Read Jinghpaw Common Language Bible 2009 JAW JAU 13 Bible Online

JAW JAU 13 - Jinghpaw Common Language Bible 2009 bible

JAW JAU 13

¹Dai MADU gaw ndai hkan sa na tara ni Mawshe yan Arun hpe jaw ya wu ai.

²Marai langai ngai shi a hpyi hta ningma hpye ai rai yang mung, shakrwi tu ai rai yang mung, kahtet kaba kau nna manggang maga gale mat wa ai rai yang mung shi gaw Arun hte shi a shadang sha hkinjawng ni hpang de sa na rai wu ai.

³Dai hkinjawng wa gaw hpye ai ningma hpe san jep yu nna, dai ningma hta tu ai mun hpraw ai hte dai ningma hkang gaw makau grup grup na hta grau sung ai hku dan dawng wa nna manggang ana rai yang chyawm gaw dai masha wa n san n seng nga sai, ngu nna hkinjawng wa tsun na rai wu ai.

⁴Rai ti mung hpye ai ningma gaw hpraw nna dai ahpyi grup yin grau n sawng wa ai sha amun mung n hpraw wa yang gaw hkinjawng wa dai ana kap ai wa hpe sanit ya tup kaga san rai tawn da na rai wu ai.

⁵Sanit ya du ai shani e, hkinjawng wa shi hpe bai jep yu nna shi a hpyi shan hta hpye ai ningma n yawm n jat mat ai rai yang, shi hpe sanit ya tup san san bai tawn da na rai wu ai.

⁶Sanit ya nhtoi bai du ai shani hta hkinjawng wa shi hpe bai jep yu nna shi a hpye ai ningma yawm mat nna n kaba jat wa ai rai yang, hkinjawng wa gaw shi hpe san seng sai ngu nna tsun na rai wu ai. Dai gaw gyi ku ku ai sha rai nna dai wa mung shi a hpun palawng ni hkrut nhtawm san seng wa lu na rai wu ai.

⁷Rai ti mung hkinjawng wa shi hpe jep yu ngut ai hpang, dai hpye ai ningma naw kaba jat wa ai rai yang chyawm gaw shi gaw hkinjawng wa a man e bai dan pru lu na rai wu ai.

⁸Hkinjawng wa shi hpe bai jep yu nhtawm dai gyi ku ningma shi a hpyi shan hta kaba jat wa ai rai yang, hkinjawng wa gaw shi hpe n san n seng nga ai nga nna tsun na rai wu ai; dai gaw manggang ana rai nga ai.

⁹Manggang ana kap ai wa chyawm gaw hkinjawng wa hpang de woi sa ai hkrum nna shi hpe jep yu na rai wu ai.

¹⁰Hpye ai ningma gaw hpyi shan hta hpraw nna, mun ni hpraw wa nhtawm matswi hkrai pri rai yang mung,

¹¹dai gaw machyi chyana ai hpyi shan ana langai rai nga ai. Dai rai nna hkinjawng wa mung shi hpe n san n seng nga ai ngu nna tsun na rai wu ai. Shi gaw asan apra sha n san n seng nga ai majaw kaga san tawn jahka da na lam n ra nga ai.

¹²Dai hpyi shan ana mahtang dai wa hta chyam bra wa nna baw kaw na lagaw du hkra ka-up nga ai rai yang, hkinjawng wa shi hpe bai jep ya na rai wu ai.

¹³Shi a hkum ting hta ka-up da ai hpe shi teng teng mu ai rai yang, shi san seng nga sai ngu nna tsun na rai wu ai. Shi a hkum ting na hpyi shan hpraw nga ai rai yang, shi san seng nga sai.

¹⁴Rai ti mung dai aten hta hpye ai ningma bai dawng wa ai rai yang, shi n san n seng nga ai.

¹⁵Hkinjawng wa bai jep yu nhtawm hpye ai ningma hpe asan sha naw mu mada ai rai yang, shi n san n seng nga ai ngu nna hkinjawng wa tsun na rai wu ai. Dai hpye ai ningma gaw n san n seng ai ana rai nna dai gaw manggang rai nga ai. Masha mung n san n seng nga ai.

¹⁶Rai ti mung, hpye ai ningma hpe tsi kau ngut ai hpang bai hpraw wa yang gaw, hkinjawng wa hpang de bai sa madun na rai wu ai;

¹⁷shi hpe bai jep yu na rai wu ai. Dai hpye ai ningma bai hpraw wa lu yang gaw shi san seng nga sai rai nna hkinjawng wa mung shi hpe san seng sai ngu nna tsun na rai wu ai.

