Read Jinghpaw Common Language Bible 2009 ESAIA 44 Bible Online

ESAIA 44 - Jinghpaw Common Language Bible 2009 bible

ESAIA 44

¹Dai MADU gaw, “Nye a shangun ma, Israela, ngai lata la sai nye a amyu masha, Yaku a aru arat ni e, ya chyawm gaw, nye a ga madat mu.

²Ngai gaw nang hpe hpan da ai dai MADU rai nga nngai; nang shangai wa ai aten kaw nna, ngai nang hpe karum ni ai. Hkum hkrit et; nang gaw nye a shangun ma rai nga ndai, ngai tsaw ra ai hte lata la hkrum ai nye a amyu masha ni rai nga myit dai.

³“Ngai gaw hpang gara ai lamu ga hpe ntsin jaw na nngai; hkun hkraw ai lamu ga ntsa e hka shi ni hpe shalwi dat na nngai. Ngai gaw nanhte a kashu kasha ni a ntsa de nye a wenyi ru bun na nngai; na a aru arat ni a ntsa de nye a shaman chyeju ru jaw na nngai.

⁴Shanhte gaw hka hkru ai tsingdu ni hte lwi hkrat wa ai hka shi makau hkan tu ai u byap hpun ni zawn bawngring wa na mara ai.

⁵“Amyu masha ni gaw langai hpang langai, ‘Ngai gaw dai MADU a masha rai nga nngai,’ nga nna tsun wa na mara ai. Shanhte gaw Israela amyu masha ni hte matut mahkai na matu du sa wa na mara ai. Shanhte gaw shanhte a lahpum ni hta dai MADU a amying hpe matsing nna, shi hkum shi Karai Kasang a amyu masha langai hku shamying la na ra ai.”

⁶Israela hpe up nna makawp maga nga ai dai MADU Chyahtum Chyalai N-gun rawng ai dai MADU gaw ning ngu tsun nga ai: “Ngai gaw shawng ningshawng wa hte ahpang jahtum ngu ai Karai Kasang rai nga nngai; ngai hta lai karai shaje n nga nga ai.

⁷Ngai galaw ai amu hpe kadai wa lu galaw nga a ta? Shawng npawt kaw nna hpang jahtum aten du hkra byin nga sai lam yawng hpe kadai wa tau tsun lu nga a ta?

⁸Nye a amyu masha ni e, hkum hkrit myit! Moi prat kaw nna ya du hkra na lam hpe nang chye ndai. Ngai gaw hpa byin wa sai lam hpe tau tsun da ni ai, nanhte gaw nye a sakse ni rai nga myit dai. Kaga karai shaje nga nga a ni? Ngai galoi mung n na yu ai daru magam n-gun rawng ai karai nga nga a ni?

⁹Hpara sumla tawk ai ni gaw kaman lila rai nga ma ai, shanhte manu shadan ai hte tawk da ai karai ni gaw asung n shang nga ai. Ndai karai ni hpe nawku ai ni gaw myi kyaw ai hte hpa mung n chye ma ai-shanhte gaw kaya kahpa hkrum na mara ai.

¹⁰Karai langai zawn nawku na matu, nhprang gawkngu galaw ai amu gaw mai kaja ai amu n rai.

¹¹Dai hpe nawku ai masha shagu mung shagrit kau ai hkrum na mara ai. Hpara sumla tawk ai amyu masha ni gaw shinggyim masha ni rai nga ma ai, dai hta na hpa mung n jan lu nga ai. Shanhte dinglik yu ai hkrum mu ga-shanhte gaw hkrit gari ai hkrum nna kaya kahpa hkrum sha na mara ai.

¹²Ndup wa gaw hpri daw hpri chyen ni la nna wan hta ju nhtawm, shi ra ai hkrang pru wa na matu shi a lata lahpum n-gun dat let, sumdu hte adup nga ai. Shi dai amu galaw ai shaloi, shi gaw kawsi hpang gara ai hte pu ba mat nga ai.

¹³Lasama wa gaw hpunpyen shadawn nga ai. Shi a nta nhku e tawn da na matu tsawm htap ai masha hkrang sumla tawk galaw lu hkra, ga hpraw hte sumla hkrang mahkret nhtawm, shi a lasama arung arai ni hte tawk nga ai.

¹⁴Shi lang na matu arit hpun kran ai hte wamyi hpun shing n rai maling kata na larawn hpun hpe lata la nga ai. Shi gaw pan hkrawng hpun langai hkai nna dai hpun tu kaba wa na matu marang ala nga ai.

¹⁵Masha langai wa mi gaw dai hpun daw mi hpe ju hpun shatai nna, daw mi hpe hpara sumla tawk nga ai. Bai hpun daw mi hte shi hkum hpe shalum na matu wan htung kaw wut nna muk mung kabaw nga ai; kaga daw mi hpe hpara sumla galaw nna dai hpe nawku nga ai.

