Read Jinghpaw Common Language Bible 2009 JAW JAU 5 Bible Online

JAW JAU 5 - Jinghpaw Common Language Bible 2009 bible

JAW JAU 5

¹Htingrai htingrat hkungga galaw ra ai amu ni gaw lawu de na hte maren rai nga ai. Masha langai ngai tara rung e sakse sa hkam na matu tara shang shaga da hkrum nna shi mu ai hte na a amu lama ma a lam hpe shiga n jaw ai rai yang, de a mara shi hkam sha lu na rai nga ai.

²Masha langai ngai gaw htung hte maren n san n seng ai yam nga si mang zawn re ai hpe n dum shami sa hkra kau ai hte shi hpa galaw kau hkrup sai lam hpe shaloi jang shi chye ai rai yang, dai wa gaw n san n seng ai hte mara lu nga ai.

³Masha langai ngai gaw shinggyim masha hta mi kaw na kap ai n san n seng ai hpa hpe mung n dum shami hkra kau ai hte dai gaw hpa mi rai rai shi hpa galaw kau hkrup sai lam hpe shaloi jang shi chye ai rai yang, dai wa mara lu nga ai.

⁴Masha langai ngai gaw hpa n ra ai nga nna n myit yu ai sha, dagam ai hte ga shaka da kau ai hpang, shi hpa galaw kau hkrup sai lam hpe shaloi jang chye na wa ai rai yang, shi mara lu nga ai.

⁵Dai zawn re ai mara lu ai wa gaw shi galaw shut ai yubak mara a matu hpyi nem lu na rai wu ai. Dai shut kau sai yubak ari a matu

⁶hkungga shatai na sagu yi shing n rai bainam yi hpe dai MADU hpang de la sa na rai wu ai. Hkinjawng wa gaw dai wa a yubak mara a matu shagu hkungga nawng ya na rai wu ai.

⁷Masha langai ngai gaw sagu shing n rai bainam n lu jaw ai rai yang, shi a yubak raw hkungga shatai na hkrudu lahkawng shing n rai ura lahkawng hpe dai MADU hpang de la sa na rai wu ai; langai mi gaw mara raw hkungga a matu rai nna kaga gaw wan nat hkungga a matu rai na rai nga ai.

⁸Shi gaw dai hpe hkinjawng wa hpang de la sa nna hkinjawng wa mung htingrai hkungga a matu u shawng nawng jau na rai wu ai. Shi gaw u baw hpe n gang di ai sha de a du mahti daw na rai wu ai;

⁹dai hpang de a asai loi mi la nhtawm tawn hkungri a shakum grup de lapri bun na rai wu ai. Ngam ai asai hpe chyawm gaw tawn hkungri a lagaw nhpang e hkyen kau na rai wu ai. Dai gaw yubak mara la kau ya na htingrai hkungga rai nga ai.

¹⁰Dai hpang shi gaw hkan sa na tara ni hte maren, kaga u langai mi hpe mung wan nat hkungga shatai nna nawng ya na rai wu ai. Ndai hku nna hkinjawng wa gaw dai wa a yubak mara a matu shagu hkungga nawng ya ai hte mara raw dat kau ai hkrum na rai wu ai.

¹¹Hkrudu lahkawng shing n rai ura lahkawng mung n jaw lu ai rai n yang, shi gaw htingrai hkungga shatai na mani ai shadung pawng lahkawng la sa na rai wu ai. Dai gaw shadung hkungga n re ai sha htingrai hkungga rai nga ai majaw de a ntsa e tsanlun sau hte manam pyaw ai baw lawban hpa mung bang mai na n rai.

¹²Dai wa gaw dai hpe hkinjawng wa hpang de la sa nna hkinjawng wa gaw dai hta na latup mi magra la nhtawm dai MADU hpe dai ni yawng nawng ya sai masat kumla langai hku tawn hkungri ntsa hta lusha hkungga zawn dai hpe nat na rai nga ai. Dai gaw yubak mara la kau ya ai htingrai hkungga rai nga ai.

¹³Ndai hku nna hkinjawng wa gaw dai masha wa a yubak mara a matu shagu hkungga nawng jau na rai wu ai. Dai wa gaw yubak mara raw dat kau ya ai hkrum na ra ai. Ngam ai shadung mani gaw shadung hkungga zawn hkinjawng wa a matu rai nga ai.

¹⁴Dai MADU gaw Mawshe hpe lawu de na hkan sa na tara ni jaw ya wu ai.

¹⁵Kadai rai ti mung dai MADU a matu jaw shalai ra ai chyoi pra ai arai ni hpe n dum shami jaw dumhprut nna shut kau ai rai yang, dai MADU a matu htingrai hkungga shatai na ra n rawng ai sagu la shing n rai bainam la sa na rai nga ai. De a manu chyawm gaw tara shang lang ai joi jang hte maren daw dan sawn ya na rai nga ai.

¹⁶Shi jaw ra ai hpe shalai ya na matu dumhprut kau nga ai majaw dai shut ai a matu shawng e jaw ra ai hta tsa lam shadang 20% naw jat jaw na rai wu ai. Shi gaw dai hpe hkinjawng wa a lata hta ap ya nhtawm hkinjawng wa mung shi a shut hpyit ai yubak mara a matu shagu hkungga shatai ya na yam nga nawng jau ya ai hte shi gaw mara raw dat kau ya ai hkrum na ra ai.

¹⁷Marai langai ngai gaw dai MADU hkang da ai lam lama ma hpe n dum shami yubak galaw hkrup kau ai rai yang, mara lu nga ai rai nna yubak ari gun lu na rai nga ai.

¹⁸Shi gaw hkinjawng wa hpang de mara raw hkungga shatai na ra n rawng ai sagu la shing n rai bainam la langai mi la sa na rai wu ai. De a hkrat ang ai manu hpe chyawm gaw tara shang lang ai joi jang hte maren, manu sawn ya na rai nga ai. Hkinjawng wa gaw shi a n dum shami shut kau ai yubak mara a matu shagu hkungga nawng ya ai hte shi mung mara raw dat kau ya ai hkrum na ra ai.

¹⁹Dai gaw dai MADU hpe shi shut kau ai yubak mara a matu mara raw ai hkungga rai nga ai.