Read Jinghpaw Common Language Bible 2009 ESAIA 46 Bible Online

ESAIA 46 - Jinghpaw Common Language Bible 2009 bible

ESAIA 46

¹Ndai gaw Babelon karai ni a matu jahtum rai nga ai! Bela hte Nebo yan hpe lang mi nawku yu masai, rai ti mung, ya chyawm gaw dai ni gaw lawze ni a ntsa e daw mara ai hte, hki ba ai yam nga shingma a matu lit rai nga sai.

²Hpara sumla ni gaw shanhte hkum hpe nan n lu hkye la nga ai; shanhte gaw rim hkrum nna woi mat wa hkrum ma ai. Ndai gaw Babelon karai ni a matu jahtum rai nga ai!

³“Yaku a aru arat ni, nye a amyu masha kaw na naw ngam nga ai ni yawng hte e, nye a ga madat mu. Ngai gaw nanhte hpe nanhte shangai wa ai shani kaw nna bau maka wa ni ai.

⁴Ngai gaw nanhte a Karai Kasang rai nga nngai, nanhte asak kaba nna dingla baw hpraw ai aten du hkra nanhte hpe lanu lahku na nngai. Ngai gaw nanhte hpe hpan da ni ai, nanhte hpe lanu lahku na nngai; Ngai gaw nanhte hpe karum ai hte hkye mawai la na nngai.

⁵Dai MADU gaw, “Nanhte ngai hpe kadai hte shabung yu na myit ni?,” ngu nna tsun ai. “Ngai hte bung ai wa nga nga a ni?

⁶Amyu masha ni gaw shanhte a tingsan hpaw nna aja ru bang ma ai; shanhte gaw joi jang ni hta gumhpraw shen ma ai. Shanhte gaw karai langai galaw na matu ja janghkam hpe saw shaga ma ai; dai hpang shanhte gaw dai hpe gum dagup let nawku ma ai.

⁷Shanhte gaw dai hpe lahpa hta mara nna hpai ma ai; shanhte gaw dai hpe san da ai shara hta tawn da ai rai nna dai shara e n htawt ai sha tsap nga ai. Marai langai ngai dai kaw akyu hpyi yang, htan ya ai n rai, shanhte hpe tsin-yam tsindam kaw na hkye la lu ai n rai.

⁸“Yubak kap ai ni e, ndai amu hpe adum nga mu; ngai galaw sai amu hpe myit yu mu.

⁹Moi prat hta byin lai wa sai lam hpe adum nga mu; Ngai chyu sha Karai Kasang rai nga nngai mung, ngai hte bung ai wa mi n nga nga ai hpe mung yin la mu.

¹⁰Ngai gaw shawng npawt kaw nna byin pru sai amu hpe tau tsun ni ai; moi chyaloi nhkoi kaw nna byin wa na lam hpe ngai tau tsun ni ai. Nye a yaw shada lam ni galoi mung hkrat sum na n rai nga ai hpe mung, ngai galaw na ngu shatawng shada ai lam magup hte hpe ngai galaw ai hpe mung tsun ni ai.

¹¹Ngai gaw sinpraw maga de na masha langai du sa na shaga nga nngai; shi gaw langji zawn ntsa de nna htim yu wa na ra ai, ngai shatawng shada ai amu ni hpe shangut na ra ai. Ngai tsun ni ai, dai gaw byin wa na ra ai.

¹²“Du ja nna awng padang hte tsan nga ai ngu myit nawn nga ai ni e, nye a ga madat mu.

¹³Ngai gaw ni sa wa nga ai awng padang nhtoi hpe la sa wa nga nngai, dai gaw tsan nga ai n rai. Nye a padang ninglaw gaw htingnai nga na n rai. Ngai gaw Yerusalem hpe hkye la ai hte dai yang e Israela a matu arawng sadang tawn da ya na nngai.”