Read Jinghpaw Common Language Bible 2009 JAW JAU 26 Bible Online

JAW JAU 26 - Jinghpaw Common Language Bible 2009 bible

JAW JAU 26

¹Dai MADU gaw, “Hpara sumla hkum galaw myit; gawkngu sumla mung, nlung shadaw ni hpe mung shadun tawn lu na n rai; nawku na matu sumla tawk bang da ai nlung ni shadun lu na n rai. Ngai gaw dai MADU nanhte a Karai Kasang nan rai nga nngai.

²Nawku htung hte seng ai poi ni hpe hkan sa nna nawku ai shara hta ngai hpe shagrau sha-a na rai myit dai. Ngai gaw dai MADU rai nga nngai.

³“Ngai hkang da ai tara ni hte maren, nanhte asak hkrung nna nye a hkang da ai ga ni hpe madat mara hkan sa myit dai rai yang, lamu marang hpe shi a aten hta nanhte a matu ngai jahtu ya na mawe ai; shaloi lamu ga gaw nsi naisi shapraw ya ai hte hpun ni hta asi si na mara ai.

⁴

⁵Nanhte a nsi naisi ni grai ja kat na rai nna, sabyi si di ai aten hta nsi naisi ni hpe nanhte naw dan nhtawm nsi naisi ni hpe gat hkai ai aten hta mung sabyi si ni naw di la ra na rai myit dai. Nanhte sha mayu ai lusha yawng hkam la lu ai hte nanhte a mungdan hta shim lum ai hku nga lu na rai myit dai.

⁶“Ngai nanhte hpe nanhte a mungdan hta ngwi pyaw sim sa lam jaw ya na nngai, nanhte gaw kadai hpe mung n hkrit n tsang ra ai sha, myit mu myit hkut let yup lu na rai myit dai. Dai mung e nga ai matse labye ni hpe mung ngai yeng kau nna dai mung hta hpyen majan hpa mung nga sana n rai.

⁷Nanhte gaw nanhte a gumlau hpyen ni hpe dang kau lu na rai myit dai.

⁸Nanhte hta na marai manga gaw hpyen latsa hpe dang kau lu nna latsa gaw hpyen mun mi hpe dang kau lu na rai myit dai.

⁹Ngai gaw nanhte hpe shaman ya nna kashu kasha law law mayat maya shangun na made ai. Nanhte hte ngai tawn da se ai nye a maga de na ga shaka hpe ngai shagrin da na we ai.

¹⁰Nanhte a mangai hkai nmai, nsi naisi ni grai ja kat ai hte grai law htam nga myit dai majaw laning mi a matu sha hkap hkra htun da lu na rai myit dai. Dai sha pyi n-ga, mangai dingsa na naw ngam ai nsi naisi ni hpe htawk kau nhtawm mangai ningnan a nsi naisi ni hpe bang da na dum hpe lajang da ra na rai myit dai.

¹¹Ngai mung nanhte a ka-ang na nye a chyoi pra ai Sum hta shanu nga nna, nanhte kaw na galoi mung kayin mat wa na nngai n rai.

¹²Ngai gaw nanhte hte rau anga nga nna nanhte a Karai Kasang tai nga na nngai, nanhte mung nye a amyu masha ni tai nga na rai myit dai.

¹³Ngai gaw dai MADU nanhte a Karai Kasang rai nga nngai; nanhte hpe Egutu mung kaw na woi shapraw wa ni ai; dai re ai majaw nanhte galoi mung mayam bai tai lu na myit dai n rai. Nanhte hpe mashi htingkung hkra galaw shangun ai daru magam n-gun hpe ngai shadaw kau ni ai; nanhte hpe baw sharawt let hkawm shangun ma sade ai,” ngu nna tsun wu ai.

¹⁴Dai MADU gaw, “Nanhte gaw nye a hkang da ai ga ni hpe n madat n mara myit dai rai yang ari jaw hkrum na rai myit dai.

¹⁵Nye a tara ni hte hkang da ai ga matsun ni hta hkan sa na matu nanhte lale kau nna nanhte hte ngai shagrin da sai ga shaka hpe jahten kau myit dai rai yang, nanhte hpe ari jaw na made ai.

