Read Jinghpaw Common Language Bible 2009 ESAIA 51 Bible Online

ESAIA 51 - Jinghpaw Common Language Bible 2009 bible

ESAIA 51

¹Dai MADU gaw, “Hkye hkrang la hkrum mayu ai ni hte karum la na matu ngai kaw du sa wa ai ni e, nye a ga madat mu. Nang pru sa wa ai kaw na lunghkrung, nang tawk la ai kaw na nhkun hpe myit yu u.

²Nang yu hkrat wa ai kaw na, na a kaji kawoi Abraham hte Sara yan hpe myit yu u. Ngai Abraham hpe shaga ai shaloi, shi hta kashu kasha garai n lu ai, rai ti mung ngai shi hpe shaman ya ai hte shi hpe kashu kasha jaw ni ai; ngai gaw shi a aru arat ni hpe shalaw jahtam ya ni ai.

³“Ngai gaw Yerusalem hte de a hten run mat sai shara ni hkan shanu nga ai ni yawng hpe matsan dum myit madun dan na nngai. Shi a lamu ga gaw zaibru jang rai nga ti mung Eden hta ngai hkai da ai sun zawn, dai hpe sun langai shatai na nngai. Dai yang e kabu gara ai hte pyaw ngawn ai lam nga na ra ai, ngai hpe shakawn kungdawn ai mahkawn mangoi ga ni hte chyeju dum na mara ai.

⁴“Nye a amyu masha ni e, nye a ga madat mara mu, ngai tsun ai ga hpe madat mu: Ngai gaw masha amyu baw ni hpe nye a sharin shaga ga jaw nngai; nye a tara ni gaw shanhte a matu nhtoi tai na ra ai.

⁵Ngai gaw tin tin sa nna shanhte hpe hkye la na nngai; nye a awng padang lu la na aten ni wa nga sai. Ngai nan masha amyu baw ni a ntsa e up na nngai. Sumtsan mung na ni gaw ngai sa wa na matu ala nga ma ai; shanhte gaw shanhte hpe hkye la na matu myit mada ai hte ngai hpe ala nga ma ai.

⁶Sumsing lamu ni hpe mada yu mu; Ginding aga hpe yu mu! Sumsing lamu ni gaw wan hkut zawn hkoi mat nna; ginding aga gaw hpun nba dingsa zawn tsam mat na ra ai, dai hta nga ai amyu masha ni yawng gaw jinu ni zawn si mat na mara ai. Rai ti mung ngai la sa ai hkye mawai la ai amu gaw htani htana agrin nga na ra ai; nye a awng padang gaw hpang jahtum rai na ra ai.

⁷“Teng man ai amu hpe chye nna nye a sharin achyin ga hpe na a myit masin ni hta kyem da ai wa e, nye a ga madat u. Amyu masha ni nang hpe ashu nna n kaw n law di yang, hkum hkrit et;

⁸shanhte gaw manut e sha kau ai sumpan zawn tsam mat na mara ai! Rai ti mung ngai la sa ai hkye mawai la ai amu gaw htani htana agrin nga na ra ai; nye a awng padang gaw prat mi hte prat mi agrin nga na ra ai.”

⁹MADU e, rawt u, anhte hpe karum la mi! Na a daru magam n-gun lang nna, anhte hpe hkye la mi; dai hpe moi chyaloi nhkoi prat ni hta nang lang ai zawn lang u. Dai daru magam n-gun hte nang gaw panglai numraw Rahab hpe kahtum kadaw di azat kau nga ndai.

¹⁰Dai daru magam n-gun hte panglai hka hpe nang shahkyet kau nna dai hka hku lam langai waw nga ndai, shaloi nang hkye da sai ni rap di lu ma ai.

