Read Jinghpaw Common Language Bible 2009 ESAIA 45 Bible Online

ESAIA 45 - Jinghpaw Common Language Bible 2009 bible

ESAIA 45

¹Dai MADU gaw Kuru hpe hkawhkam tai na matu lata la nu ai. Shi gaw masha amyu baw ni hpe up na matu shi hpe lit jaw nu ai; Hkawhkam ni a daru magam n-gun raw sharun ya na matu shi hpe shangun dat nga ai; dai MADU gaw shi a matu mare ni a chyinghka ni hpe hpaw malang da ya na ra ai. Dai MADU gaw Kuru hpe,

²“Ngai nan na a lam hpe hkyen lajang ya na nngai, bum ni hte kawng ni hpe shara na nngai. Ngai gaw magri mang chyinghka ni hpe agrawp kau nna, de a hpri htinggrang ni hpe kahtum kadaw di kau na nngai.

³Ngai nang hpe sin ai hte shim ai shara e makoi da ai sut gan arung arai ni jaw na de ai; dai hpang ngai gaw dai MADU rai nga nngai hte Israela a Karai Kasang gaw nang hpe amying hku shaga nu ai hpe nang chye na rin dai.

⁴Ngai lata la sai amyu masha ngu ai nye a shangun ma Israela hpe karum na matu, ngai nang hpe san da nngai. Nang ngai hpe n chye ti mung, ngai nang hpe galu kaba ai arawng sadang jaw ni ai.

⁵“Ngai gaw dai MADU rai nga nngai; karai shaje mi n nga nga ai. Nang ngai hpe n chye ti mung, nang hta ra ai n-gun lagaw ngai nang hpe jaw na de ai.

⁶Ngai ndai amu galaw ai majaw mungkan ga a jahtum maga shara mi kaw nna maga mi htum ai du hkra, nga pra nga ai masha hkum shagu hte gaw ngai nan dai MADU rai nga nngai hte karai shaje n nga ai lam hpe chye lu na mara ai.

⁷Ngai gaw nhtoi hte nsin hpe hpan nngai; Ngai gaw shaman chyeju hte tsin-yam tsindam hpe shabyin nngai. Dai MADU ngai gaw ndai amu ni yawng mayawng hpe galaw nngai.

⁸Ngai gaw marang htu ai zawn sumsing lamu kaw na awng padang jaw dat na nngai; ginding aga gaw dai hpe hkap la na matu hpaw malang na ra ai, aga gaw shanglawt ahkaw ahkang hte teng man rap ra ai tara pru wa na ra ai. Dai MADU ngai nan ndai amu hpe shabyin dat na nngai,” ngu nna tsun ai.

⁹Ga di bu gaw di bu sama wa hte, ndai di bu gaw kaga yawng hte bung nga a ni, nga nna dangrang gwi nga a ni? Kagam ga gaw di bu sama wa hpe nang hpa galaw nga n ta, ngu nna san mai nga a ni? Di bu gaw galaw ai wa hpe kung kyang ai lam n nga ai, ngu nna tsun aput mai nga a ni?

¹⁰Anhte gaw anhte a kanu kawa ni hpe, “Nanhte hpa majaw ngai hpe ndai zawn shaprat da myit ni?,” nga nna san gwi nga a ni?

¹¹Du na ra ai aten hpe hkrang shapraw ai dai MADU Israela a chyoi pra ai Karai Kasang gaw ning nga tsun ai: “Nye a kashu kasha ni hte seng nna san na ahkaw ahkang mung, ngai galaw ang ai amu ngai hpe tsun na ahkaw ahkang mung nang hta n nga nga ai!

¹²Ngai gaw ginding aga hpe gaw da ai hte dai hta nga na matu shinggyim masha ni hpe hpan da nngai. Ngai gaw nye a daru magam n-gun hte sumsing lamu ni hpe kahpyan da nngai; Ngai gaw jan, shata hte shagan ni hpe hkang nngai.

¹³Ngai nan gaw nye a yaw shada ai hpe jahpring shatsup na matu hte lam magup hpe shading sharai ya na matu mung Kuru a myit hpe shamu shamawt ya se ai. Ngai gaw shi hkawm sa na lam shagu hpe malan ya na nngai. Shi gaw nye a mare, Yerusalem hpe bai gaw gap ai hte bawng dung ai nye a amyu masha ni hpe shalawt dat na ra ai. Kadai mung shi hpe saw la na n rai, ndai amu galaw na matu shi hpe mayun kumhpa jaw na ma ai n rai.” Chyahtum Chyalai N-gun rawng ai dai MADU tsun nu ai.

