Read Jinghpaw Common Language Bible 2009 JAW JAU 22 Bible Online

JAW JAU 22 - Jinghpaw Common Language Bible 2009 bible

JAW JAU 22

¹Dai MADU gaw Arun hte shi a shadang sha ni hpe

²tsun na matu Mawshe hpe ning ngu hkang da wu ai: “Nanhte gaw nye a chyoi pra ai mying ningsang hpe jahpoi lu na n rai; dai rai nna ngai hpe nawng jau ai dai Israela amyu masha ni a chyoi pra ai hkungga ni hpe hkungga lara lu na rai myit dai. Ngai gaw dai MADU rai nga nngai.

³Na a amyu matu hta na hkinjawng wa n san n seng ai rai yang, nye a matu Israela amyu masha ni nawng ya ai dai chyoi pra ai hkungga arai ni de kahtep sa lu na n rai; tawn hkungri hta galoi mung daw jau lu na n rai ndai. Dai gaw prat mi hte prat mi agalaw nga na amu rai nga ai. Ngai gaw dai MADU rai nga nngai.

⁴“Arun a amyu hta na manggang gang nhtawm ari ri ai wa kadai mung shi san seng ai aten du hkra chyoi pra ai hkungga hpa hpe mung sha mai nga ai n rai. Hkinjawng wa gaw si mang hte seng ai arai hte azu hkaw ai hpe mung,

⁵n san n seng ai yam nga hte masha hpe hkra ai rai yang, n san n seng nga na wu ai.

⁶Shing re ai hkinjawng wa gaw n san n seng nga ai rai nna shana de du hkra n san n seng naw rai nga ai. Shi hka shin ngut ai aten du hkra chyoi pra ai hkungga lusha hpa hpe mung sha mai nga ai n rai.

⁷Jan shang ai hpang she, shi san seng na rai nna, dai hpang mahtang shi a chyoi pra ai lusha hkungga sha mai nga ai.

⁸Shi hkrai si mat ai hte matse labye ni e kawa sat ai yam nga ashan sha lu na n rai; dai gaw shi hpe n san n seng shangun na rai wu ai. Ngai gaw dai MADU rai nga nngai.

⁹“Hkinjawng ni yawng mung ngai jaw da sai tara ni hta hkan sa lu na rai ma ai. Shing n rai dai chyoi pra ai tara ni hpe shanhte n madat kau mu ai majaw mara shagun hkrum ai hte si mat na rai ma ai. Ngai gaw shanhte hpe shachyoi shapra ai dai MADU rai nga nngai.

¹⁰“Hkinjawng dinghku masha hta lawm ai ni chyu sha chyoi pra ai hkungga lusha hpa hpe mung sha mai nga ai; hkinjawng wa kaw nga ai wa mung, nchyang wa mung, kaga kadai kaw nga ai wa mung dai lusha sha lu na n rai.

¹¹Rai ti mung hkinjawng wa a mayam ni ngu na shi a gumhpraw hte mari da sai ni, shi a nta hta shangai ai ni chyawm gaw hkinjawng wa lu tawn ai lusha sha mai nga ai.

¹²Hkinjawng wa a shayi sha mahtang hkinjawng n re ai wa hte la hkat ai rai yang, chyoi pra ai hkungga hpa hpe mung sha lu na wu ai n rai.

¹³Rai ti mung gaida nna shing n rai la hte hka nna kasha n kap ai sha shi kawa a nta de wa shingbyi na nga, nhtang wa ai rai yang shi a kawa lu tawn ai hkinjawng lusha sha mai nga ai. Hkinjawng dinghku ni chyu sha dai lusha sha mai nga ai.

¹⁴“Hkinjawng dinghku hta na n re ai masha langai ngai n dum shami dai chyoi pra ai lusha hkungga sha hkrup ai rai yang, de a manu tup hte hpawn tsa lam shadang 20% bai jat ya nna hkinjawng wa hpe wa lu na rai wu ai.

