Read Jinghpaw Common Language Bible 2009 JAW JAU 18 Bible Online

JAW JAU 18 - Jinghpaw Common Language Bible 2009 bible

JAW JAU 18

¹Dai MADU gaw Mawshe hpe

²ning ngu Israela amyu masha ni hpe tsun na matu hkang da wu ai: “Ngai gaw dai MADU nanhte a Karai Kasang rai nga nngai.

³Nanhte kalang mi nga lai wa yu sai Egutu mung na masha ni hte ya ngai nanhte hpe woi tawn da nga ai Hkanan mung na masha ni a arawn alai htung lailen hkan lu na myit dai n rai.

⁴Nye a tara ni hpe madat mara let ngai hkang da ai ga ni hpe hkan galaw lu na rai myit dai. Ngai gaw dai MADU nanhte a Karai Kasang rai nga nngai.

⁵Ngai nanhte hpe jaw da ai hkan sa lam ni hte tara ni hta hkan nang lu na rai myit dai. Dai hpe hkan galaw ai a jaw e, nanhte asak hkrung nga lu na rai myit dai; ngai gaw dai MADU nan rai nga nngai.”

⁶Dai MADU gaw ndai hkan sa na lam ni jaw ya nga sai. Tinang hte n daw n hkrang ai ni hte jauwawng wawng lu na n rai.

⁷Na nnu hte kanawn nna na nwa a sari hkum jahten ya et; na nnu majing a myi man jasum ya lu na n rai.

⁸Tinang a kawa a madu jan hte kanawn nna nwa a sari hkum jahpoi ya et.

⁹Na a kajan hte mung, nta langai ngai hta na nang hte rau n kaba wa ai mi rai rai, rau kaba wa ai mi rai rai, na a kajan daw ai hte kanawn lu na n rai.

¹⁰Na a kashu shayi sha hte kanawn lu na n rai; shing re ai gaw nang hpe sari jahpoi ya na ra ai.

¹¹Kanu kaga ga rai ti mung kawa pawng ai kajan hte hkum kanawn et, shi gaw na a kajan rai nga ai.

¹²Kawa a kajan hte mung hkum kanawn et; shi gaw na nwa a kajan shing n rai nnu a kanau rai nga ai.

¹⁴Na a kawa di a kajan hte kanawn lu na n rai. Shi gaw na a kanu tung rai nga ai.

¹⁵Na a kanam jan hte kanawn lu na n rai.

¹⁶Na a nrat hte mung kanawn lu na n rai.

¹⁷Nang kanawn yu sai numsha langai a shayi sha hpe mung, kashu shayi sha hte mung kanawn lu na n rai; shanhte gaw nang hte sai shan rum nga ma ai majaw dai gaw jauwawng wawng ai amu rai nga ai.

¹⁸Na a madu jan hkrung nga dingsa na a madu jan a kanau hpe na a madu jan zawn la lu na n rai.

¹⁹Num hking lang ai num hte hkum kanawn, hpa majaw nga yang, shi gaw n san n seng nga ai.

²⁰Nang hpe awu asin di shangun mai ai dai kaga masha wa a madu jan hte hkum kanawn et.

²¹Molek karai nawku ai hta na a kashu kasha ni kadai hpe mung ap ya lu na n rai; hpa majaw nga yang, dai gaw MADU Karai Kasang a mying ningsang hpe sari jahpoi ya na rai wu ai.

²²Lasha kadai mung shada da kanawn lu na n rai; dai hpe Karai Kasang n dawng nga ai.

²³Numsha mung, lasha mung dusat hte kanawn lu na n rai; dai gaw n san n seng ai hku nang hpe lam shayit shangun nga ai.

²⁴Nanhte a shawng e dai MADU gawt kau nna nanhte shang shanu nga lu ai ndai mung hta shanu nga yu masai tara maigan masha ni gaw shing re ai lam ni a majaw matsat shabat di kau mu ai zawn nanhte a hkum ni hpe matsat shabat re ai arawn alai hte awu asin hkum di kau nga myit.

²⁵Shanhte a akyang lailen ni mung lamu ga hpe matsat shabat di kau shangun mu ai majaw dai MADU gaw dai lamu ga hpe ari jaw nhtawm dai mung e shanu nga ai masha ni hpe ningdang kau nga ai.

²⁶Shanhte yawng gaw dai zawn re ai matsat shabat amu galaw nna mungdan hpe n san n seng shangun nga ai; rai ti mung nanhte chyawm gaw dai ni zawn galaw lu na myit dai n rai. Nanhte hte rau nga nga ai Israela masha ni hte maigan masha ni gaw dai MADU a tara ni hte hkang da ai ga ni hpe hkan sa shadik shatup lu na rai myit dai.

²⁸Shaloi nanhte a shawng e shanu nga yu sai tara maigan masha ni matsat shabat lam hkan galaw kau ai zawn dai lamu ga gaw nanhte hpe awu asin di na ra ai.

²⁹Shing re ai matsat shabat lam hkan ai wa kadai hpe mung Karai Kasang a amyu masha hta na sumri dan kau ai hkrum lu na rai nga ai gaw nanhte chye nga myit dai.

³⁰Dai MADU gaw, “Ngai jaw da made ai hkang da ai ga ni hpe madat mara nna nanhte a shawng e dai mung hta nga nga sai amyu masha ni a htung lailen ni hta hkum hkan nga myit. Ndai amu galaw let nanhte a hkum ni hpe matsat shabat hkum di kau nga myit. Ngai gaw dai MADU nanhte a Karai Kasang rai nga nngai,” ngu nna tsun wu ai.