¹⁴Dai MADU gaw Israela hpe, “Egutu hte Ehtiopi mung na sut gan ni gaw na a rai na ra ai, hkum shingyan galu ai Seba masha ni gaw na a mayam ni tai na mara ai; shanhte gaw nang kaw hpri sumroi gyit ai hte hkan nang na mara ai. Shanhte gaw na a man e gum dagup nna mara hpyi nem let, ‘Karai Kasang gaw nang hte rau rai nga ai, shi chyu sha Karai Kasang rai nga ai.

¹⁵Shi a amyu masha ni hpe hkye la ai Israela a Karai Kasang gaw shi hkum shi makoi nga ai Karai Kasang rai nga ai.

¹⁶Hpara sumla tawk ai ni yawng hte gaw kaya kahpa hkrum na mara ai; shanhte yawng hte gaw jahpoi jahpyak ai hkrum na mara ai.

¹⁷Rai ti mung Israela gaw dai MADU a majaw hkye hkrang la hkrum nga sai, Israela a awng padang gaw htani htana agrin nga ai; Israela a amyu masha ni gaw galoi mung kaya kahpa hkrum na ma ai n rai.’”

¹⁸Dai MADU gaw sumsing lamu ni hpe hpan da nga ai, shi gaw Karai Kasang rai nga ai! Shi gaw ginding aga hpe hkrang galaw shapraw nga ai, shi gaw dai hpe shangang ai hte shagrin da nu ai. Shi gaw dai hpe akrin akraw shara shatai ai n rai, amyu masha ni nga na shara shatai nga ai. Dai majaw shi gaw, “Ngai gaw dai MADU rai nga nngai, karai shaje kaga mi n nga nga ai.

¹⁹Ngai gaw machyi shim ai hku n tsun yu nngai, nye a yaw shada ai lam hpe makoi magap n galaw yu nngai. Katsi katsang re ai shara hta ngai hpe tam na matu, Israela amyu masha ni hpe ngai n lajin yu nngai. Ngai gaw dai MADU rai nga nngai, ngai gaw teng man ai ga hpe tsun nngai; Teng man ai amu hpe ngai chye shangun nngai.”

²⁰Dai MADU gaw, “Hkrat mat ai hkawseng mungdan hta naw ngam nga ai masha amyu baw ni e, sa hpawng marit; jep sagawn na matu nanhte nan du marit! Shanhte a hpun hpara sumla ni hte hpai madun ai ni hte shanhte hpe n hkye lu ai karai ni kaw akyu hpyi ai ndai amyu masha ni gaw hpa nan n chye nga ma hka!

²¹Tara rung hta na a amu sa shawn u; mara shut ai ni gaw shanhte shada da jahkrup hkat mu ga. Moi chyaloi nhkoi kaw nna byin mat wa sai lam ni hpe kadai tau tsun lu a ni? Shi a amyu masha ni hpe hkye la ai Karai Kasang ngu ai dai MADU ngai wa rai nga ai, n rai ni? Karai shaje n nga nga ai.

²²“Mungkan ting hta nga ai amyu masha ni e, hkye hkrang la hkrum na matu, ya jang ngai kaw kayin wa marit! Ngai chyu sha Karai Kasang rai nga nngai, Karai shaje n nga nga ai.

²³Nye a ga sadi gaw teng nga ai, dai gaw galai shai lu ai n rai. Ngai wa rai nga nngai majaw lam shagu hpe ga sadi hte dagam shaka nngai: Masha shagu gaw nye a man de sa du nna hput di di ai hte ngai hta sadi dung nga na matu dagam na mara ai.

²⁴“Shanhte gaw ngai hku nna sha awng padang hte n-gun atsam mu la nga ai; rai ti mung ngai hpe n dawng ai ni yawng gaw kaya kahpa hkrum na mara ai, nga nna tsun na mara ai.

²⁵Dai MADU ngai nan Yaku a aru arat ni yawng hpe hkye mawai la na nngai, shanhte gaw ngai hpe shakawn kungdawn wa na mara ai.