¹⁵Ahkaw ahkang n lu ai masha wa hpe sha shangun ai a majaw hkinjawng ni dai chyoi pra ai lusha hkungga hpe awu asin di lu na mu ai n rai;

¹⁶shing re ai wa chyawm gaw mara lu nna ari hkam la na rai wu ai. Ngai gaw dai hkungga ni hpe shachyoi shapra ai dai MADU rai nga nngai.”

¹⁷Dai MADU gaw Arun hte shi a shadang sha ni hpe mung,

¹⁸Israela amyu masha ni yawng hpe hkan sa na tara ni jaw ya na matu Mawshe hpe hkang da wu ai. Israela amyu masha mi rai ti mung, Israela mung hta shanu nga ai maigan masha mi rai ti mung ga shaka shatup ai hkungga shing n rai jaw mayu hkungga hpe wan nat ai hku nawng jau ai rai yang,

¹⁹ra n rawng ai hkungga rai lu na rai nga ai. Dai gaw hkap la mai ai ra n rawng ai ala rai lu na rai nga ai.

²⁰Nang gaw ra rawng ai yam nga hpe hkungga nawng ya ai rai yang, dai MADU gaw dai hpe hkap la na wu ai n rai.

²¹Kadai rai ti mung dai MADU hpe mahku hkungga nawng jau ai hku ga shaka shatup ai hkungga hte jaw mayu hkungga jau ai shaloi hkap la mai ai ra n rawng ai yam nga rai lu na rai nga ai.

²²Myi hten ai, lagaw daw hten ai, hpye ai, bum akawng ai, machyit chyit ai, gyi ku ku ai zawn re ai yam nga ni hte dai MADU hpe nawng jau lu na myit dai n rai. Dai zawn re ai yam nga ni hpe lusha hkungga hku tawn hkungri hta nawng jau lu na myit dai n rai.

²³Jaw mayu hkungga a matu hkum kadun ai yam nga rai ti mung, hkum hkrang n hkum ai yam nga rai ti mung, nawng ya mai nga ai; rai ti mung dai gaw ga shaka hpe shatup ai shaloi hkap la nga ai n rai.

²⁴Dawn kau ai, kahtam hkra ai, galun htinggrang hkrum ai hte mahkyit je kau ai zawn re ai yam nga ni hte dai MADU hpe nawng jau lu na myit dai n rai; nanhte a mungdan hta dai zawn galaw lu na myit dai n rai.

²⁵Maigan wa a lata kaw na lu la ai yam nga hpa hpe mung lusha hkungga shatai nna nawng ya lu na myit dai n rai; dai zawn re ai yam nga ni gaw ra rawng nga ai hte n mai hkap la ai baw rai nga ai ngu, myit la ra na myit dai.

²⁶Sagu bainam hte dumsu kasha ni hkrat ai shaloi sanit ya laman kanu hte jahka lu na myit dai n rai; rai ti mung dai nhtoi lai jang chyawm gaw lusha hkungga shatai na hkap la mai nga ai.

²⁸Dumsu kanu hte de a kasha hpe mung, sagu kanu hte de a kasha hpe mung, bainam kanu hte de a kasha hpe mung nhtoi langai hta sha sat nawng lu na myit dai n rai.

²⁹Dai MADU hpe chyeju dum shagu hkungga nawng jau ai shaloi dai hpe hkap la lu hkra tara hte maren hkan galaw nga mu;

³⁰Dai shani jang, dai hkungga shan sha nhtawm hpang jahpawt du hkra ngam da lu na myit dai n rai.

³¹Dai MADU gaw, “Nye a hkang da ai ga ni hpe madat mara hkan sa nga mu; ngai gaw dai MADU rai nga nngai.

³²Nye a chyoi pra ai mying ningsang hpe hkum jahpoi nga myit; Ngai chyoi pra nga nngai hpe Israela amyu masha ni yawng yin la na mara ai. Ngai gaw nanhte hpe shachyoi shapra ai dai MADU rai nga nngai.

³³Nanhte a Karai Kasang tai na ngu nna ngai nanhte hpe Egutu mung kaw nna woi shapraw la ni ai. Ngai gaw dai MADU nan rai nga nngai,” ngu nna tsun wu ai.