¹¹Nang hkye mawai da sai ni gaw Yerusalem de kabu gara ai hte du dep nna, mahkawn mangoi ai hte kabu gara jahtau garu na mara ai. Shanhte gaw htani htana kabu gara ai hte yawn hkyen ai hte madai sharung ai kaw na htani htana lawt lu na mara ai.

¹²Dai MADU gaw, “Ngai gaw nang hpe n-gun shaja ya ai wa rai nga nngai. Nang gaw hpa majaw tsingdu hta grau nna pyi n grin lu ai si chye ai masha wa hpe hkrit nga n ta?

¹³Nang gaw nang hpe hpan da ai, sumsing lamu ni hpe kahpyan da ai wa, ginding aga a npawt nhpang ni hpe jahkrat tawn ai wa dai MADU hpe malap kau nu ni? Nang hpe dip gamyet sha ai ni a n-yun bu ai a tut nawng hkrit ra ai shara hte, nang hpe shamyit kau na matu jin jin rai nga ai ni a shara hta nang hpa majaw nga ang nga n ta? Shanhte a n-yun bu ai gaw nang hpe galoi mung hkra lu na n rai.

¹⁴Bawng dung hkrum ai ni mung kade n na yang shalawt dat ai hkrum na mara ai; shanhte gaw asak galu hkra nga lu nna shanhte ra ai malu masha yawng lu na mara ai.

¹⁵“Ngai gaw dai MADU na a Karai Kasang rai nga nngai; ngai gaw panglai hka hpe kabrawng dat ai hte de a hka leng ni hpe hta shangun nngai. Nye a mying gaw Chyahtum Chyalai N-gun rawng ai dai MADU rai nga nngai!

¹⁶Ngai gaw sumsing lamu ni hpe hpyan da ai hte ginding aga a npawt nhpang ni hpe jahkrat tawn nngai. Ngai gaw Yerusalem hpe, ‘Nang gaw nye a amyu masha rai nga ndai! Ngai gaw nang hpe nye a sharin shaga ga jaw ni ai, ngai gaw nang hpe nye a lata hte makawp maga nngai,’” ngu nna tsun wu ai.

¹⁷Yerusalem e, rawt u! Nang hkum nan jasu nna rawt u! Nang gaw dai MADU masin kahtet ai majaw nang hpe jaw lu ai ari gawm hpe lu kau nga ndai; Nang gaw dai hpe lu kau ai majaw, dai gaw nang hpe ndi nda byin shangun nga ai.

¹⁸Nang hpe lam woi na masha kadai n nga ai, lata hte nang hpe woi dun wa na, na a amyu masha langai mung n nga nga ai.

¹⁹Tsin yam tsindam htam lahkawng na a ntsa e hkrat nga sai; na a mungdan gaw majan a majaw hten run mat sai, na a amyu masha ni hku hku masai. Nang hpe matsan yu dum la na masha kadai n nga nga ai.

²⁰Nmaw lam jut shagu hta na a amyu masha ni n-gun kya ai hte taw nga ma ai; shanhte gaw jaugawng wa a sumgawn hta rim hkrum ai shannga zawn rai ma ai. Shanhte gaw Karai Kasang a sindawng kahtet ai n-gun hpe hkam sha manu ai.

²¹Nni nkri hkrum sha nga ai Yerusalem na amyu masha ni e, nanhte gaw chyaru nang ai wa zawn ndi nda rai nga myit dai,

²²dai MADU na a Karai Kasang gaw nang hpe makawp maga ai hte, “Nye a masin kahtet ai majaw nang hpe jaw ai gawm hpe ngai la kau nga nngai. Nang gaw nang hpe ndi nda byin shangun ai sabyi ntsin hpe galoi mung lu ra sana n rai.

²³Ngai gaw dai hpe nang hpe dip gamyet nga ai ni hpe mung, nmaw lam ni hta nang hpe kaleng shangun nna, nang hpe ga nhpu zawn nawn da ai hte na ntsa e kabye anut lai wa shangun ai ni hpe jaw na nngai.”