Read Jinghpaw Common Language Bible 2009 JAW JAU 9 Bible Online

JAW JAU 9 - Jinghpaw Common Language Bible 2009 bible

JAW JAU 9

¹Aya dang la ai nawku htung ngut ai hpang shani e, Mawshe gaw Arun hte shi a shadang sha ni hpe mung, Israela ningbaw ni hpe mung shaga la nhtawm,

²Arun hpe, “Ya nang htingrai hkungga a matu ra n rawng ai usu kasha langai mi hte wan nat hkungga a matu sagu la langai mi la nna dai MADU hpe nawng jau na rai ndai.

³Dai hpang Israela amyu masha ni hpe htingrai hkungga a matu bainam la langai mi, wan nat hkungga a matu ra n rawng ai hte laning mi ladu hkrum sai sagu la langai mi,

⁴mahku hkungga a matu dumsu usu hte sagu la, la sa na tsun su. Dai ni hpe namman sau hte kayau ai shadung hkungga hte hpawn dai MADU hpe nawng jau na rai myit dai. Dai MADU gaw shanhte kaw dai ni dan pru na ra ai majaw shanhte dai hpe dai ni jang galaw ra na rai ma ai,” ngu nna tsun wu ai.

⁵Shanhte gaw Sum a man de Mawshe hkang da sai lam magup hte hpe la sa ma ai; dai MADU hpe nawku na nga dai yang e shawa hpung ting sa hpawng nga ma ai.

⁶Mawshe gaw, “Dai MADU gaw ndai lam yawng mayawng galaw na matu nanhte hpe hkang da manit dai rai nna shi a htoi kabrim ai hpung shingkang nanhte hpang de dan pru lu na rai nga ai,” ngu nna tsun wu ai.

⁷Dai hpang shi gaw Arun hpe, “Tawn hkungri de sit sa nhtawm nang hte amyu masha ni a yubak mara ni la kau ya na matu, htingrai hkungga hte wan nat hkungga ni nawng ya na rai ndai. Dai MADU hkang da sai hte maren amyu masha ni a yubak mara hpe la kau ya na matu, dai hkungga nawng jau na rai ndai,” ngu nna tsun wu ai.

⁸Arun gaw tawn hkungri de sit sa nna shi a htingrai hkungga a matu san da ai usu sat wu ai.

⁹Shi a shadang sha ni mung de a asai hpe shi hpang de la wa ya ma ai; Arun gaw shi a layung hte dai sai hta kapruk nhtawm tawn hkungri a jut nrung ni hta sai loi mi chya wu ai; naw ngam ai asai ni hpe chyawm gaw tawn hkungri a lagaw nhpang e ru hkaw kau wu ai.

¹⁰Dai hpang dai MADU Mawshe hpe hkang da nu ai hte maren, sau man, sade tawng ni hte sin hta na kaja htum ai ni hpe tawn hkungri ntsa e nat wu ai.

¹¹Rai ti mung shi gaw ashan hte ahpyi ni hpe dap shinggan de nat kau wu ai.

¹²Shi a wan nat hkungga a matu, yam nga hpe shi sat nna shi a shadang sha ni mung asai la wa ya ma ai. Shi gaw dai hpe tawn hkungri ntsa man mali maga de gat dat wu ai.

¹³Shanhte gaw abaw hte kaga shan tau ni la wa ya nhtawm dai ni hpe shi gaw tawn hkungri ntsa hta nat wu ai.

¹⁴Dai hpang pu sin ni hte hpang lagaw ni hpe shi kashin nna tawn hkungri hta naw ngam ai wan nat hkungga hte hpawn nat wu ai.

¹⁵Dai hpang, amyu masha ni a hkungga nawng ya wu ai. Amyu masha ni a yubak mara a matu nawng jau na nga, bainam hpe mung shi dun la nna sat wu ai. Shi a matu htingrai hkungga galaw ai zawn dai hpe nawng jau wu ai.

¹⁶Shi gaw wan nat hkungga a matu mung yam nga dun la nhtawm hkang da ai tara ni hte maren nawng jau wu ai.

¹⁷Shi gaw shadung hkungga nawng ya na matu mani ai shadung latup mi la nna tawn hkungri hta nat wu ai. (Dai gaw shani shagu na wan nat hkungga hta jat bang da nga ai.)

¹⁸Shi gaw amyu masha ni a matu mahku hkungga usu hte sagu la sat wu ai. Shi a shadang sha ni mung de a asai shi hpang de la wa ya nhtawm shi gaw dai hpe tawn hkungri a man mali grup grup de lapri wu ai.

¹⁹Arun gaw usu hte sagu la a sau ni hpe yam nga ni a sinda ntsa hta

²⁰mara nna tawn hkungri de dai ni yawng hpai sa wa wu ai. Shi gaw tawn hkungri ntsa hta sau nat nna,

²¹Mawshe hpe hkang da nu ai hte maren, sinda hte hkra magyi ni hpe hkinjawng ni a matu nga nna dai MADU hpe laksan kumhpa sak jaw ya nga ai.

²²Arun gaw dai shagu hkungga ni yawng nawng jau ngut jang, amyu masha ni hpang de shi a lata sharawt da let, shanhte hpe shaman ya ai hte yu wa wu ai.

²³Mawshe hte Arun mung dai MADU a hpung shingkang shanu nga ai Sum kata de shang nna bai pru wa ma yang, amyu masha ni hpe shan shaman ya ma ai majaw dai MADU a hpung shingkang gaw amyu masha ni yawng hpe shadan dan nga ai.

²⁴Dai MADU gaw wan hpe akajawng sha dat dat nna tawn hkungri na wan nat hkungga hte sau man ni hpe hkru kau nga ai. Dai lam hpe amyu masha ni mu ma yang, shanhte yawng marawn jahtau ai hte ga de myi man gum dagup let dingnyawm nga ma ai.