Read Jinghpaw Common Language Bible 2009 JAW JAU 15 Bible Online

JAW JAU 15 - Jinghpaw Common Language Bible 2009 bible

JAW JAU 15

¹Dai MADU gaw Israela amyu masha ni a matu hkan sa na tara ni

²Mawshe yan Arun hpe jaw wu ai. Lasha ni kadai mung tinang a la hkrang kaw ari ri ai rai yang, dai zawn re ai gaw n san n seng nga ai.

³La hkrang kaw na yan pru ai rai tim, hkring mat ai rai tim, dai gaw n san n seng nga ai.

⁴Shi dung ai shing n rai kaleng ai yup ra hpa mung n san n seng nga ai.

⁵Shi a yup ra sa hkra ai wa kadai mung shing n rai,

⁶shi dung ai shara hta hkan dung ai wa kadai mung tinang a hpun palawng hpe hkrut kau nna hka shin na rai wu ai. Shi gaw shana de du hkra n san n seng naw rai nga ai.

⁷Dai masha wa hpe hkra ai wa kadai mung dai ari ana a majaw tinang a hpun palawng hkrut kau nna hka shin lu na rai wu ai. Dai gaw shana de du hkra n san n seng naw rai nga ai.

⁸Masha langai mi gaw htung hte maren san seng nga ai wa hpe shi a mayen mahtaw bun ai rai yang, dai wa gaw shi a hpun palawng ni hpe hkrut kau nna hka shin na rai wu ai; dai gaw shana de du hkra n san n seng naw rai nga ai.

⁹Ari ri ai wa jawn ai hking shing n rai, dung shara hpa mung n san n seng nga ai.

¹⁰Dai wa dung ai npu na arai sa hkra ai wa kadai mung shana de du hkra n san n seng naw rai nga ai; dai arai ni hpai ai wa mung shi a hpun palawng ni hpe hkrut nna hka shin kau na rai wu ai. Dai gaw shana de du hkra n san n seng naw rai nga ai.

¹¹Ari ana lu ai wa lata n shin ai sha masha kaga hpe ahtawk hkra ai rai yang, dai wa gaw shi a hpun palawng ni hpe hkrut kau nna hka shin na rai wu ai; dai gaw shana de du hkra n san n seng naw rai nga ai.

¹²Dai wa hkra ai ga di bu hpe mung agrawp kau na rai wu ai; shi gaw hpun hte galaw ai ntsin htung sa hkra ai rai yang, dai hpe kashin kau lu na rai nga ai.

¹³Ari ana kap ai wa mai wa yang, shi hpe sanit ya tup la yu nna shi a hpun palawng hkrut kau nhtawm hka hpawk hta shin na rai wu ai, shaloi shi san seng wa na ra ai.

¹⁴Matsat ya ngu na nhtoi hta dai wa gaw dai MADU a hpung shingkang shanu nga ai Sum a shang wa chyinghka lam de hkrudu lahkawng shing n rai ura kasha lahkawng la sa nna hkinjawng wa hpe ap ya na rai wu ai.

¹⁵Hkinjawng wa mung htingrai hkungga a matu langai, wan nat hkungga a matu langai shatai nna nawng ya na rai wu ai. Ndai hku nna dai wa a matu jasan jaseng ai amu shi hkan shatsup ya na rai wu ai.

¹⁶Lasha langai azu shapraw ai rai yang, shi a hkum ting hpe hka shin kau na rai wu ai. Dai gaw shana de du hkra n san n seng naw rai nga ai.

¹⁷Azu hte hkra ai hpun palawng hte shanhpyi arai hpa hpe mung hkrut kau na rai wu ai. Dai gaw shana de du hkra n san n seng naw rai nga ai.

¹⁸Lasha hte numsha kanawn ngut ai hpang shan lahkawng gaw hka shin kau na rai ma ai; dai gaw shana de du hkra n san n seng naw rai nga ai.

¹⁹Numsha gaw shi a num hking sa ai shaloi shi hta sanit ya tup n san n seng nga ai; Shi hpe sa hkra ai wa mung shana de du hkra n san n seng naw rai nga ai.

²⁰Shi a num hking sa nga ai laman, shi dung kaleng ai hpa hta mung n san n seng nga ai; shi a yup ra hte shi dung ai arai sa hkra ai wa kadai mung,

²¹shi a hpun palawng ni hpe hkrut nna hka shin na rai wu ai. Shi gaw shana de du hkra n san n seng naw rai nga ai.

²⁴Num hking sa nga ai numsha hte kanawn ai lasha gaw shi a n san n seng ai majaw awu asin rai nga ai rai nna sanit ya tup n san n seng nga ai. Shi kaleng ai yup ra mung n san n seng naw rai nga ai.

²⁵Numsha gaw num hking sa ai hta kaga nhtoi na na sai su ai rai yang, dai sai su n sim dingsa num hking n seng yang na zawn dai numsha gaw n san n seng naw rai nga ai.

²⁶Shi kaleng ai yup ra hte shi dung ai shara ni mung dai sai su nga ai laman n san n seng nga ai.

²⁷Dai arai ni hpe hkra ai wa kadai mung n san n seng nga ai rai nna shi a hpun palawng ni hpe hkrut kau nna hka shin na rai wu ai. Shi gaw shana de du hkra n san n seng naw rai nga ai.

²⁸Shi a sai su ai hkring mat ai hpang nhtoi sanit ya la ra lu na rai nga ai, dai hpang shi gaw htung hte maren san seng na ra ai.

²⁹Matsat ya du ai shani e, hkrudu lahkawng shing n rai ura lahkawng la nna dai MADU a hpung shingkang shanu nga ai Sum a shang wa chyinghka lam hta hkinjawng wa kaw sa ap ya na rai wu ai.

³⁰Hkinjawng wa mung htingrai hkungga a matu langai mi, wan nat hkungga a matu langai mi shatai nna nawng na rai wu ai. Ndai hku nna shi a matu jasan jaseng ai amu hkan shatsup ya na rai wu ai.

³¹Dai MADU gaw Israela amyu masha ni a n san n seng ai lam hte seng nna shanhte hpe shadum jahprang na matu Mawshe hpe tsun wu ai; shing rai dap ka-ang e nga ai dai hpung shingkang hte hpring ai Sum hpe shanhte awu asin di lu na ma ai n rai. Shanhte galaw kau hkrup ai rai yang, sat kau ai hkrum na ma ai.

³²Ndai hte gaw ari ana, azu shapraw ai lasha,

³³hking lang ai numsha, n san n seng ai numsha hte kanawn ai lasha a lam ni hte seng ai tara ni rai nga ai.