Read Jinghpaw Common Language Bible 2009 ESAIA 5 Bible Online

ESAIA 5 - Jinghpaw Common Language Bible 2009 bible

ESAIA 5

¹Ndai mahkawn ga, na a matu ngai mahkawn nga yang madat la u. dai gaw nye manang a mahkawn hte shi a sabyi sun a lam rai nga ai: Nye a manang wa gaw namhpun grai kaja ai kawng langai a ntsa e sabyi sun langai lu ai.

²Shi gaw ga sau htu lajang nna dai hta na nlung ni hpe rawm kau nga ai; shi gaw kaja htum ai sabyi ru ni hpe hkai da nga ai. Shi gaw dai hpe makawp maga na matu langchyi langai gap da nga ai, sabyi si ni kabye na matu nhkun langai hpe shi htu da nga ai. Shi gaw sabyi si ni myin na matu ala nga ai, rai ti mung sabyi si shagu gaw hkri mat nga ai.

³Dai rai nna nye a manang wa gaw, “Nanhte Yerusalem hte Yuda mung hta shanu nga ai amyu masha ni e, sabyi sun hte nye a lapran na lam hpe jeyang ya mi.

⁴Ndai sabyi sun a matu galaw na ngai hprai kau ai amu hpa wa naw nga nga a ta? Dai rai yang, hpa majaw ngai myit mada da ai kaja ai sabyi si ni n re ai sha, hkri ai sabyi si ni hpe shapraw ya nga a ni?

⁵“Ndai gaw nye a sabyi sun hta ngai galaw sa wa na amu rai nga ai: Ngai gaw dai sun hpe kum gawan da ai nhpan ni hpe la kau nna, dai hpe makawp maga da ai bunghku ni hpe jahten kau na we ai, matse labye dusat ni dai hpe sha kau mu ga, dai sun hpe kabye anut kau mu ga.

⁶Ngai gaw dai hpe tsing ni hte shalim kau shangun na we ai. Ngai gaw sabyi ru ni hpe tsan kau na n rai, aga hpe chye pawm ya na n rai; shing di na malai, ngai gaw dai shara hpe ju hpun ni hte ka-up da shangun na nngai. Ngai gaw de a ntsa e marang jahtu ya na matu, sumwi ni hpe hkum shadang da na nngai.”

⁷Israela gaw Chyahtum Chyalai N-gun rawng ai dai MADU a sabyi sun rai nga ai; Yuda masha ni gaw shi hkai da ai sabyi ru ni rai nga ai. Shi gaw kaja ai amu galaw na matu shanhte hpe myit mada nga ai, rai ti mung, shing rai na malai shanhte gaw masha sat amu shut hpyit ma ai. Shi gaw jaw ai amu galaw na matu shanhte hpe myit mada nga ai, rai ti mung tsin-yam hkrum sha ai masha ni gaw teng man rap ra ai tara a matu jahtau hkrap nga ma ai.

⁸Nanhte gaw dingnye hkrum nga myit dai! Nanhte gaw nanhte hkam la lu sai hta jat nna dum nta ni hte yi sun ni hpe grau mari da nga myit dai. Kade n na yang, dai shara hta marai langai mi nga na shara nga na ra ai n rai, nang chyu sha dai lamu ga hta nga na rai ndai.

⁹Ngai gaw Chyahtum Chyalai N-gun rawng ai dai MADU ning nga tsun ai ga hpe na ni ai: “Ndai kaba nna tsawm ai dum nta ni yawng kaman hten run mat na mara ai.

¹⁰Lamu ga eka manga hta tu nga ai sabyi ru ni hta na sabyi ntsin galan manga sha shup la lu na ra ai. Nli dang shi gaw nsi dang mi sha shu la lu na ra ai.

¹¹Nanhte gaw dingnye hkrum nga myit dai! Nang gaw jahpawt manap jau jau rawt nna chyaru lu hpang ai hte, shana du hkra chyaru nang let aten shama hkawm nga ndai.

¹²Na a lusha poi ni hta dawraw tingse, dumbu, sumpyi, larung sumhkran, hte sabyi ntsin ni lawm nga ai. Rai ti mung nang gaw dai MADU hpa galaw nga ai hpe n chye nga ndai,

¹³dai rai nna nang gaw bawng masha ni zawn woi mat wa ai hkrum na rai ndai. Na a ningbaw ni gaw lusha kyet si na mara ai, yu maya masha ni gaw hpang gara ai hte si mat na mara ai.

¹⁴Katsan ga gaw shanhte a matu hpang gara nga ai rai nna shi a n-gup hpaw mahka da nga ai. Dai gaw Yerusalem na arawng lu ai du magam ni hte rau garu gachyi nga ai yu maya masha wunawng ni hpe mayu sha nga ai.

