Read Jinghpaw Common Language Bible 2009 YEREMIA 10 Bible Online

YEREMIA 10 - Jinghpaw Common Language Bible 2009 bible

YEREMIA 10

¹Israela amyu masha ni e, dai MADU nang hpe tsun nit dai mungga hpe madat mu.

²Shi gaw, “Kaga masha amyu baw ni a lam ni hta hkum hkan myit; sumsing lamu na laklai shai ai kumla ni hpe mu nna, kaga masha amyu baw ni hkrit kajawng nga tim, nang hta kajawng kaja hkum rai et.

³Dai amyu baw ni a nawku htung gaw kaman lila rai nga ai. Dai hpe maling na hpun kran nhtawm; lasama wa dai hpe nwa hte tawk nna

⁴ja gumhpraw ni hte sup shatsawm da nga ai. Dai sumla ni n di hkrat mat na matu hpri maina ni hte dit shangang da nga ai.

⁵Dai zawn tawk da ai hpara sumla ni gaw ginshau yi hta u ni hpe jahkrit ai u shari sumla ni zawn rai nna, shanhte ga lu shaga ai n rai; shanhte n lu hkawm ai majaw, shanhte hpe hpai hkawm ra nga ai. Dai ni hpe hkum hkrit et, shanhte nang hpe ru yak jahkrum lu ma ai n rai, shanhte na a matu kaja ai amu hpa mung n galaw ya lu ma ai,” ngu nna tsun ai.

⁶MADU e, nang hte bung ai wa langai mi mung n nga nga ai; nang gaw chyalai n-gun rawng ai wa rai nga ndai, na a amying nsang gaw galu kaba ai hte daru magam n-gun rawng nga ai.

⁷Masha amyu baw ni yawng a hkawhkam wa e, nang hpe kadai n shagrau sha-a na rai ta? Nang gaw shagrau sha-a na ging nga ndai. Masha amyu baw ni a hpaji rawng ai masha ni yawng hta mung, hkawhkam ni kadai hta rai tim, nang hte bung ai wa langai mi mung n nga nga ai.

⁸Shanhte yawng myit n su ai hte angawk angak re ai ni rai ma ai. Hpun hte tawk ai hpara sumla ni kaw na hpa baw a lam hpe shanhte sharin la lu nga ma ta?

⁹Shanhte a hpara sumla ni hpe Spain mung na gumhpraw, Uhpaza shara kaw na pru ai aja ni hte sup da nhtawm, dai ni yawng gaw sumla maka soi ai ni a lata amu ni rai nga ai; shanhte gaw kung kyang ai ni da sama da ai sumpan mut hte mang ai ni hpe bu hpun da ma ai.

¹⁰Rai ti mung, MADU e, nang gaw teng man ai Karai Kasang rai nga ndai, nang gaw ahkrung nga ai Karai Kasang hte htani htana hkawhkam rai nga ndai. Nang pawt sindawng ai shaloi, mungkan ga gaw gari kawa rai nga ai; masha amyu baw ni na a masin kahtet ai hpe n hkam lu ma ai.

¹¹(Sumsing lamu hte ginding aga hpe n hpan da ai hpara sumla ni gaw shamyit kau ai hkrum na mara ai. Shanhte gaw ginding aga ntsa, gara shara hta rai tim, loi hkring mi pyi nga lu na ra ai n rai, ngu nna nang shanhte hpe sa tsun lu na rai ndai.)

¹²Dai MADU gaw shi a daru magam n-gun hte ginding aga hpe hpan da nu ai; shi a hpaji byeng-ya hte mungkan ga hpe hpan da nna, sumsing lamu ni hpe kahpyan da nu ai.

¹³Shi a hkang da ai mungga hta, sumsing lamu a lahta tsang hta nga ai hka hpung ni wu kadu nga ai; shi gaw ginding aga htum ai shara kaw na sumwi ni hpe shamawng dat nga ai. Shi gaw myihprap gala shangun ai hte marang jahtu shangun nna nbung hpe mung shi a dum kaw na shapraw dat wu ai.

¹⁴Ndai zawn mu mada ai amu ni hta, amyu masha ni gaw myit n su ai hte nyan tang ai hku hkam sha ma ai; hpara sumla galaw ai ni gaw mak mat nga ma ai; hpa majaw nga yang, shanhte galaw ai karai ni gaw n teng n man ai hte nsoi nsa n rawng nga ai.

¹⁵Shanhte gaw kaman lila ni rai nna n kaw n law di hkrum ang nga ma ai; Dai MADU du sa nna shanhte hpe ari jaw ai shaloi, shanhte shamyit kau ai hkrum na mara ai.

¹⁶Yaku a Karai Kasang chyawm gaw shanhte hte n bung nga ai; shi gaw yawng mayawng hpe hpan da ai wa rai nna, Israela hpe shi a amyu masha majing shatai na matu lata la nu ai. Chyahtum Chyalai N-gun Rawng ai dai MADU gaw shi a mying nsang rai nga ai.

¹⁷Yerusalem amyu masha ni e, nanhte gaw wang da hkrum nga myit dai! Nang madu ai arung arai ni hpe shinggyin la u.

¹⁸Dai MADU gaw nang hpe ndai mungdan kaw nna shaden kau na ra ai; shi gaw nanhte hta na langai mi hpe pyi n ngam da ai aten du hkra, nang hpe agrawp mani kau na ra ai. Dai MADU tsun da nu ai.

¹⁹Yerusalem amyu masha ni gaw, “Anhte machyi hkrum ai hkala nba gaw kade wa sawng nga a hka! Anhte a nma ni tsi shamai lu na ra ai n rai. Ndai hkrum ai ari hpe lam lama ma hku nna anhte hkam lu na ga ai ngu, anhte myit nawn nga ga ai!

²⁰Anhte a sum ni hten run mat sai; shanhte hpe gyit da ai sumri ni di mat sai. Anhte a kashu kasha ni mat mat masai; anhte a sum ni hpe bai sharawt da na masha langai mi mung n nga sai; shanhte a nba grang ni hpe grang na matu kadai n nga nga sai,” nga nna tsun ma ai.

²¹Ngai gaw, “Anhte a ningbaw ni myit n su ma ai; shanhte gaw lam woi ningshawng tai ya na matu dai MADU kaw n hpyi ma ai. Dai re ai majaw shanhte hkrat sum mat ma ai, anhte a amyu masha ni shabra kau hkrum nga masai.

²²Madat mu! Shiga du sai! Dingdung maga de nga ai amyu baw ni hta garu kabrawng ai nsen kaba pru nga ai; dai luksuk gaw Yuda mare ni hpe zaibru jang shatai kau nhtawm dai shara hta gwi ma-a ni shanu nga na mara ai,” ngu nna htan we ai.

²³MADU e, anhte hta na kadai mung anhte a hpang jahtum na lam hpe n up nga ai gaw ngai chye nngai; anhte kadai mung anhte a asak hpe n hkang lu nga ai.

²⁴MADU e, na a amyu masha ni hpe shading sharai u, rai ti mung, anhte a ntsa e laja lana sharin ai hku n rai u ga; nang pawt sindawng ai shaloi anhte hpe ari hkum jaw mi; dai gaw anhte a hpang jahtum tai na ra ai.

²⁵Nang hpe n nawku ai hte nang hpe ningdang kau ai masha amyu baw ni a ntsa e, na a masin kahtet ai ru jaw bun u. Shanhte gaw na a amyu masha ni hpe sat kau manu ai; shanhte gaw anhte hpe atsai awai shamyit kau manu ai hte anhte a mungdan hpe jahten sharun kau da manu ai.