Read Jinghpaw Common Language Bible 2009 JAW JAU 25 Bible Online

JAW JAU 25 - Jinghpaw Common Language Bible 2009 bible

JAW JAU 25

¹Dai MADU gaw Mawshe hpe Israela masha ni hkan sa na tara jaw ya na matu shi hpe hkang da wu ai.

²Dai MADU nanhte hpe jaw ya ai mungdan de nanhte shang myit dai shaloi sanit ning du shagu dai mungdan hta yi hkauna n galaw ai sha, dai MADU hpe shagrau sha-a na rai myit dai.

³Nanhte gaw kru ning tup nanhte a yi hkauna galaw lu nna, nanhte a sabyi sun hpe mung tsan lajang nhtawm nanhte a nsi naisi shu la na rai myit dai.

⁴Rai ti mung sanit ning ngu na shaning gaw mungdan hta tsep kawp ban sa la ai shaning, dai MADU a matu ap nawng ai shaning rai nga ai. Dai shaning hta yi hkauna mung, sabyi sun mung galaw lu na myit dai n rai.

⁵Yi hkauna hta shi hkrai tu ai nhpan pyi dan la lu na n rai. N lajang sai sabyi sun na asi mung di shinggyin lu na n rai. Dai gaw mungdan ting hta tsep kawp ban sa la ai shaning rai nga ai.

⁶Dai shaning laman mungdan hta hkai n hkai lu ti mung na a matu mung, na a mayam ni, na a nchyang lasha ni, nang hte rau nga ai maigan masha ni,

⁷nta na na a yam nga ni hte yi hkauna hkan na matse labye dusat ni a matu malu masha jaw sha lu na rai ndai. Dai mung na pru mapru lusha mahkra sha mai na rai myit dai.

⁸Sanit ning sanit lang ngu na yawng hpawn mali shi jahku ning hpe hti u.

⁹Dai hpang shata sanit a nhtoi shi ya shani e ang ai htingrai htingrat ai shani hta masha langai mi hpe mungdan ting de pahtau dum garu shangun na rai myit dai.

¹⁰Ndai hku nna, shaning manga shi ning du ra ai hpe tsun ndau nhtawm mungdan ting hta shanu nga ai mung masha nlang a matu shalawt dat lu na ahkang re ai hpe tsun shana na rai myit dai. Shing rai dai shaning laman hta dut kau dat sai sut gan yawng mayawng mi na madu shing n rai amyu baw ni hpang de mung, mayam zawn dut kau hkrum sai ni kadai mung shi a dum nta de bai wa lu na rai ma ai.

¹¹Nanhte mung nai mam hkai lu na n rai; shi chyu tu ai nhpan pyi dan la lu na n rai; n lajang da sai sabyi sun ni hta na sabyi si ni di la lu na myit dai n rai.

¹²Dai shaning tup gaw nanhte a matu chyoi pra nga myit dai; yi hkauna hta shi hkrai tu ai asi hpe sha sha lu na myit dai.

¹³Dai shaning hta dut kau sai sut gan yawng mayawng hpe mi na madu a lata de bai nhtang jaw na rai myit dai.

¹⁴Dai re ai majaw nanhte Israela amyu masha shada da lamu ga mari hkat ai shaloi dip zingri lu na myit dai n rai.

¹⁵Bai du wa na Shalawt Dat Ai Shaning garai n du yang, lamu ga na pru ai nsi naisi ni hpe dut mari ai shaning hta hkan nna manu jahkrup tawn da na rai myit dai.

¹⁶Shaning law yang law ai hku, n law yang n law ai hku manu shalun shayu na rai myit dai. Hpa majaw nga yang, dai lamu ga kaw na lu ai nsi naisi hta hkan nna nsi dut ai sha rai nga ai.

¹⁷Nanhte Israela amyu masha manang shada da hkum maw sha hkat myit. Dai MADU nanhte a Karai Kasang a ga hpe hkrit hkungga ai hte madat mara nga mu.

¹⁸Dai MADU a tara hte hkang da ai ga ni yawng hpe hkan sa madat mara nga mu; shaloi dai mungdan hta shim lum ai hte nanhte nga lu na rai myit dai.

¹⁹Lamu ga mung de a nsi naisi shapraw ya nna nanhte sha mayu ai mahkra lu la shangun nhtawm dai mung e shim lum ai hte nga lu na rai myit dai.

²⁰Rai ti mung marai langai ngai mahtang dai ladaw da ai sanit ning laman hta yi hkauna n galaw, nsi naisi n shu la rai yang, hpa sha na rai nga wu ta?, nga nna san na rai myit dai.

