Read Jinghpaw Common Language Bible 2009 JAW JAU 24 Bible Online

JAW JAU 24 - Jinghpaw Common Language Bible 2009 bible

JAW JAU 24

¹Dai MADU gaw Israela amyu masha ni hkan sa na lam jaw ya na matu Mawshe hpe tsun wu ai.

²Sum kata na pyengdin ni a matu kaja htum ai hte jet ai tsanlun sau hpe la sa shangun mu; shing rai jang dai wan gaw n si mat ai sha tut e achyi nga na rai wu ai.

³Chyoi Pra Htum ai Shara hta tawn da ai Ga Shaka Sumpu a man na nba grang a shinggan dai MADU a hpung shingkang shanu nga ai shara hta jahpawt du hkra chyi nga na matu, Arun gaw shana de shagu sa shatu da na rai wu ai. Dai gaw prat mi hte prat mi hkan galaw nga na tara rai nga ai.

⁴Arun gaw ja jet hte galaw ai pyengdin shadun hta pyengdin ni hpe sadi sahka hte lajang nna dai MADU a man e tut nawng shachyi da na rai wu ai.

⁵Mani ai shadung pawng hkun mali la nna muk tawng shi lahkawng kabaw na rai nga ai.

⁶Dai hpe dai MADU a man na ja jet hte galaw da ai ku ntsa e kawng lahkawng hkawng da nhtawm kawng mi hta muk tawng kru kru kahtap kawng da na rai wu ai.

⁷Dai MADU a matu hkungga kumla shatai ai dai muk kawng lahkawng a ntsa e jet ai lawban mara tawn da na rai wu ai.

⁸Dai muk hpe Bansa Nhtoi shagu dai MADU a man e prat mi hte prat mi lajang tawn da na rai wu ai. Dai hpe Israela amyu masha ni htani htana agalaw nga na rai ma ai.

⁹Dai gaw hkinjawng ni a matu dai MADU hpe nawng ya ai chyoi pra htum ai lusha rai nga ai majaw Arun hte shi a lakung lama ni la lu nna chyoi pra ai shara hta sha lu na rai ma ai.

¹⁰Egutu la hte Dan amyu bawsang hta na Dibri a shayi sha ngu ai Israela amyu mying ai Shelomit yan hta shadang sha langai nga nga ai. Dai wa gaw dap kata hta nga ai Israela masha langai mi hte ga law wu ai. Shing rai ga law rawng nga ma yang, shi gaw Karai Kasang hpe matsa wu ai.

¹²Shanhte gaw dai wa hpe Mawshe hpang de woi sa nna shi hpe kaning di na lam dai MADU shanhte hpe tsun ai aten du hkra shi hpe rim rawng da ma ai.

¹³Dai MADU gaw Mawshe hpe, “Dai masha hpe dap shinggan de shapraw kau mu. Shi mara lu nga ai hpe sakse tai ya na matu shi tsun ai ga na mana hte gaw shi a baw hta lata mara da na ma ai; dai hpang shawa hpung ting shi hpe nlung hte kabai sat kau na rai ma ai.

¹⁵Dai hpang, kadai rai ti mung Karai Kasang hpe matsa ai wa gaw shi a mara hkam sha nna si ai hkrum na lam,

¹⁶Israela masha ni hpe tsun u. Israela amyu masha mi rai ti mung, Israela mung hta nga ai maigan masha rai ti mung dai MADU hpe matsa ai wa kadai mung shawa hpung ting e nlung hte kabai sat kau ai hkrum na rai wu ai.

¹⁷“Masha sat ai wa kadai mung sat kau ai hkrum na rai wu ai;

¹⁸Marai langai ngai a yam nga sat ai wa kadai mung de a matu wa lu na rai wu ai. Dai gaw asak a matu asak ngu ai tara rai nga ai.

¹⁹“Kaga masha wa hpe machyi hkra shangun ai wa kadai mung shi galaw ai hte maren bai hkam la na rai wu ai.

²⁰Nra langai agrawp daw ai rai yang, shi a nra langai mung agrawp daw kau ai hkrum na rai wu ai; myi jahten kau ya ai wa mung shi a myi jahten kau ai hkrum na rai wu ai; awa adawt malawk kau ya ai wa gaw shi a awa mung adawt malawk kau ya ai hkrum na rai wu ai. Masha kaga wa hpe machyi hkra shangun ai wa gaw shi mung dai hte maren nhtang hkam sha na rai wu ai.

²¹Yamnga sat kau ya ai wa gaw de a malai wa lu na rai wu ai; rai ti mung masha sat ai wa chyawm gaw sat kau ai hkrum na rai wu ai.

²²Ngai gaw dai MADU nanhte a Karai Kasang rai nga nngai majaw ndai tara gaw Israela amyu masha ni rai ti mung, nanhte hta hkan nga ai maigan masha ni hte nanhte yawng a matu rai nga ai,” ngu nna hkang da wu ai.

²³Mawshe gaw Israela amyu masha ni hpe dai lam tsun ngut jang shanhte gaw dai masha wa hpe dap shinggan de dun shapraw sa wa nhtawm nlung hte kabai sat kau ma ai. Ndai hku nna Israela amyu masha ni dai MADU Mawshe hpe hkang da ai hte maren hkan galaw nga ma ai.