Read Jinghpaw Common Language Bible 2009 ESAIA 49 Bible Online

ESAIA 49 - Jinghpaw Common Language Bible 2009 bible

ESAIA 49

¹Tsan gang ai shara hkan nga ai sumtsan masha amyu baw ni e, nye a ga madat mu! Ngai garai n shangai ai aten kaw na, dai MADU gaw ngai hpe lata la ai hte shi a shangun ma tai na matu ngai hpe san da nu ai.

²Shi gaw nye a n-gup hpe dai ai nhtu zawn shatai nu ai. Shi a lata hte nan ngai hpe makawp maga da nga ai. Shi gaw ngai hpe lang na matu jin jin masen da ai pala zawn shatai nga ai.

³Shi gaw ngai hpe, “Israela e, nang gaw nye a shangun ma rai nga ndai; na a majaw, masha ni ngai hpe shakawn kungdawn na mara ai,” ngu nna tsun wu ai.

⁴Ngai gaw, “Ngai amu galaw ni ai, rai ti mung dai gaw kade sha myit mada shara n nga nga a hka! Ngai gaw n-gun htum hkra shakut ni ai, rai ti mung hpa mung n shangut lu nngai,” ngu nna tsun nngai. Ti mung nye a lam hpe makawp maga na matu, dai MADU hpe ngai kam lu nngai; shi gaw ngai galaw ai amu a matu ngai hpe shabrai jaw na ra ai.

⁵Ngai garai n shangai yang, dai MADU gaw ngai hpe san da nu ai; shi a amyu masha ni hpe woi nhtang wa na matu mung, bra mat wa sai Israela amyu masha ni hpe bai woi nhtang wa na matu mung, shi gaw ngai hpe shi a shangun ma shatai nu ai. Dai MADU gaw ngai hpe arawng sadang jaw nga ai; shi gaw nye a n-gun a npawt rai nga ai.

⁶Dai MADU gaw ngai hpe, “Nye a shangun ma wa e, ngai gaw na a matu bungli grau kaba ai langai lu nngai. Naw ngam nga ai Israela amyu masha ni hpe galu kaba lam jaw ya na matu sha n rai nga ai; rai ti mung ngai gaw nang hpe masha amyu ni a matu nhtoi shatai na we ai, shaloi mungkan yawng gaw hkye hkrang la hkrum na ma ai,” ngu nna tsun ai.

⁷Israela a chyoi pra ai Karai Kasang hte hkye hkrang la ai wa gaw htum hkra n kaw n law di hkrum ai wa, masha amyu baw ni e n dawng hkrum ai wa hte mung du ni a shangun ma tai nga ai wa hpang de ning ngu tsun nga ai: “Hkawhkam ni gaw nang hpe dat kau dat ai mu na mara ai shanhte a hkungga lara ai hpe madun na matu rawt wa na mara ai; hkawhkam kasha ni mung dai hpe mu na mara ai, shanhte gaw nang hpe shagrau sha-a na matu gum dagup wa na mara ai.” Dai MADU gaw shi a shangun ma hpe lata la nu ai majaw ndai lam byin wa na ra ai; Israela a chyoi pra ai Karai Kasang gaw shi a ga sadi ni hpe shatup na ra ai.

⁸Dai MADU gaw shi a amyu masha ni hpe, “Nang hpe hkye la na matu aten du ai shaloi, ngai nang hpe myi man madun nna, karum la na matu hpyi jahtau ai ga ni hpe htan ya na nngai. Amyu masha ni yawng hte nang ga shaka tawn da ai hku nna sha, ngai nang hpe bau sin ai hte makawp maga na nngai. Ya aten katsi katsang gram mat sai na a mungdan hta ngai nang hpe kalang mi bai shanu nga shangun na nngai.

⁹Ngai gaw bawng dung ai masha ni hpe, ‘Ndut ndang pru wa manu!,’ ngu nna mung, nsin kata e rawng nga ai ni hpe, ‘Nhtoi de pru wa marit!,’ ngu nna mung tsun na nngai. Shanhte gaw kawng ni hkan ushat sha nga ai sagu ni zawn tai na mara ai,

¹⁰shanhte gaw galoi mung kawsi hpang gara hkrum na mara ai n rai. Ajan hte zaibru jang a kahtet kang ai gaw shanhte hpe hkra na ra ai n rai, hpa majaw nga yang, shanhte hpe tsaw ra ai wa gaw shanhte hpe lam woi na ra ai. Shi gaw shanhte hpe hka hpawk ni nga ai de woi sa na ra ai.

¹¹“Ngai gaw bum ni hpe lai di ai nmaw lam kaba galaw nna nye a amyu masha ni a matu hkawm sa na lam langai hkyen ya na nngai.

¹²Nye a amyu masha ni gaw tsan gang ai shara ngu ai dingdung hte sinna maga de nna mung, dingda maga Aswan kaw na mung sa wa na mara ai.