¹⁶Ngai gaw nanhte hpe tsi la n lu ai ana ahkya hte mung, nanhte hpe myi n mu shangun lu ai machyi makaw hte nanhte a asak hpe hkra shangun na ru yak tsin-yam tsindam shangun dat na we ai. Nanhte a gumlau hpyen ni mahtang nanhte hpe ka-up kau nhtawm nanhte hkai shakut da ai nsi naisi ni hpe sha kau na mara ai.

¹⁷Ngai gaw nanhte hpe myi man kayin kau da na made ai, shaloi nanhte sum mat na marin dai. Nanhte hpe n dawng n yawt ai ni mahtang nanhte a ntsa e up na mara ai; nanhte hpe kadai n hkan shachyut ti mung hprawng nna grai hkrit gari mat na rai myit dai.

¹⁸“Ndai lam ni yawng hpe nanhte hkrum sha nga myit tim, nye a ga n madat nga myit yang gaw, yubak ari htam sanit naw kahtap jaw na made ai.

¹⁹Ngai gaw nanhte a gumrawng kawng shadaw kau ya na made ai; lamu marang htu na ra ai n rai; nanhte a lamu ga gaw hkun hkraw mat nna ahpri zawn ja mat na ra ai.

²⁰Nanhte galaw shaja ai bungli yawng gaw kaman lila rai na ra ai, hpa majaw nga yang nanhte a lamu ga gaw nsi naisi n shakat ya ai hte hpun ni hta asi si jaw na ra ai n rai.

²¹“Nanhte matut nna ngai hpe ninghkap let nye a ga madat mara na naw ningdang kau myit yang gaw, yubak ari htam sanit ngai jat ya na made ai.

²²Ngai gaw nanhte hpang de hkrit hpa matse labye dusat ni hpe dat dat nna, dai ni gaw nanhte a kashu kasha ni hpe kawa sat nhtawm nanhte a yam nga hpung shagrawm kau ya na mara ai. Nanhte hta na nkau mi hpe sha ngam tawn da na ra ai. Nanhte sa na hkrun lam ni katsi mat shajang na ra ai.

²³“Ndai ari ni yawng jaw ngut ai hpang, nye a ga hpe nanhte matut nna naw n madat ai sha, ngai hpe ninghkap myit ai rai yang gaw,

²⁴ngai mung nanhte hte nhtan jashai nna shawng na hta grau laja ai ari htam sanit jaw na made ai.

²⁵Nye a ga shaka jahten kau myit dai majaw nanhte hpe ari jaw na matu nanhte a ntsa de majan shabyin dat na nngai; nanhte a mare ni hta shim lum na matu kahkyin rawng nga myit yang mung n mai tsi la lu ai ana ahkya nanhte hpang de ngai shangun dat na made ai. Nanhte gaw gumlau hpyen ni a lata de kanawng ap kau ai hkrum na rai myit dai.

²⁶Ngai gaw n nanhte hpe shadaw ai malu masha hpe dawm kau ya na nngai, shaloi numsha marai shi gaw wan mang langai hta sha shanhte a muk yawng kabaw ra na mara ai. Shanhte gaw dai hpe karan jaw na mara ai, nanhte gaw dai ni yawng sha kau ti mung, naw kawsi kyet na rai myit dai.

²⁷“Dai yubak ari yawng hkrum sha ngut ai hpang nanhte matut nna ngai hpe ninghkap nhtawm nye a ga naw lale myit dai rai yang gaw,

²⁸nanhte hpe ngai pawt sindawng ai hte nhtan shai ai hku galaw nna shawng na hta grau sawng ai yubak ari htam sanit bai jaw na made ai.

²⁹Nanhte a kawsi kyet ai gaw grau sawng wa nna nanhte a kashu kasha ni hpe pyi sha kau na rai myit dai.

³⁰Kawng ntsa hkan na nanhte a nawku shara ni hpe ngai jahten sharun kau nhtawm nanhte a manam pyaw ai baw nat nawng ai tawn hkungri ni hpe hpya kau let agrawp taw nga ai hpara sumla ni a ntsa e nanhte a si mang ni hpe kabai mara da na we ai.

³¹Nanhte hpe grau sawng mat hkra matsat kau mawe ai majaw nanhte a mare ni hpe ngai hpya ayai kau nhtawm nawku ai shara ni hpe jahten sharun kau na we ai. Nanhte a shagu hkungga ni hpe hkap la na we ai n rai.