¹⁸Marai langai ngai hta shakrwi tu nna, mai mat ai hpang,

¹⁹dai shakrwi hkang hta hpraw akawng ai, shing n rai pang rai hkyeng ai byin pru wa yang, dai wa hkinjawng wa kaw sa na rai wu ai.

²⁰Dai hpe hkinjawng wa jep yu yang, dai ningma kap ai shara mahtang grup yin hpyi shan hta grau sawng ai zawn nawn nna mun hpraw wa yang gaw hkinjawng wa shi hpe n san n seng ai wa ngu na rai wu ai. Dai gaw shakrwi hta na byin pru wa ai manggang rai nga ai.

²¹Rai ti mung hkinjawng wa jep yu yang mun n hpraw, grup yin hpyi shan hta grau n sawng ai sha, mi na nsam raw rai yang, hkinjawng wa shi hpe sanit ya tup kaga san tawn da na rai wu ai.

²²Shi a hpyi shan hta chyam bra wa yang gaw hkinjawng wa shi hpe n san n seng ai wa ngu na rai wu ai. Shi mung ana ahkya kap nga ai.

²³Rai ti mung kaga mi n sawng ai sha, ningma mung n chyam mat ai rai yang, dai gaw shakrwi hkang rai nga ai. Dai rai nna hkinjawng wa mung shi hpe san seng sai ngu nna tsun na rai wu ai.

²⁴Masha langai ngai wan hkru ai a majaw shan katsing hta hpraw wa ai, shing n rai pang rai hkyeng pru wa ai rai yang,

²⁵hkinjawng wa shi hpe jep yu na rai wu ai. Dai ningma kap ai shara hta hpraw ai hte dai gaw kaga grup yin na hpyi shan hta hkyawk rai sawng ai hku byin pru yang, dai gaw wan hkru hkang na manggang rai nga ai. Hkinjawng wa mung shi hpe n san n seng ai ngu nna tsun na wu ai.

²⁶Rai ti mung dai ningma hta tu ai mun n hpraw, kaga grup yin na hpyi shan hta grau n hkyawk ti mung nsam majing naw rai nga yang hkinjawng wa gaw shi hpe sanit ya tup kaga san tawn da na rai wu ai.

²⁷Sanit ya bai du ai shani e, hkinjawng wa shi hpe bai jep yu nna ningma chyam bra nga ai rai yang, dai gaw manggang langai mi rai nga ai. Hkinjawng wa mung shi hpe n san n seng ai ngu nna tsun na rai wu ai.

²⁸Rai ti mung ningma hkang dai n jat, hpyi shan hta mung n chyam bra wa ai sha, nsam mung mi na raw rai yang, dai gaw manggang n rai nga ai. Dai gaw wan hkru hkang she rai nga ai majaw hkinjawng wa shi hpe san seng sai ngu na wu ai.

²⁹Numsha lasha kadai mung abaw shing n rai nhka hta hpye ai ningma kap jang, hkinjawng wa dai hpe jep yu na rai wu ai.

³⁰Dai gaw grup yin hpyi shan hta grau hkyawk ai zawn rai nna mun singgawng kaji ai hte htoi htoi re ai rai yang, dai gaw manggang langai rai nga ai. Hkinjawng wa mung dai wa hpe n san n seng ai ngu na rai wu ai.

³¹Hkinjawng wa shi hpe jep yu yang, ningma hkang n hkang ai sha grup yin hpyi shan ni hta grau n hkyawk ai rai tim, dai baw hta kara kaja n tu ai rai yang hkinjawng wa shi hpe sanit ya tup kaga san tawn da na rai wu ai.

³²Hkinjawng wa mung sanit ya ngu na shani hta hpye ai ningma hpe bai jep yu na rai wu ai. Dai ningma n chyam bra ai sha dai hta na kara singgawng ni mung htoi htoi n re ai hte grup yin na hpyi shan ni hta grau n hkyawk ai rai yang,

³³ana kap ai hte hpe shawan da nhtawm gale de na mun yawng hpe shangun kau na rai wu ai. Hkinjawng wa mung shi hpe sanit ya tup jahka da na rai wu ai.

³⁴Sanit ya bai du ai shani hta, hkinjawng wa dai ningma hpe bai jep yu yang, dai ana grau n chyam bra wa ai hte grup yin hpyi shan hta grau n hkyawk jat ai zawn rai yang, hkinjawng wa shi hpe san seng nga ai ngu na rai wu ai. Dai wa mung shi a hpun palawng ni hpe hkrut ai hte san seng ai wa tai wa nga sai.