¹³Sumsing lamu ni e, mahkawn mangoi mu! Ginding aga e, kabu gara jahtau u! Bum ni mahkawn garu nga mu ga! Dai MADU gaw shi a amyu masha ni hpe shalan shabran na ra ai; shi gaw nni nkri hkam sha nga ai shi a amyu masha ni hpe matsan dum na ra ai.

¹⁴Rai ti mung Yerusalem amyu masha ni gaw, “Dai MADU gaw anhte hpe kau da mani ai! Shi anhte hpe malap kau nu ai,” nga nna tsun ma ai.

¹⁵Dai rai nna dai MADU gaw, “Numsha gaw tinang a chyu chyu ai ma hpe malap kau nna shi shangai ai ma hpe n tsaw ra mai nga a ni? Kanu gaw tinang a kasha hpe malap kau tim pyi, ngai gaw nang hpe galoi mung malap kau na nngai n rai.

¹⁶Yerusalem e, ngai nang hpe galoi mung n malap lu nngai! Ngai gaw na a mying hpe nye a lata lahpan ntsa hta ka matsing da ni ai.

¹⁷“Nang hpe bai gaw gap da na ni kade n na yang du na mara ai, nang hpe jahten sharun kau ai ni pru mat wa na mara ai.

¹⁸Grup yin de mada yu nna hpa byin nga ai hpe yu u! Na a amyu masha ni gaw zup hpawng nga ma ai, shanhte gaw dum nta de wa nga ma ai! Ngai gaw ahkrung nga ai Karai Kasang rai nga ai hte maren, num nnan gaw shi mawn sumli da ai ja lung seng ni a majaw gumrawng lu ai zawn nang mung na a amyu masha ni a majaw gumrawng lu na rai ndai.

¹⁹“Na a mungdan gaw hten run nna katsi katsang shara tai mat sai, rai ti mung, ya chyawm gaw dai mungdan gaw dai shara hta sa shanu nga na ni a matu shara nau pyi kaji mat na ra ai. Nang hten run mat ai majaw kau da ai ni gaw nang kaw na htawt sit kau hkrum na mara ai.

²⁰Bawng dung hkrum ai mung hta shangai wa ai na a amyu masha ni gaw lani mi na nhtoi hta nang hpe, ‘Ndai lamu ga gaw nau kaji nga ai, anhte ashang awang nga lu na matu nga shara naw ra ga ai!,’ nga nna tsun na mara ai.

²¹Dai hpang nang gaw tinang kraw e, ‘Nye a matu ndai ma kaji ni yawng hpe kadai shangai ya nga a ni? Ngai gaw ma ni hpe shamat kau ni ai, kaga mi n lu jat lu na sai. Ngai gaw bawng dung hkrum ai hte gawt kau ai hkrum ni ai- kadai wa ndai ma ni hpe bau kaba dat nga ai kun? Ngai chyu sha nga ai aten hta ndai ma ni gara shara kaw na du sa wa nga ma ni?,’” ngu nna tsun na rin dai.

²²Tsaw Htum ai dai MADU gaw shi a amyu masha ni hpe ning ngu tsun nga ai: “Ngai gaw masha amyu baw ni hpe kumla madun na nngai, shanhte gaw na a ma kaji ni hpe dum nta de woi wa na mara ai.

²³Hkawhkam ni gaw na a matu kawa ni zawn tai na mara ai; hkawhkam jan ni gaw kanu ni zawn tai na mara ai. Shanhte gaw na a man e gum dagup ai hte nang hpe shagrau sha-a na mara ai; shanhte gaw shagrit shanem ai hte nang hpe hkrit hkungga lam madun na mara ai. Dai hpang nanhte gaw ngai nan dai MADU rai nga nngai hpe chye na marin dai; nye a karum la lam ala nga ai ni kadai mung myit daw hten ai hkrum na ra ai n rai.”

²⁴Nang gaw hpyenla langai a lanep hpe la lu n ni? Nang gaw gumshem wa a lata kaw na bawng masha ni hpe hkye mawai la lu n ni?

²⁵Dai MADU gaw, “Dai gaw ning rai byin wa na lam rai nga ai. Hpyenla wa a bawng masha ni gaw lawt wa lu na mara ai, gumshem ai wa a lanep gaw rim la hkrum na ra ai. Ngai hpe gasat ai wa kadai hpe mung ngai gasat na nngai, ngai gaw na a ma kaji ni hpe hkye mawai la na nngai.

²⁶Ngai gaw nang hpe dip gamyet sha ai ni hpe shada da sat hkat shangun na nngai; shanhte gaw lu nang nna masha sat ai hte n-yun bu na mara ai. Dai hpang amyu masha ni yawng gaw ngai nan dai MADU rai nga nngai hpe mung, nang hpe hkye la ai hte nang hpe shalawt dat ai wa rai nga nngai hpe chye wa na mara ai. Shanhte gaw ngai nan Israela a daru magam n-gun hte hpring ai Karai Kasang rai nga nngai hpe chye wa na mara ai.”