Read Jinghpaw Common Language Bible 2009 ESAIA 9 Bible Online

ESAIA 9 - Jinghpaw Common Language Bible 2009 bible

ESAIA 9

¹Ndai ru yak tsin-yam tsindam hkrum ai aten kaw nna lawt lu na lam shanhte a matu nga na ra ai n rai. Zebulun hte Naphtali yan a amyu bawsang ni a lamu ga gaw shawng de kalang mi myi man sum yu nga sai, rai ti mung du na ra ai aten hta gaw Ka-ang Panglai a sinpraw maga kaw nna Yawdan hka a wora hkran na lamu ga du hkra, maigan masha ni shanu nga ai Galile ginwang du hkra na dai lamu ga hta arawng sadang lu wa na ra ai.

²Nsin kata hta hkawm nga ai amyu masha ni gaw nhtoi kaba hpe mu lu manu ai. Shanhte gaw si hkrung si htan mung na shingnip ni hta nga nga ma ai, rai ti mung ya chyawm gaw dai nhtoi shanhte a ntsa e htoi leng nga sai.

³Madu e, nang gaw shanhte hpe kabu gara lam kaba jaw ya nit dai; nang gaw shanhte hpe kabu gara shangun nga nit dai. Shanhte gaw nang galaw dan sai amu a majaw, amyu masha ni nsi shu la lu ai shaloi hte shanhte sut gan lanep karan la lu ai shaloi kabu ai zawn kabu gara ma ai.

⁴Shanhte hpe lit shali shangun ai kandang hte shanhte a lahpa hpe adup ai hkawn ni hpe nang agrawp shadaw kau ya nit dai. Lai sai aten, Midian hpyen luksuk ni hpe nang anut dang kau ai zawn na a amyu masha ni hpe dip gamyet sha ai hte n-gun maku daw sha nga ai amyu baw hpe nang dang kau nga nit dai.

⁵Shang gasat ai luksuk a hpyen hkyepdin ni hte shanhte a sai galu ai hpun nba ni yawng, wan hte jahten kau hkrum na mara ai.

⁶Anhte a matu kasha langai shangai sai! Anhte hpe shadang sha jaw mi ai! Shi gaw anhte a up hkang du tai na ra ai. Shi gaw, “Mauhpa Wa, Hpaji Daw Ai Wa, Chyahtum Chyalai N-gun Rawng Ai Karai Kasang, Htani Htana Kawa, Ngwi pyaw Sim Sa Ai A Hkawhkam Kasha,” ngu nna shamying hkrum na ra ai.

⁷Shi a hkawseng daru magam n-gun gaw matut nna galu kaba wa na ra ai; shi a mungdan tut nawng ngwi pyaw sim sa na ra ai. Shi gaw Hkawhkam Dawi a hkringhtawng dagraw ai wa zawn up hkang nna, shi a daru magam n-gun gaw ding man ai hte teng man rap ra ai hta rudi nga ai rai nna, ya kaw nna jahtum ai aten du hkra agrin nga na ra ai. Chyahtum Chyalai N-gun rawng ai dai MADU gaw ndai amu yawng galaw na matu daw dan da nga sai.

⁸Dai Madu gaw Israela mung a ntsa hte Yaku a matu mara ni a ntsa e, tara jeyang na lam tsun shana dat wu ai.

⁹Israela amyu masha ni yawng hte Samari mare hta shanu nga ai masha hkum shagu hte gaw shi galaw dan sai ndai amu hpe chye wa na mara ai. Ya chyawm gaw, shanhte gumrawng gumtawng ai hte myit tsaw myit dap nga ma ai. Shanhte gaw,

¹⁰“Wut dum nta ni kadawng daw mat sai, rai ti mung anhte de a shara hta nlung dum nta ni hpe gaw gap da na ga ai. Lakum hpun ngauring ni hpe kran daw kau sai, rai ti mung anhte de a shara hta manu dan ai arit hpun ngauring ni hpe galai bang da na ga ai,” ngu nna tsun ma ai.

¹¹Dai MADU gaw shanhte hpe gasat na matu shanhte a gumlau hpyen ni hpe shalut ya nu ai.

¹²Sinpraw maga nga ai Suri mung hte sinna maga nga ai Hpilisti mung ni gaw Israela hpe mayu kau na matu shanhte a n-gup ni hpe mahka tawn da manu ai. Dai rai tim pyi, dai MADU a masin kahtet ai gaw kawp mat ai n rai; shi a lata gaw ari jaw na matu naw ladawn da nga ai.

¹³Chyahtum Chyalai N-gun rawng ai dai MADU gaw shanhte hpe ari jaw tim pyi, Israela amyu masha ni myit malai ma ai n rai, shanhte shi kaw nhtang wa ma ai n rai.

¹⁴Dai MADU gaw lani mi hta sha Israela ningbaw ni hte amyu masha ni hpe ari jaw na ra ai; shi gaw shanhte hpe dan di ai hte abaw hte ningmai hpe kahtum daw kau na ra ai.

¹⁵Asak kaba sai ni hte arawng lu ai masha ni gaw abaw rai nna, masu magaw ga sharin ya ai myihtoi ni chyawm gaw ningmai rai nga ai.

¹⁶Ndai amyu masha ni hpe lam woi ai ni gaw shanhte hpe lam shadam kau manu ai, shanhte hpe tsep kawp kashuk kashak shabyin kau manu ai.

¹⁷Dai rai nna Amyu masha ni yawng gaw karai kata ai hte n hkru nna shanhte tsun ai lam magup n hkru nga ai majaw Madu gaw shabrang langai mi hpe pyi shalawt dat na wu ai n rai; shi gaw gaida gaina ni hte jahkrai nmai ni kadai hpe mung matsan dum ai myit madun dan na wu ai n rai. Dai rai tim pyi, dai MADU a masin kahtet ai gaw kawp mat na n rai, rai ti mung shi a lata gaw ari jaw na matu naw ladawn da nga na ra ai.

¹⁸Amyu masha ni a tara n lang ai amu gaw ju sumwum hte ju hpun ni hpe hkru kau ai wan hte bung nga ai. Dai gaw wan hkut shadaw shalun dat ai maling htinggram wan zawn jahkru kau nga ai.

¹⁹Chyahtum Chyalai N-gun rawng ai dai MADU gaw pawt sindawng nga ai majaw, shi jaw ai ari gaw mungdan ting hkru mat wa ai wan zawn hkru nga nna, amyu masha ni hpe jahten kau nga ai, masha ni gaw shanhte a kahpu kanau ni hpe ngam da na n rai.

²⁰Mungdan kata shara shagu hkan shanu nga ai amyu masha ni gaw, shanhte tam la lu ai ahkyep alep re ai lusha kaji kajaw hpe gare sha ma ai, rai ti mung shanhte a kawsi kyet ai gaw galoi mung myit dik lu ai n rai. Shanhte gaw shanhte a kashu kasha ni hpe pyi sha nga ma ai!

²¹Manashe hte Ehprim amyu masha ni gaw shada da gasat hkat ma ai, shan lahkawng gaw Yuda hpe jawm gasat ma ai. Dai rai tim pyi, dai MADU a masin kahtet ai gaw kawp mat ai n rai; shi a lata gaw ari jaw na matu naw ladawn da nga ai.