³²Nanhte a mungdan hpe ngai akrin atsai di kau nhtawm dai mungdan hpe sa ka-up la ai gumlau hpyen ni pyi dai hten za lam a majaw mau kajawng mat na mara ai.

³³Ngai gaw nanhte a ntsa e hpyen majan byin shangun nna maigan mung ni de shabra kau na made ai. Nanhte a mungdan gaw katsi katsang tai mat nna mare ni mung hten run taw mat na ra ai.

³⁴Dai hpang nanhte hpe bansa lam n jaw ya nga ai dai mung ga gaw tsep kawp bansa ai shaning ni hta kabu gara wa na ra ai; nanhte gaw nanhte a gumlau hpyen ni a mung ga hta nga nga myit dai shaloi dai mung gaw katsi katsang tai mat nna ban sa nga na ra ai.

³⁵

³⁶“Ngai gaw nanhte hta na kaga mung de gau kau hkrum ai ni hpe ja ja hkrit shangun na nngai; lahpraw lahpra shara ai nsen hte sha pyi nanhte hpe hprawng shangun na nngai. Nanhte gaw majan hta shachyut hkrum ai ni zawn hprawng mat wa nna nanhte hpang de kadai gumlau hpyen ni mi n shani sa ti mung kataw na marin dai.

³⁷Nanhte hpe kadai n shachyut tim langai hte langai a ntsa e ahtu kataw na rai myit dai. Kaning re ai gumlau hpyen hpe mung nanhte gasat ninghkap lu na myit dai n rai.

³⁸Nanhte gaw gau kau hkrum ai mungdan hta sa si mat nna nanhte a gumlau hpyen ni a lamu ga gaw nanhte hpe mayu kau na ra ai.

³⁹Nanhte galaw ai yubak hte nanhte a kaji kawa ni a yubak majaw nanhte a gumlau hpyen ni a mung hta naw ngam nga ai kau chyen mi gaw yawm mat na mara ai.

⁴⁰“Rai ti mung, nanhte a amyu matu ni gaw shanhte a yubak hte shanhte a kaji kawa ni a yubak mara ngu ai ngai hpe ninghkap ai hte gumlang ai,

⁴¹ngai hte nhtan shai shangun sai majaw shanhte a gumlau hpyen ni a mung de sa kau dat ai hpe shanhte yin la na mara ai. Hpang jahtum e, nanhte a amyu matu ni shagrit shanem ai hte shanhte a yubak mara hte gumlau ai amu a ari hpe hkam la ai shaloi,

⁴²ngai mung Yaku, Isak hte Abraham ni hte tawn da ai ga shaka hpe dum nga na nngai. Dai mung na nye a amyu masha ni hpe jaw na nye a ga sadi hpe ningnan bai shagrin da na nngai.

⁴³Shawng nnan e, dai mung na amyu masha ni hpe yeng seng kau ai hpang sha, tsep kawp bansa lu ai hte kabu gara lu na ra ai, shanhte gaw nye a tara hte hkang da ai ga ni hpe ningdang kau nga masai majaw ari hpring hkra hkrum sha ai lam hpe yin la lu na rai ma ai.

⁴⁴Rai ti mung shanhte a gumlau hpyen ni a mung hta naw nga nga yang, ngai gaw shanhte hpe rap rai kau da na n rai; shanhte hpe shamyit kau na nngai n rai. Shanhte hte nye a ga shaka gaw dai hte hta jahtum kau na rai nga a ni? Ngai gaw dai MADU shanhte a Karai Kasang rai nga nngai.

⁴⁵Ngai MADU nan shanhte a Karai Kasang tai na ngu nna Egutu mung kaw nna nye a amyu masha ni hpe woi shapraw wa ai daru magam n-gun, amyu baw ni yawng a man e ngai madun dan ai shaloi shanhte a kaji kawa ni hte tawn da ai ga shaka hpe ngai dum na we ai,” ngu nna tsun wu ai.

⁴⁶Ndai tara ni hte hkang da ai ga ni yawng gaw Israela amyu masha ni a matu Mawshe hpe Sina Bum ntsa e dai MADU jaw ya ai lam ni rai nga ai.