Read Jinghpaw Common Language Bible 2009 JAW JAU 2 Bible Online

JAW JAU 2 - Jinghpaw Common Language Bible 2009 bible

JAW JAU 2

¹Kadai rai ti mung dai MADU hpe shadung hkungga nawng ya ai shaloi, shawng nnan dai hpe mani hkra rin nhtawm dai hta tsanlun sau ru jaw nna, lawban bang ai hte,

²Arun a shadang sha hkinjawng ni hpang de la sa na rai wu ai. San da hkrum ai hkinjawng wa gaw mani ai shadung, namman hte lawban hta na latup mi magra la nhtawm dai MADU hpe dai ni yawng nawng jau sai masat kumla langai zawn tawn hkungri ntsa e nat nawng na rai wu ai. Dai lusha a manam pyaw ai sangau hpe dai MADU awng sharawng nga ai.

³Ngam ai shadung hkungga gaw hkinjawng ni a matu rai nna dai MADU hpe lusha hkungga nawng ya ai hta na shaw la ai majaw dai gaw grai chyoi pra nga ai.

⁴Wan htung hta kabaw ngut sai muk hkungga rai yang dai hta matsi n bang ai sha galaw lu na rai nga ai. Dai gaw tsanlun sau hte kayau nna shadung hte galaw ai htat ai muk pa shing n rai tsanlun sau hte arut chya da ai muk hkrawp rai na rai nga ai.

⁵Hpri di dam ntsa e kaba ai muk hkungga rai yang, dai gaw tsanlun sau hte kayau nna matsi n rawng ai mani ai shadung hte rai na rai nga ai.

⁶Dai hpe hkungga zawn nawng jau ai shaloi ahkyep alep di nhtawm de a ntsa e namman ru bun na rai nga ai.

⁷Di jang hta kangau ai muk hkungga rai yang, tsanlun sau hte kayau ai mani ai shadung hte galaw na rai nga ai.

⁸Dai MADU hpang de shing re ai hkungga nawng ya na matu la sa nna, hkinjawng wa hpe ap ya nhtawm dai hpe tawn hkungri de la sa na rai nga ai.

⁹Hkinjawng wa gaw dai hta na daw chyen mi magra la nhtawm dai MADU hpe dai ni yawng nawng jau sai masat kumla zawn tawn hkungri ntsa e shi nat na rai wu ai. Dai lusha a manam pyaw ai sangau hpe dai MADU awng sharawng nga ai.

¹⁰Ngam ai gaw hkinjawng ni a matu rai nna, dai gaw dai MADU hpe lusha nawng ya ai hta na shaw la nga ai majaw grai chyoi pra nga ai.

¹¹Dai MADU hpe nanhte sak jaw ai shadung hkungga ni hpe matsi hte galaw lu na myit dai n rai; Dai MADU hpe nanhte lusha nawng jau myit dai shaloi matsi hte lagat ntsin galoi mung lang lu na n rai.

¹²Nanhte gaw shaning shagu shawng shu la lu ai nsi naisi sak jaw lu na matu dai MADU hpang de la sa na rai myit dai; rai ti mung dai ni hpe tawn hkungri ntsa nat lu na myit dai n rai.

¹³Nang hte Karai Kasang a lapran e ga shaka jum tawn da nga ai majaw shadung hkungga shagu hta jum bang lu na rai ndai. (Na a hkungga yawng hta jum bang lu na rai ndai.)

¹⁴Nang shu la lu ai nsi naisi hkungga hte dai MADU hpang de la sa ai shaloi kakang da sai nsi naisi shing n rai rin da sai lusha nawng jau na rai ndai.

¹⁵Dai hta tsanlun sau hte manam pyaw ai lawban ru bang na rai ndai.

¹⁶Hkinjawng wa gaw dai lusha hte sau nkau mi, lawban mahkra hte hpe daw jau na matu masat dingsat langai zawn dai MADU hpe lusha hkungga nawng ya na rai wu ai.