¹⁶Shi gaw hpun kau chyen mi hpe wan ju nna, shan kakang ai hte dai hpe myit dik hkra sha nga ai. Shi gaw shi a hkum shalum ai hte, “Kade sha kaja ai hte lum nga a hka! Htuk ai wan rai nga a hka!,” ngu nna tsun ai.

¹⁷Naw ngam nga ai hpun daw hpe hpara sumla langai galaw nna, shi gaw dai hpe gum dagup ai hte nawku nga ai. Shi gaw dai hpe akyu hpyi let, “Nang gaw nye a karai rai nga ndai, ngai hpe hkye la rit!,” ngu nna tsun ai.

¹⁸Dai zawn re ai masha ni gaw shanhte hpa galaw nga ai amu hpe chye na na matu nau wa myit n su nga ma ai. Shanhte gaw shanhte a myi ni hpe mung, teng man ai lam hpe chye na shangun ai myit hpe mung pat da nga ma ai.

¹⁹Hpara sumla tawk ai wa gaw htauli htaula nyan hte machye machyang nyan n rawng nga ai rai nna, “Kau chyen mi hpe ngai ju kau ni ai. Wan n-ga ntsa hta ngai muk kabaw ni ai, ngai gaw ashan kakang nna sha kau nngai. Ngai gaw naw ngam ai hpun hpe hpara sumla langai tawk nngai. Ndai yang e ngai gaw hpun tawng langai hpe nawku dingnyawm nga nngai!,” ngu nna tsun ai.

²⁰Dai gaw wan dap amawp sha nga ai zawn grau kaja ai lam shadan dan na ra ai. Shi a angawk ai myit mang lam gaw karum la n lu mat hkra shi hpe lam woi shadam kau nu ai. Shi a lata hta shi lang da ai hpara sumla gaw dik dik karai n rai nga ai lam hpe shi hkum nan yin la na ra ai n rai.

²¹Dai MADU gaw, “Israela e, ndai lam hpe dum u; nang gaw nye a shangun ma rai nga ai hpe dum u. Ngai gaw nang hpe nye a shangun ma tai na matu hpan da nngai, ngai gaw nang hpe galoi mung malap kau na n rai.

²²Ngai gaw sumwi zawn na yubak ni hpe ye kau ya ni ai. Ngai hpang de nhtang wa rit; ngai gaw nang hpe hkye la ai wa rai nga nngai,” ngu tsun ai.

²³Sumsing lamu ni e, kabu gara jahtau mu! Ginding aga a sung ai shara ni e, jahtau mu! Bum ni hte nam maling na hpun shagu hte e, kabu gara jahtau mu! Dai MADU gaw shi a amyu masha ni hpe hkye la ai hku, shi a galu kaba ai hpe madun dan nu ai.

²⁴“Ngai gaw nang hpe hkye hkrang la ai dai MADU rai nga nngai; Ngai gaw nang hpe hpan da ai wa rai nngai. Ngai gaw arai yawng mayawng hpe Hpan Da Ai Wa, dai MADU rai nga nngai. Ngai chyu sha sumsing lamu ni hpe kahpyan da nngai; Ginding aga hpe ngai hpan ai shaloi, kadai mung ngai hpe n karum nga ai.

²⁵Ngai gaw gumhpan hpan ai wa a angawk ai lam ni hpe shadan dan nna, shata shagan shaba wawt ai ni a tau tsun ga ni hpe shamak ya nngai. Hpaji chye ai wa a ga ni hpe ngai jashuk ai hte shanhte a hpaji byeng-ya gaw angawk angak lam rai nga ai hpe madun dan nngai.

²⁶Rai ti mung, nye a shangun ma wa myihtoi ga tsun ai mung, nye a yaw shada lam ni shadan dan na matu kasa langai shangun dat ai shaloi mung, ngai gaw ndai yaw shada lam ni hte myihtoi ga ni hpe teng sha byin shangun nngai. Amyu masha ni Yerusalem hta bai shanu nga na lam mung, shanhte gaw Yuda mung na mare ni hpe bai de da na lam ni hpe mung ngai tsun nngai. Ndai mare ni hten run mat sai kaw na rawt wa na mara ai.

²⁷Hkang da ai ga hte maren, ngai gaw nammukdara hpe jahkyet nngai.

²⁸Ngai gaw Kuru hkawhkam wa hpe, ‘Nang gaw nye a matu up hkang ai wa tai na rin dai; ngai nang hpe galaw shangun mayu ai amu hpe nang galaw na rai ndai: Yerusalem gaw bai de da na lam mung, Nawku Htingnu a npawt nhpang ni hpe jahkrat tawn na lam hpe mung, nang tara shapraw na rai ndai,’” ngu nna tsun ai.