²¹Dai MADU chyawm gaw lamu ga hpe kru ning tup shaman ya na ra ai rai nna lahkawng ning a matu lusha alaw alam shapraw ya na rai wu ai.

²²Nanhte gaw matsat ning ngu na hta hkai nmai dat nna, kru ning laman nanhte shu la lu ai nsi naisi naw sha na rai myit dai. Dai gaw nanhte nsi naisi gat hkai nna bai shu la lu ai aten du hkra nanhte alaw ahtam sha lu na rai myit dai.

²³Nanhte a lamu ga hpe tut nawng madu nga lu na matu dai hpe dut lu na myit dai n rai; hpa majaw nga yang, lamu ga hpe nanhte madu ai n rai, Karai Kasang mahtang madu nga ai. Nanhte gaw dai hpe gan lang na matu ahkang lu ai tsasam masha ni zawn sha rai nga myit dai.

²⁴Lamu ga dut ai shaloi mi na madu wa dai hpe bai mari la lu na ahkaw ahkang shagrin da lu na rai myit dai.

²⁵Israela masha langai mi matsan hkrum nna shi a lamu ga dut kau na matu shadut hkrum ai rai yang, shi hte ni htep ai kahpu kanau wa dai hpe mari nhtang la karum na rai wu ai.

²⁶Dai hpe mari nhtang la karum na kahpu kanau n lu ai wa gaw shi hkum nan ngamu ngamai wa ai shani e dai hpe mari nhtang la mai nga ai.

²⁷Dai lam a majaw mi na lamu ga bai lu la na matu bai du na Shalawt Dat ai Shaning du hkra, lai mat wa sai shaning ni hpe hti la nhtawm naw ra ai shaning a jahpu hte dai hpe mari la ai wa hpe jaw lu na rai wu ai.

²⁸Rai ti mung dai lamu ga mari shaw la na matu gumhpraw alaw alam shi hta n nga ai rai yang, bai du na Shalawt Dat ai Shaning du hkra dai hpe mari la ai wa a lata hta naw nga nga na rai nga ai. Dai shaning hta chyawm gaw mi na madu dingsa lata de bai ap ya na rai wu ai.

²⁹Masha langai ngai bunghku kum ai mare kata na nta hpe dut kau ai rai yang, dut kau ai hpang laning mi na laman hta mari nhtang la na ahkang shi hta nga nga ai.

³⁰Rai ti mung dai shaning laman n lu mari nhtang la ai rai yang, bai mari nhtang la na ahkaw ahkang shi hta n lu sanu ai rai nna dai nta gaw mari la ai wa hte shi a amyu matu ni prat dingsa madu da na sut gan tai mat na rai nga ai. Dai gaw Shalawt Dat ai Shaning du tim nhtang ya lu sana n rai.

³¹Rai ti mung bunghku n kum ai kahtawng na nta ni chyawm gaw yi hkauna lamu ga zawn di lu na rai myit dai. Mi na madu dingsa wa gaw dai hpe mari nhtang la lu na ahkaw ahkang nga nga wu ai. Shalawt Dat ai Shaning hta dai ni hpe nhtang ap ya lu na rai myit dai.

³²Rai ti mung, Lewi masha ni madu ai mare hta na sut rai hpe chyawm gaw galoi rai ti mung mari shaw la lu na ahkang nga nga ai.

³³Lewi masha ni madu ai mare hta na nta hpe mari ai rai yang, bai n mari nhtang la ai sha, Shalawt Dat ai Shaning hta bai nhtang ap ya lu na rai nga ai; hpa majaw nga yang, shanhte a mare ni hta Lewi ni madu da ai nta gaw Israela amyu masha ni a lapran e shanhte hte seng ai prat dingsa na sut gan arai rai nga ai.

³⁴Rai ti mung Lewi masha ni a mare grup grup na udat shara ni hpe dut kau lu na ma ai n rai; dai gaw prat dingsa na shanhte a sut rai rai nga ai.

³⁵Nang hte ani sha nga ai Israela hpu nau wa shi hkum hpe n lu madi shadaw mat nna, matsan mayan hkrum sha ai rai yang, nang hte ani sha matut nga lu u ga, na a nchyang wa hpe zawn lanu lahku shadaw la lu na rai myit dai.

³⁶Shi kaw na atu amyat la lu na n rai; na a Israela hpu nau wa nang hte ani sha nga lu hkra, Karai Kasang a ga hpe madat mara hkan sa na rai myit dai.

