Read Jinghpaw Common Language Bible 2009 ESAIA 58 Bible Online

ESAIA 58 - Jinghpaw Common Language Bible 2009 bible

ESAIA 58

¹Dai MADU gaw, “Nang shaja lu ai daram jahtau u! Shanhte a yubak mara ni hte seng nna nye a amyu masha Israela ni hpe tsun dan u!

²Shanhte gaw ngai hpe shani shagu nawku ma ai, shanhte gaw nye a lam ni hpe chye na matu hte nye a tara ni madat mara na matu grai sharawng ma ai lam tsun ma ai. Shanhte gaw shanhte hpe teng man ai tara ni jaw ya na matu hte ngai hpe nawku ai hta shanhte awng sharawng nga ai lam tsun ma ai,” ngu nna tsun ai.

³Amyu masha ni gaw, “Dai MADU galoi mung n matsing ai mi, anhte hpa majaw lusha gam ang na ga ta? Shi myit n lawm ai mi, anhte hpa majaw lusha n lawm ai sa ang ga ta?,” ngu nna san ma ai. Dai MADU gaw shanhte hpe, “Dai teng man ai gaw dai nanhte lusha gam ai aten hta nan rai nga ai, nanhte gaw nanhte a amyat ni hpe hkan tam nna, nanhte a amu galaw masha ni hpe dip gamyet sha nga myit dai.

⁴Nanhte a lusha gam ai gaw kabring kabrawng du daw sai hkaw shabyin nna, nanhte gaw ga law ga la hte gasat gala nga myit dai. Dai zawn re ai lusha gam ai lam gaw nanhte a akyu hpyi ga ni hpe madat shangun na matu rai nga ai ngu, nanhte myit nawn da myit ni?

⁵Nanhte lusha gam ai shaloi, nanhte a baw ni hpe tsingdu lap langai zawn gum dagup nna lachyit nba hpyan da let wan dap e galwi ai hku, nanhte a hkum ni hpe nni nkri hkrum shangun nga myit dai. Dai gaw lusha gam ai re ngu myit nawn da wu ni? Ngai gaw dai zawn re ai hpe awng sharawng nga ai ngu nanhte myit nawn da wu ni?

⁶“Ngai ra sharawng ai lusha gam lai gaw ndai hku rai nga ai: Dip gamyet sha tawn ai saidawng sumri hte n teng n man ai a kandang sumri ni hpe raw kau mu; dip gamyet sha hkrum ai ni lawt lu mu ga.

⁷Na a lusha hpe kawsi kyet ai wa hpe karan ya u, dum nta n lu ai matsan mayan masha ni shang wa lu mu ga, na a nta ni hpe hpaw tawn u. Bu hpun na hpa mung n lu ai ni hpe hpun palawng jaw u, na a makyin jinghku ni hpe karum na hkum ningdang et.

⁸“Dai hpang nye a myi man gaw jahpawt manap na ajan zawn na a ntsa e htoi wa na ra ai, na a ningma ni alawan shamai shatsai ai hkrum na ra ai. Ngai gaw nang hpe hkye la na matu nang hte tut nawng nga nga na nngai; nye a hpung shingkang gaw nang hpe man maga shagu makawp maga la na nngai.

⁹Nang akyu hpyi ai shaloi, ngai nang hpe htan ya na nngai. Nang ngai hpe shaga ai shaloi, ngai htang shana na nngai. “Dip gamyet sha hkrum ai lam, n kaw n law re ai lai kumla shagu, hte n hkru ai n-gup aga shagu hpe nang jahtum kau nna,

¹⁰kawsi kyet ai ni hpe nang lusha jaw nhtawm, ra kadawn ai ni hpe nang myit shadik ya ndai rai yang, nang hpe shinggrup da ai nsin gaw shani chyingtung na nhtoi tai na ra ai.

¹¹Ngai gaw nang hpe tut nawng woi lakawn nna mai kaja ai arai ni hte nang hpe myit shadik ya na nngai. Ngai gaw nang hpe n-gun shaja ya nna hkam kaja shangun na nngai. Nang gaw hka n taw n tsang rawng ai sun hte galoi mung n hkyet mat ai hka hpawk langai zawn tai na ndai.

¹²Na a amyu masha ni gaw moi na hten run mat sai ni hpe bai de da na mara ai, moi moi na npawt nhpang ni a ntsa e bai gaw kahtap na ra ai. Nang gaw bunghku ni hpe bai gaw gap nna hten run mat sai dum nta ni hpe bai gram lajang da ai amyu masha ni zawn kajai gumhkawng na ra ai.

¹³Dai MADU gaw, “Bansa Nhtoi hpe chyoi pra ai zawn nang hkungga nna, dai shani e na a hpaga amyat n tam ai sha, nye a chyoi pra ai shani hpe nang manu shadan ai hte shagrau sha-a ai hku, dai nhtoi e gara de mung n sa, amu n galaw, n tsun n ang ai ga hpe n shaga ai rai yang,

¹⁴ngai hpe daw jau nga ai kaw na pru wa ai kabu gara ai lam nang mu lu na rai ndai. Ngai gaw nang hpe mungkan ting hta shagrau sha-a hkrum shangun na nngai, na a nji nwa Yaku hpe ngai jaw sai mungdan hta nang kabu gara lu na rai ndai. Dai MADU ngai nan tsun ni ai,” ngu nna tsun ai.