Read Jinghpaw Common Language Bible 2009 JAW JAU 10 Bible Online

JAW JAU 10 - Jinghpaw Common Language Bible 2009 bible

JAW JAU 10

¹Arun a shadang sha yan rai nga ai Nadab hte Abihu yan gaw tinang hte seng ai wan ban pa la nna chyi nga ai wan n-ga bang la let dai hta lawban jat bang nhtawm dai MADU hpe nawng jau ya ma ai. Rai ti mung dai wan mahtang n chyoi n pra nga ai; dai hpe nawng jau na matu mung dai MADU gaw shan hpe hkang da nga ai n rai.

²Dai MADU gaw wan akajawng sha dat dat nna shan hpe hkru kau ai hte shan mung dai MADU a man e si taw nga ma ai.

³Dai hpang Mawshe gaw Arun hpe, “Da ndai gaw, ‘Ngai hpe daw jau ai ni yawng nye a chyoi pra ai ban hpe hkungga lu na rai nna, nye a amyu masha ni hpe nye a hpung shingkang madun dan na we ai,’ nga nna dai MADU tsun ai gaw ndai zawn re ai lam hpe shi tsun ai re,’” ngu nna tsun wu ai. Rai ti mung Arun mahtang atsin sha nga nga wu ai.

⁴Mawshe gaw Arun a kawa doi Uziela a kasha Mishaela yan Elasahpan hpe shaga la nhtawm, “Nang de sa wa mi, nanhte a jinghku hkum tsawp ni hpe Chyoi Pra ai Sum kaw na hpai shapraw la nhtawm dap shinggan e shan hpe la shapraw da mu,” ngu nna tsun wu ai.

⁵Dai rai nna shan gaw Mawshe hkang da ai hte maren, sit sa nna palawng galu hte re ai si mang hpe dai shinggan de la shapraw kau ma ai.

⁶Dai hpang Mawshe gaw Arun hte shi a shadang sha yan rai nga ai Eleaza hte Ihtama hpe, “Nanhte sharung shayawt nga myit dai hpe madun dan na matu nanhte a kara hkum hpyan kau myit; nanhte a hpun palawng ni hpe mung hkum gang je kau myit. Dai hku galaw ai rai yang si na rai myit dai. Dai MADU mung shawa hpung ting hpe pawt sindawng na rai wu ai. Dai MADU shangun dat ai wan a majaw byin ai rai nga ai; Rai ti mung kaga nanhte a hpu nau Israela masha ni yawng dai si hkrung si htan a matu sharung shayawt na ahkang lu nga myit dai.

⁷Nanhte gaw dai MADU a namman sau chya nna ap nawng da hkrum manit dai majaw si ai mung n hkrum myit ga; Sum a shang wa chyinghka shinggan de hkum pru myit,” ngu nna tsun wu ai. Shanhte mung Mawshe tsun ai hte maren galaw ma ai.

⁸Dai MADU gaw Arun hpe,

⁹“Nang hte na a shadang sha ni gaw sabyi ntsin hte chyaru lu nang ai shaloi, nye a hpung shingkang shanu nga ai Sum kata de shang lu na myit dai n rai; dai zawn nanhte galaw hkrup myit dai rai yang, si na rai myit dai. Dai gaw nanhte a lakung lama ni yawng hkan sa shadik shatup na tara langai rai nga ai.

¹⁰Karai Kasang hte seng ai hte shawa lang ai arai hpe mung, san seng ai hte n san n seng ai hpe mung nanhte chye ginhka lu na rai myit dai.

¹¹Mawshe hpe ngai jaw ya sai tara ni yawng hpe mung, Israela amyu masha ni hpe nanhte sharin achyin ya lu na rai myit dai,” ngu nna tsun wu ai.

¹²Mawshe gaw Arun hte naw ngam nga ai Arun a shadang sha Eleaza yan Ihtama hpe, “Dai MADU hpe nawng ya ai lusha hta na naw ngam ai shadung hkungga hpe la nhtawm matsi n rawng ai muk hte tawn hkungri a makau e sha lu na rai myit dai; hpa majaw nga yang dai hkungga gaw grai chyoi pra nga ai.

¹³Dai hpe chyoi pra ai shara langai mi hta sha mu; dai gaw dai MADU hpe nawng jau ai hkungga hta na nang hte na a shadang sha ni a matu rai nga ai. Dai gaw dai MADU ngai hpe hkang da ai lam rai nga ai.

¹⁴Rai ti mung hkinjawng ni a matu ngu nna dai MADU hpe laksan kumhpa hku nawng jau ai sinda hte hpang lagaw hpe nang hte na a dinghku masha ni sha mai nga ai. Dai hkungga ni gaw Israela amyu masha ni jaw jau ai mahku hkungga ni hta na nang hte na a kashu kasha ni hpe jaw da sai kamhtaw rai nga ai.

¹⁵Dai MADU hpe lusha hkungga hku nawng ya ai sau man hte hpawn, hpang lagaw hte sinda hpe mung shanhte la sa na rai ma ai. Dai gaw dai MADU hkang da ai hte maren nang hte na a kashu kasha ni prat dingsa madu lu na kamhtaw rai nga malit dai,” ngu nna tsun wu ai.

¹⁶Mawshe gaw htingrai hkungga a matu bainam tam san shaja nga yang, dai hpe nat kau nga manu ai hpe chye wu ai. Dai lam a majaw Eleaza hte Ihtama yan hpe shi pawt wu ai rai nna,

¹⁷shi gaw, “Hpa majaw chyoi pra ai shara hta htingrai hkungga hpe nan sha myit ni? Dai gaw grai chyoi pra ai rai nna shawa hpung ting a yubak mara la kau ya na matu nanhte hpe dai MADU jaw da manit dai.

¹⁸De a asai hpe mung chyoi pra ai Sum de n la shang wa ai majaw ngai hkang da ai hte maren dai yang e shanhte dai hkungga shan sha ang na rai myit dai,” ngu nna tsun wu ai.

¹⁹Arun gaw, “Dai ni ngai htingrai hkungga sha kau ai rai yang, dai MADU ra sharawng na nu ai kun? Ndai amyu masha ni dai MADU hpe dai ni htingrai hkungga nawng ya ai hte wan nat hkungga la sa ma ti mung, dai hkrit hpa amu ni ngai hta naw byin nga ai,” ngu nna htan wu ai.

²⁰Dai ga hpe Mawshe na wu ai shaloi shi myit dik nga wu ai.