Read Jinghpaw Common Language Bible 2009 ESAIA 8 Bible Online

ESAIA 8 - Jinghpaw Common Language Bible 2009 bible

ESAIA 8

¹Dai MADU gaw ngai hpe, “Laika ka na matu pyen chyang kaba langai la nhtawm dai hta e laika hkum kaba hte ‘Akajawng gasat, Tin tin hpya’ ngu nna ka da u.

²Sakse hkam na matu kam ging ai masha lahkawng hpe mung shaga u, dai yan gaw hkinjawng Uria hte Yeberehkia a kasha Zehkaria yan rai nga ai,” ngu nna tsun wu ai.

³Tawng marang mi na mat ai hpang, nye a madu jan gaw na-um nasin hkum tai wa sai. An a kasha shangai wa ai shaloi, dai MADU gaw ngai hpe, “Shi hpe ‘Akajawng gasat, Tin tin hpya,’ ngu nna shamying u.

⁴Dai ma gaw Nu e, Wa e, nga nna garai n chye shaga yang, Asuri hkawhkam gaw Damasku mare a sut gan ni hte Samari mung a lanep ni yawng hpe magawn la kau na ra ai,” ngu nna tsun wu ai.

⁵Dai MADU gaw ngai hpe ga bai shaga ai.

⁶Shi gaw, “Ndai amyu masha ni gaw asim sha lwi nga ai Shilo hka shi hpe kau da nna, Hkawhkam Rezin hte Hkawhkam Peka yan a man e hkrit gari nga ma ai majaw,

⁷Ngai Madu nan Asuri hkawseng hte shi a hpyen luksuk ni yawng hpe woi sa nna, Yuda mung hpe gasat kau shangun na nngai. Shanhte gaw hka hkin-gau hte daru ni yawng hpe lim kau shangun lu ai Uhprat hka nu a hka hpungla zawn rawt lung wa na mara ai.

⁸Shanhte gaw lahpa du hkra tsaw lung wa ai hka hpungla hte arai yawng mayawng hpe ka-up mat wa nna, Yuda mung hkren hkra ye magawn mat wa na mara ai,” nga nna tsun ai. Karai Kasang gaw anhte hte rau rai nga ai! Shi a kahpyan da ai singkaw ni hte dai mungdan hpe makawp maga nga ai.

⁹Amyu baw ni e, hkrit ai myit hte rau hpawng shinggyin nga mu! Mungkan ga a sumtsan shara na masha ni e, madat mara nga mu. Gasat na matu hkyen da mu, rai ti mung hkrit tsang nga myit! Rai sa, jin jin rai nga ti mung, hkrit tsang nga mu!

¹⁰Nanhte a hpyen zai ladat shaw mu! Rai ti mung dai ni gaw galoi mung awng dang na mara ai n rai. Nanhte ra ai lam mahkra tsun mu! rai ti mung dai lam yawng kaman lila rai nga ai, hpa majaw nga yang Karai Kasang gaw anhte hte rau rai nga ai.

¹¹Dai MADU gaw shi a daru magam n-gun kaba hte amyu masha ni hkan nga ai lam hta n hkan na matu ngai hpe sadi jaw wu ai. Shi gaw

¹²“Amyu masha ni a maw mawn ai lam ni hta hkum shang lawm et, shanhte hkrit kajawng ai arai ni hpe hkum hkrit nga et.

¹³Chyahtum Chyalai N-gun rawng ai Ngai MADU gaw chyoi pra nga nngai hpe dum nga u; Ngai gaw nang hkrit kamyin ai wa rai nga nngai.

¹⁴Hkrit hkungga na zawn re ai nye a chyoi pra ai hpung shingkang a majaw, ngai gaw amyu masha ni hpe ahtu kataw shangun ai nlung zawn rai nga nngai; ngai gaw Yuda hte Israela a mungdan amyu masha ni hte Yerusalem mare masha ni hpe hkam ai mahkam zawn rai nga nngai.

¹⁵Masha law law wa ahtu kataw na mara ai; shanhte gaw di hkrat ai hte agrawp mani kau ai hkrum na mara ai. Shanhte gaw mahkam hta rim hkrum na mara ai.”

¹⁶Nye a sape ni e, nanhte gaw Karai Kasang ngai hpe jaw sai mungga ni hpe sin makawp let kyem da mu.

¹⁷Dai MADU gaw shi hkum nan shi a amyu masha ni kaw nna myi man makoi mat nu ai, rai ti mung ngai shi hpe kam hpa ai hte shi hpe myit mada nga nngai.

¹⁸Ngai gaw ndai yang e dai MADU ngai hpe jaw da sai kashu kasha ni hte rau nga nga nngai. Chyahtum Chyalai N-gun rawng ai dai MADU a tingnyang gaw Ziun Bum ntsa e nga nga ai rai nna anhte hpe Israela amyu masha ni hpang de ahkrung nga ai mungga ni hku shangun dat mi ai.

¹⁹Rai ti mung amyu masha ni gaw kadum kahte nga nna tsun ai mandan bau ai sara ni hte nat myihtoi ni kaw mandan ga hpyi san na matu nanhte hpe tsun na mara ai. Shanhte gaw, “Hpang jahtum e, amyu masha ni gaw wenyi minla ni kaw nat ga san mai ang ai hte hkrung nga ai ni a matu si mat sai ni hte tsun shaga san jahkrup nga ma ai,” ngu nna tsun na mara ai.

²⁰Nanhte gaw shanhte hpe, “Dai MADU nanhte hpe kaning nga sharin nga ai hpe madat mu! Nat myihtoi ni tsun ai ga hpe hkum madat myit, shanhte nanhte hpe tsun ai ga gaw ru yak tsin-yam hpe yeng seng kau ya lu ai n rai,” ngu nna htan na myit dai.

²¹Amyu masha ni gaw myit daw myit hten ai hte kawsi hkrum let, dai mungdan hkan lai hkawm wa na mara ai. Shanhte a kawsi ai hte myit kahtet ai hta, shanhte gaw shanhte a hkawhkam hte shanhte a Karai Kasang hpe dagam kau na mara ai. Shanhte gaw lamu de mada,

²²ga de azi yu rai na ma ai, rai ti mung shanhte gaw hpa mung n mu, rai ti mung ru yak tsin-yam hte nsin hpe sha mu lu na mara ai, shanhte gaw hkrit shara nsin kata de gawt bang ai hkrum na mara ai.