¹⁵Masha shagu hte gaw sari jahpoi hkrum na mara ai, gumrawng gumtawng ai ni yawng hte gaw shagrit kau hkrum na mara ai.

¹⁶Rai ti mung Chyahtum Chyalai N-gun rawng ai dai MADU gaw teng man ai amu galaw let shi a galu kaba ai lam hpe madun dan nga ai, shi gaw shi a amyu masha ni hpe tara jeyang ai hku nna shi a chyoi pra ai lam hpe hpaw dan nga ai.

¹⁷Hten run mat sai mare ni hta, sagu kasha ni tsing makret sha nna, bainam kasha ni udat shara mu tam na mara ai.

¹⁸Nang gaw dingnye hkrum nga ndai! Nang gaw na a yubak kaw nna n lawt lu nga ndai.

¹⁹Nang gaw, “Dai MADU gaw tin tin rai nna shi tsun, shi myit ai hku galaw u ga, shaloi dai amu hpe anhte mu lu nga ai. Israela a chyoi pra ai Karai Kasang gaw shi a yaw shada lam ni hpe matut galaw u ga; shi a myit masin hta hpa rawng ai lam anhte mu lu u ga,” ngu nna tsun ai.

²⁰Nang gaw dingnye hkrum nga ndai! Nang gaw n kaja ai hpe kaja ai, kaja ai hpe n kaja ai nga nna tsun ndai. Nang gaw nsin hpe nhtoi de, nhtoi hpe nsin de kayin kau nga ndai. Nang gaw hka ai hpe dwi ai, dwi ai hpe hka ai hku galaw nga ndai.

²¹Nang gaw dingnye hkrum nga ndai! Nang gaw hpaji rawng ai wa, grai ram dum ai wa hku nna nang myit nawn la nga ndai.

²²Nang gaw dingnye hkrum nga ndai! Sabyi palin a share ninghkrin ni! Tsi kayau lu nang ai shaloi share shagan ai hte hkrit myit hpa mung n rawng ai ni!

²³Rai ti mung mayun kumhpa a majaw mara lu ai hpe nang shalawt dat nga ai, teng man rap ra ai lam lu la na matu, mara n kap ai wa hpe nang hkum shingdang da nga ndai.

²⁴Dai majaw, Chyahtum Chyalai N-gun rawng ai dai MADU Israela a chyoi pra ai Karai Kasang gaw anhte hpe sharin da ya mi ai hpe nang ningdang kau nga ndai majaw yihku hte tsingdu jahkraw ni nyip mat nna wan hta hkru mat ai zawn na a ru ni tsam mat nna na a nampan pu ni hkraw nyui mat ai hte poi mat wa na ra ai.

²⁵Dai MADU gaw shi a amyu masha ni hpe masin pawt nga ai, shanhte hpe ari jaw na matu shi a lata ladawn da nu ai. Bum ni gari ashun wa nna si mang ni mare lam nmaw hkan e shanut shanaw zawn jawng nga na mara ai. Dai rai tim pyi, dai MADU a masin kahtet ai gaw kawp mat na n rai, rai ti mung shi a lata gaw ari jaw na matu naw ladawn da na ra ai.

²⁶Dai MADU gaw sumtsan na amyu baw langai hpe saw shaga na matu kumla langai jaw nga ai. Shi gaw shanhte hpe lamu ga htum kaw nna sa wa na matu lahpyaw hte shaga nga ai. Shanhte gaw ndai shara de tin tin, chyang chyang hte sa wa ma ai!

²⁷Shanhte hta na langai mi mung hki ba ai n rai; shanhte hta na langai mi mung ahtu kataw ai n rai. Shanhte gaw galoi mung yup nga, yup pyaw ai n rai. Shingkyit langai mung raw mat ai n rai; kyepdin sumri langai mung di mat ai n rai.

²⁸Shanhte a pala ni masen nga ai; shanhte a ndan ni gap na matu shachyen da chyalu rai nga ai. Shanhte a gumra lahkru ni gaw hpai lung zawn ja nga ai; shanhte hpyen leng dingsen ni gaw bung hpoi zawn chyai nga ai.

²⁹Hpyenla ni gaw dusat langai hpe kawa sat da nna kadai mung n lu la mat wa ya lu ai shara hta garawt tawn da ai hkanghkyi ni zawn shabam nga ma ai.

³⁰Dai nhtoi du ai shaloi, shanhte gaw panglai hka wu kadu ai nsen zawn Israela amyu ni a ntsa e marawn shabam wa na mara ai. Ndai mungdan hpe mada yu mu! Dai gaw nsin hte myit htum myit chyum rai nga a hka! Nhtoi gaw nsin e mayu sha kau hkrum nga sai.