Read Jinghpaw Common Language Bible 2009 JAW JAU 27 Bible Online

JAW JAU 27 - Jinghpaw Common Language Bible 2009 bible

JAW JAU 27

¹Dai MADU gaw Mawshe hpe

²Israela amyu masha ni a matu hkan sa na tara jaw ya wu ai. Kadai rai ti mung dai MADU hta ap nawng ya na matu laksan ga shaka shatup na nga, jaw ya ai shaloi ndai gumhpraw chyarang hte maren jaw yang, dai wa gaw shalawt dat ai hkrum na rai wu ai.

³Tara shang lang ai joi jang hte maren, -asak kaba sai lasha, hkun ning kaw nna kru shi ning: gumhpraw dengga 50 -asak kaba sai numsha, gumhpraw dengga 30 -brang ji, asak manga ning kaw nna hkun ning: gumhpraw dengga 20 -hkawn ji: gumhpraw dengga 10 -la kasha ma kaji, manga ning lawu: gumhpraw dengga 5 -numsha ma kaji: gumhpraw dengga 3 -kru shi ning a lahta na lasha: gumhpraw dengga 15 -kru shi ning a lahta na numsha: gumhpraw dengga 10

⁸Ga shaka tawn ai wa mahtang nau matsan nna tawn da ai manu hku n dang hkan ai rai yang, shi hpe hkinjawng wa hpang de woi sa nna hkinjawng wa mung dai wa lu jaw na atsam hte maren nem ai manu tawn da ya na rai wu ai.

⁹Dai MADU hpe ga shaka hte seng ai yam nga hkungga jaw ai rai yang, dai MADU hpe jaw majaw kumhpa shagu gaw chyoi pra nga ai rai nna,

¹⁰ga shaka tawn da ai wa gaw de a malai kaga yam nga hpe malai hku nna galai mai nga ai n rai. Shi kaja wa galai na hku galaw ai rai yang, dai lahkawng yan gaw dai MADU a matu rai nga ai.

¹¹Rai ti mung ga shaka hte seng ai yam nga mahtang n san n seng nna dai MADU hpe nawng ya na matu n hkap la lu ai rai yang hkinjawng wa hpang de dun sa na rai wu ai.

¹²Hkinjawng wa gaw de a kaja ai, n kaja ai ahpraw hta hkan nna dai hpe manu tawn ya ai hte maren shagrin ya na rai wu ai. Dai manu gaw hpang jahtum na manu rai nga ai.

¹³Dai wa dai yam nga bai nhtang mari la mayu ai rai yang, mi tawn da ai manu hta tsa lam shadang 20% jat jaw lu na rai wu ai.

¹⁴Marai langai ngai shi a nta hpe dai MADU a matu nawng ya ai shaloi hkinjawng wa gaw dai hpe hkik yang hkik ai hku, n hkik yang n hkik ai hku manu tawn nna manu daw ya na rai wu ai. Dai manu gaw hpang jahtum na manu rai nga ai.

¹⁵Dai nta nawng ya ai wa bai nhtang mari la mayu ai rai yang, mi tawn da ai manu hta tsa lam shadang 20% jat nna jaw lu na rai wu ai.

¹⁶Marai langai mi gaw shi a lamu ga chyen mi hpe dai MADU a matu nawng ya ai rai yang, nli gat lu ai shadang hkan nna manu tawn na rai wu ai. Muk-yaw mam nli bye 10 rai yang gumhpraw dengga shi hku manu tawn da na rai wu ai.

¹⁷Shi gaw Shalawt Dat ai Shaning a hpang jang, dai lamu ga hpe nawng ai rai yang manu tup hte daw na rai wu ai.

¹⁸Shalawt Dat ai Shaning a hpang e mahtang dai lamu ga hpe nawng ya ai rai yang chyawm gaw hkinjawng wa sawn yu nna Shalawt Dat ai Shaning laman na shaning nhtoi ni hpe hti la nhtawm daw da sai manu hta shayawm nna tawn ya na rai wu ai.

¹⁹Dai nawng da sai lamu ga hpe shi bai mari la mayu ai rai yang, mi na manu hta tsa lam shadang 20% jat nna jaw lu na rai wu ai.

²⁰Marai langai ngai gaw dai MADU kaw na shawng n mari nhtang la ai sha marai langai ngai hpe dut ya ai rai yang, dai hpe mari nhtang la na ahkang lu na n rai nga ai.

²¹Bai du na Shalawt Dat ai Shaning hta chyawm gaw dai yi hkauna gaw dai MADU a matu prat dingsa na sut rai tai mat na rai nga ai; dai hpe hkinjawng ni madu la na rai ma ai.

²²Shi mari la ai yi hkauna hpe dai MADU a matu nawng ya ai rai yang,

²³hkinjawng wa gaw Shalawt Dat ai Shaning du hkra na nhtoi ni hpe hti yu nna de a manu sawn ya na rai wu ai. Dai wa mung de a manu hpe dai shani jang jaw lu na rai wu ai. Dai gaw dai MADU hte seng ai gumhpraw rai nga ai.

²⁴Shalawt Dat ai Shaning du jang, yi hkauna dai gaw shawng dut ya ai madu shing n rai shi a amyu matu ni a lata de bai nhtang ap ya na rai ma ai.

²⁵Manu yawng gaw tara shang lang ai joi jang hte maren tawn da na rai nga ai.

²⁶Shawng hkrat ai yam nga hpe dai MADU a matu san da sai hpe kadai mung mayu hkungga di nna shi hpe nawng ya mai ai n rai. Dumsu rai ti mung, sagu bainam kasha rai ti mung dai MADU a matu hkrai rai nga ai;

²⁷rai ti mung n san n seng ai yam nga hta na shawng hkrat ai chyawm gaw tawn da ai manu shadang hte maren mari nhtang la nna tsa lam shadang 20% bai jat jaw na rai wu ai. Dai hpe n mari la mayu yang gaw tawn da ai manu hte maren marai langai ngai hpe dut ya lu na rai wu ai.

²⁸Masha mung, yam nga mung, lamu ga mung dai MADU a matu tsep kawp nawng ya sai hpe kadai mung dut mari mai nga ai n rai. Dai gaw prat dingsa na dai MADU a matu rai nga ai.

²⁹Masha nan rai ti mung tsep kawp san da sai gaw mari hkrang la mai ai n rai; shi gaw sat kau ai hkrum na rai wu ai.

³⁰Nai mam rai ti mung, namsi namsaw rai ti mung dai lamu ga hta na pru ai yawng a htam shi hta na htam mi gaw dai MADU a matu rai nga ai.

³¹Masha langai ngai de a lama ma hpe nhtang mari la mayu ai rai yang, tawn da ai manu shadang hta tsa lam shadang 20% jat jaw lu na rai wu ai.

³²Nta e rem da ai yam nga ni hta na htam shi hta na htam mi gaw dai MADU a matu rai nga ai. Yam nga ni hpe hti yu yang htam shi hta na htam mi shagu gaw dai MADU a matu rai nga ai.

³³Yam nga madu gaw n tsawm ai yam nga ni hpe n lata hkrup u ga, yam nga ni hpe hkan gawn lu na n rai; shi gaw langai hte langai hpe mai galai na n rai; shi galai mayu ai rai yang, dai yam nga lahkawng yan gaw dai MADU a matu rai na ra ai majaw mari shaw la mai na n rai.

³⁴Ndai hkang da ai ga ni gaw Israela amyu masha ni a matu dai MADU Mawshe hpe Sina Bum ntsa e jaw ya ai ga matsun ni rai nga ai.