw ni hpe shaga dat mu. Shanhte a karai ni hta na gara mahtang du na ra ai aten a lam hpe tau tsun lu a ta? Shanhte hta na kadai mahtang ya hpa byin nga ai lam hpe tau tsun da nga sani? Ndai karai ni gaw shanhte teng man nga ai lam sakse madun na matu mung, shanhte tsun ai ga a teng man ai lam hpe sakse hkam na matu shanhte a sakse ga ni hpe shapraw mu ga.

¹⁰“Israela amyu masha ni e, nanhte gaw nye a sakse ni rai nga myit dai; Nye a shangun ma tai na matu nang hpe ngai lata la nngai, Shaloi ngai chyu sha Karai Kasang rai nga nngai hpe nang chye wa nna ngai hpe kam sham ai hte chye na wa na rai ndai. Ngai hta lai, kaga karai shaje n nga nga ai; dai gaw moi prat e mung, du na ra ai prat hta mung galoi mung nga na n rai.

¹¹“Ngai chyu sha dai MADU rai nga nngai, ngai chyu sha nang hpe hkye la lu ai wa rai nga nngai.

¹²Ngai gaw hpa byin na lam hpe tau tsun nngai, dai hpang nang hpe karum la nngai. Maigan karai kadai mung ndai amu galoi mung galaw yu ai n rai; nanhte gaw nye a sakse ni rai nga myit dai.

¹³Ngai gaw Karai Kasang rai nga nngai, tut nawng arai nga na nngai. Kadai mung nye a daru magam n-gun kata kaw na lawt lu ai n rai; kadai mung ngai galaw ai amu hpe galai lu nga ai n rai,” ngu nna tsun ai.

¹⁴Nang hpe hkye la ai dai MADU Israela a chyoi pra ai Karai Kasang gaw, “Nang hpe hkye la na matu, Babelon mung hpe ninghkap lu ai hpyen luksuk langai ngai shangun dat na nngai; Ngai gaw mare chyinghka ni hpe run kau na we ai, dai mung na masha ni a jahtau garu ai nsen hpe hkrap agru ai nsen shatai kau na we ai.

¹⁵Ngai gaw dai MADU na a chyoi pra ai Karai Kasang rai nga nngai. Israela e, Ngai gaw nang hpe hpan da nngai, ngai gaw na a hkawhkam rai nga nngai,” ngu nna tsun ai.

¹⁶Dai MADU gaw moi de, panglai hku nmaw lam waw nna, hka duwai hku lam hpaw ya nu ai.

¹⁷Shi gaw n-gun ja ai hpyen luksuk hpe woi nna jahten sharun kau na matu, hpyen leng ni hte gumra luksuk hpung mi hpe woi awn nga ai. Shanhte yawng kadawng taw nna, galoi mung n rawt lu masai, wan kawk hta shachyi ai wan shinglet hpe zawn sat shamyit kau nga ai.

¹⁸Rai ti mung dai MADU gaw, “Lai sai aten na lam ni hpe hkum myit noi nga masa, moi chyaloi nhkoi na mabyin lam ni hta hkum myit shanu nga masa.

¹⁹Ngai galaw sa wa na amu nnan hpe sin yu mu. Dai gaw byin nga masai majaw dai amu hpe ya mu lu nga ndai! Ngai gaw nam mali hku nmaw lam waw na nngai, dai yang e nang hpe hka shi ni jaw na we ai.

²⁰Zaibru jang hta hka nu ni hpe shalwi dat nna lata la hkrum ai nye a amyu masha ni hpe hka jaw ai shaloi, matse labye dusat ni pyi ngai hpe shagrau sha-a nna gwi ma-a ni hte gawla-uk u ni ngai hpe shakawn kungdawn na mara ai.

²¹Shanhte gaw nye a matu ngai lata san da ai amyu masha ni rai ma ai, shanhte gaw nye a shakawn kungdawn ga ni hpe mahkawn na mara ai!,” ngu nna tsun ai.

²²Dai MADU gaw, “Rai ti mung Israela e, nang nye a lam hki ba mat nit dai; nang gaw ngai hpe nawku ndai n rai.

²³Nang gaw na a sagu wan nat hkungga ni hpe ngai kaw n la sa nga ndai; nang gaw shagu hkungga ni hte ngai hpe n shagrau sha-a nga ndai. Ngai gaw nang hpe shagu hkungga hpyi ai hku nna lit shali ai n rai; manam pyaw ai baw hpyi ai hku nna nang hpe hki ba shangun ai n rai.

²⁴Nang gaw nye a matu manam pyaw ai baw n mari ndai, na a yam nga ni a sau hte ngai hpe myit shadik ya ai n rai. Shing rai na malai, nang gaw na a yubak ni hte ngai hpe lit shali nna; shut hpyit ai amu ni galaw let ngai hpe hki ba shangun nga ndai.

²⁵Rai tim, Ngai gaw na a yubak mara ni hpe raw dat ya ai Karai Kasang rai nga nngai, ngai rai nga nngai majaw ndai amu hpe ngai galaw nngai. Ngai gaw na a yubak ni hpe dum nga na nngai n rai.

²⁶“Tara rung de sa ga; na a mara shagun ai lam jashawn u! Nang teng man nga ndai hpe sakse madun na matu na a amu jashawn u!

²⁷Na a shawng na nji nwa gaw yubak galaw sai; na a ningbaw ni ngai hpe shut hpyit nga masai.

²⁸na a mung up hkang du ni nye a chyoi pra ai shara hpe awu asin di ma ai. Dai rai nna, ngai gaw Israela a ntsa e jahten sharun ai amu du shangun nngai; ngai gaw nye a amyu masha ni hpe n kaw n law hkrum sha shangun we ai,” ngu nna tsun ai.