³⁷Nang hkoi ya ai gumhpraw hta rai ti mung, dut ya ai lusha hta rai ti mung, shi hpe atu amyat jaw shangun lu na n rai.

³⁸Ndai gaw ngai nanhte hpe Hkanan mung jaw nna, nanhte a Karai Kasang tai na matu nanhte hpe Egutu mung kaw na woi shapraw wa ai dai MADU nanhte a Karai Kasang hkang da ai ga rai nga ai.

³⁹Nang hte ani sha nga ai Israela hpu nau wa matsan mayan hkrum nna shi hkum nan nang kaw mayam tai na nga, sa dut ai rai yang, nang shi hpe mayam zawn galaw shangun lu na n rai.

⁴⁰Nchyang wa zawn nang kaw shi shanu nga nna, bai du na Shalawt Dat ai Shaning du hkra, nang hpe daw jau lu na rai nga ai.

⁴¹Dai shaning du jang shi a kashu kasha ni hte rau nang kaw na pru wa nhtawm shi hte shi a kaji kawa ni nga ai dum nta buga de bai nhtang wa lu na rai nga ai.

⁴²Israela amyu masha ni gaw dai MADU a shangun ma ni rai nga ma ai majaw shi shanhte hpe Egutu mung kaw na woi shapraw wa wu ai. Dai rai nna shanhte hpe mayam zawn dut kau lu na n rai.

⁴³Shanhte hpe laja lana re ai hku byeng sha lu na n rai; nanhte a Karai Kasang a ga hpe nanhte madat mara hkan sa lu na rai myit dai.

⁴⁴Mayam ni hpe shangun na matu nang ra ai rai yang, na a grup yin hta nga ai masha amyu baw ni kaw na mari la mai nga ndai.

⁴⁵Nanhte kaw sa shingbyi nga ai maigan masha ni a kashu kasha ni hpe mari la mai nga myit dai. Dai sha n-ga, nanhte a mungdan hta shangai ai dai zawn re ai kashu kasha ni hpe madu la nna,

⁴⁶nanhte a shadang sha ni hpe sali wunli jaw ai zawn shanhte hpe yam sha na rai myit dai. Shanhte mung hkrung nga dingsa daw jau lu na rai ma ai. Rai ti mung Israela hpu nau ni kadai hpe mung aja awa yam sha lu na myit dai n rai.

⁴⁷Nang hte rau nga ai maigan masha wa mahtang lu su ngamai wa ai zawn rai nna, Israela hpu nau wa mahtang matsan mayan hkrum nhtawm shi a hkum hpe dai maigan masha wa kaw shing n rai shi a dinghku masha ni kaw sa dut kau ai rai yang,

⁴⁸dut kau ngut ai hpang shi hta mari la lu na ahkang naw lu nga ai. Dai rai nna shi a kahpu kanau langai ngai,

⁴⁹shing n rai kawa doi, kawa di, shing n rai lawu lahta makyin jinghku shing n rai shi hte ni htep ai kaga jinghku wa kadai rai ti mung nhtang mari la mai nga ai. Dai n rai shi hkum nan gumhpraw alaw alam lu tam ai rai yang, shi hkum shalawt la na matu mari shaw la mai nga ai.

⁵⁰Shi gaw shi hpe mayam hku mari la ai wa hte bawng jahkrup nna, shan gaw mayam wa shi hkum dut kau ai aten kaw nna Shalawt Dat ai Shaning bai du hkra na shaning ni hti nhtawm nchyang wa hpe jaw ai manu hte maren, shi a lawt lam a matu manu tawn da ya na nu ai.

⁵¹Dai wa gaw laning mi hte laning mi na nchyang amu galaw ai zawn naw ngam nga ai shaning ni hta hkan nna tinang hkum hpe mari shaw la na jahpu daw chyen mi hpe daw wa lu na rai wu ai.

⁵²

⁵³Shi a mayam madu wa mung shi hpe aja awa byeng sha lu na n rai.

⁵⁴Ndai hku nna shi n lawt lu sai rai yang, shi hte shi a kashu kasha ni bai du na Shalawt Dat ai Shaning hta mahtang shalawt dat ai hkrum na rai wu ai.

⁵⁵Israela amyu masha ni gaw dai MADU a mayam ni rai nga ma ai majaw shanhte gaw tut nawng na mayam n tai lu nga ai. Shanhte hpe Egutu mung kaw na shi woi shapraw wa ai wa rai nna, dai MADU gaw shanhte a Karai Kasang rai nga ai.