³⁵Rai ti mung, shi hpe jasan jaseng ngut ai hpang, dai ningma bai chyam bra wa ai rai yang,

³⁶hkinjawng wa shi hpe bai jep yu na rai wu ai. Dai ningma bai chyam bra wa ai rai yang, kara singgawng ni htoi n htoi gawn shara n nga sai.

³⁷Rai ti mung hkinjawng wa myit yu ai hta dai ningma n maden jat ai sha kara singgawng ni mung baw hta akaja sha tu nga ai rai yang, dai ningma mai tsai nu ai rai nna hkinjawng wa mung dai wa hpe san seng nga sai ngu na rai wu ai.

³⁸Numsha lasha kadai hta mung hpyi shan hta ahpraw pang rai pru wa yang,

³⁹hkinjawng wa gaw dai wa hpe jep yu na rai wu ai. Dai hpyi shan pang re ai hta mut mut rai hpraw ai rai yang, dai gaw hpyi shan hta na pru wa ai maru sha rai nga ai. Dai wa gaw htung hte maren san seng nga ai.

⁴⁰Masha langai mi hta shingdu aman baw krin mat ai rai tim, dai gaw shi hpe n san n seng shangun nga ai n rai.

⁴¹

⁴²Rai ti mung krin ai shara hta hpraw hkyeng re ai ningma pru yang, dai gaw manggang ana rai nga ai.

⁴³Hkinjawng wa gaw shi hpe jep yu nna dai hta e hkyeng hpraw ningma nga ai rai yang,

⁴⁴shi a baw hta kap ai manggang a majaw hkinjawng wa shi hpe n san n seng ai ngu na rai wu ai.

⁴⁵Manggang kap ai wa gaw je ai hpun palawng ni hpe bu hpun nna kara hpyan kau nhtawm shi a myi man lawu daw magap da let, “N san n seng ai, n san n seng ai,” ngu nna jahtau na rai wu ai.

⁴⁶Shi hta ana kap nga dingsa n san n seng nga ai rai nna dai shinggan kaga masha ni hte tsan ai shara hta nga nga na rai wu ai.

⁴⁷Nshu lamu kap ai hpun nba gaw sagu nba shing n rai lachyit nba,

⁴⁸lachyit sumpan, sagu sumpan, shanhpyi hte galaw ai arai hpa hta rai ti mung,

⁴⁹tsit tsit hkyeng hkyeng re ai rai yang, dai gaw nshu lamu hpra jawng nga ai rai nna hkinjawng wa hpe madun dan na rai wu ai.

⁵⁰Hkinjawng wa gaw dai hpe jep yu nna dai arai hpe sanit ya tup la tawn da na rai wu ai.

⁵¹Shi gaw dai hpe sanit ya nhtoi du jang bai jep yu na rai wu ai. Nshu lamu ni hpra mat wa ai rai yang, dai arai gaw n san n seng nga ai.

⁵²Hkinjawng wa gaw dai hpe nat kau na rai wu ai; dai gaw nshu lamu ni hte hpra jawng nga ai majaw wan nat kau lu na rai nga ai.

⁵³Rai ti mung dai hpe hkinjawng wa jep yu yang, dai arai hta nshu lamu

⁵⁴n hpra jat ai hpe shi mu jang dai hpe hkrut kau na ahkang shi jaw nhtawm sanit ya tup bai la tawn da na rai wu ai.

⁵⁵Dai hpang shi bai jep yu nna dai gaw kaga mi n hpra jat ti mung, nsam ahpraw n galai ai rai yang, dai gaw n san n seng naw rai nga ai. Dai gaw shingdu aman tsam mat nga sai majaw dai hpe nang nat kau na rai nga ai.

⁵⁶Rai ti mung hkinjawng wa dai hpe bai jep yu nna nshu lamu dai hpoi mat ai rai yang, shi gaw dai hpun nba hte shanhpyi ni hta kap ai hpe gang je kau na rai wu ai.

⁵⁷Dai hpang nshu lamu ni naw byin pru wa nna bai hpra wa ai rai yang, arai madu wa gaw dai hpe nat kau na rai wu ai.

⁵⁸Shi gaw dai arai hpe hkrut nna dai nshu lamu hkang mat mat ai rai yang, dai hpe shi bai hkrut nhtawm san seng mat na rai nga ai.

⁵⁹Ndai gaw san seng ai hte n san n seng ai lam hpe yu yu nna daw dan na matu nshu lamu kap ai sagu nba, lachyit nba, sagu sumpan, shanhpyi hte galaw ai arai ni hte seng ai tara rai nga ai.