Read Jinghpaw Common Language Bible 2009 ESAIA 52 Bible Online

ESAIA 52 - Jinghpaw Common Language Bible 2009 bible

ESAIA 52

¹Yerusalem e, n-gun shaja ai hte kalang bai galu kaba u! Karai Kasang a Chyoi Pra ai mare e, na hkum hpe hkik hkam ai hpun palawng hte mawn sumli u! Sumla nawku ai ni na a mare chyinghka de galoi mung bai shang lu na mara ai n rai.

²Yerusalem e, nang nan ndut ndang ashun nga u! Ga nhpu kaw na rawt nhtawm na a tingnyang hta dung u! Ziun a bawng dung amyu masha ni e, nang hpe gyit ai sumri ni hpe raw kau u!

³Tsaw Htum ai dai MADU gaw shi a amyu masha ni hpe, “Nanhte mayam tai nga myit dai shaloi, nanhte a matu gumhpraw manu n hkrat ra nga ai; dai hte maren, nanhte hpe shalawt dat na matu manu jahpu hkrat ra na ra ai n rai.

⁴Nanhte gaw maigan masha ni zawn Egutu mung hta sa shanu nga myit dai shaloi, nanhte myit ra ai hku galaw manit dai; hpa mi rai tim, Asuri gaw nanhte hpe n-gun hte adip arip woi mat wa nna nanhte a matu manu jahpu hpa mung n jaw nga ma ai.

⁵Ya Babelon mung hta mung dai zawn byin lai wa nga sai: nanhte gaw bawng masha ni rai nga myit dai, nanhte a matu manu jahpu n jaw ma ai. Nanhte hpe up hkang ai ni gaw shakawng shakat grang dakat ai hte ngai hpe tut nawng n kaw n law ai lam madun ma ai.

⁶Aten du ai shaloi, ngai gaw nanhte hpe ga shaga ai Karai Kasang rai nga nngai hpe nanhte yin la na rai myit dai,” ngu nna tsun ai.

⁷Bum lang ni hpe lai di nna kabu gara shiga, ngwi pyaw sim sa lam a shiga la sa ya ai wa hpe mu lu ai gaw kade sha mauhpa rai nga a hka! Shi gaw awng padang hpe ndau shabra nna Ziun hpe, “Na a Karai Kasang gaw hkawhkam rai nga ai!,” ngu nna tsun ai.

⁸Mare sin langa ni jahtau nga ma ai, kabu gara ai hte rau sha jahtau nga ma ai. Shanhte gaw dai MADU Ziun de nhtang wa ai hpe shanhte a myi hte chyaw mu lu ma ai.

⁹Hten run mat sai Yerusalem, nang e, kabu gara jahtau garu u! Dai MADU gaw shi a mare hpe hkye mawai la nna shi a amyu masha ni hpe shalan shabran na ra ai.

¹⁰Dai MADU gaw shi a chyoi pra ai daru magam n-gun lang wa na ra ai; shi gaw shi a amyu masha ni hpe hkye la na ra ai, mungkan ga ting dai amu hpe mu na mara ai.

¹¹Nawku Htingnu arung arai hpai ai nanhte yawng hte e, Babelon mung kaw na teng sha pru wa mu. Hkum da ai arung arai hpe hkum hkra myit; nanhte a hkum ni hpe shachyoi shapra ai hte pru wa mu.

¹²Ndai lang chyawm gaw nanhte tin shapun pru mat wa ra na myit dai n rai; nanhte hprawng shakut ra na myit dai n rai. Dai MADU na a Karai Kasang gaw nanhte hpe lam woi nna kade nde nanhte hpe makawp maga na ra ai.

¹³Dai MADU gaw, “Nye a shangun ma gaw shi a amu hta dagraw la na ra ai; shi gaw shagrau shatsaw hkrum na ra ai.

¹⁴Shanhte gaw shi hpe mu ai shaloi, amyu masha law law hte gaw mau kajawng mat ma ai; shi gaw shinggyim hkum hkrang hte grai shai mat hkra, gawng shingyan hten mat nga ai.

¹⁵Rai ti mung, ya chyawm gaw masha amyu baw law law ni shi hpe yu mau na mara ai, hkawhkam ni gaw ga n shaga ai sha mau mat na mara ai. Shanhte gaw shanhte galoi mung n chye na yu ai arai lama mi hpe mu lu nna chye na wa na mara ai,” ngu nna tsun ai.