Read Jinghpaw Common Language Bible 2009 YEREMIA 11 Bible Online

YEREMIA 11 - Jinghpaw Common Language Bible 2009 bible

YEREMIA 11

¹Dai MADU gaw ngai hpe,

²“Ga shaka mungga ni hpe madat u. Yuda hte Yerusalem amyu masha ni hpe tsun u.

³Dai MADU Israela a Karai Kasang ngai gaw ndai ga shaka mungga ni hpe n hkan ai masha shagu a ntsa e dagam dala tawn da ni ai.

⁴Ndai gaw shanhte a matu agrung nga ai wan htung zawn rai nga ai Egutu mung kaw nna shanhte hpe ngai shapraw wa ai shaloi, shanhte a kaji kawa ni hte ngai galaw tawn ai ga shaka rai nga ai. Ngai gaw shanhte hpe nye a ga madat nna ngai hkang da sai lam magup hpe hkan galaw na matu tsun da ni ai. Shanhte nye a ga madat mara ai rai yang, shanhte gaw nye a amyu masha ni tai nna, ngai gaw shanhte a Karai Kasang tai na lam mung, ngai shanhte hpe tsun ni ai.

⁵Shanhte ya shanu nga sai dai ngamu ngamai nna ningru ningja ai mungdan ngu ai shanhte hpe ngai jaw na ngu nna shanhte a kaji kawa ni hpe ngai dagam da ai ga sadi hpe ngai shagrin na we ai,” ngu nna tsun ni ai. Ngai gaw, “Rai sa, MADU e,” ngu nna tsun nngai.

⁶Dai hpang, dai MADU gaw ngai hpe, “Yuda mare ni hte Yerusalem nmaw lam ni de sa su. Dai shara hkan e nye a mungga hkaw tsun ai hte amyu masha ni ga shaka mungga madat na hte dai ga ni hpe madat mara hkan sa na matu tsun u.

⁷Ngai gaw shanhte a kaji kawa ni hpe Egutu mung kaw nna woi wa ai shaloi, nye a ga hpe madat mara na matu ngai shanhte hpe dagam ai hte sadi jaw ni ai, ngai gaw dai ni du hkra ndai amyu masha ni hpe dingyang sadi jaw nga nngai.

⁸Rai ti mung shanhte gaw n madat ai hte n hkan n sa ma ai. Shing rai hkan galaw na malai, masha shagu gaw galoi mung du ja ai hte n hkru ai ni zawn matut galaw nga ma ai. Ngai gaw shanhte hpe ga shaka shatup na matu hkang da ni ai, rai ti mung, shanhte ningdang kau ma ai. Dai re ai majaw, ngai gaw shanhte hpe dai ga shaka hta ka da sai hte maren ari ahpri ni yawng shadu mani ai,” ngu nna tsun ni ai.

⁹Dai hpang, dai MADU gaw ngai hpe, “Yuda hte Yerusalem amyu masha ni gaw ngai hpe gumlau na maw mawn nga ma ai.

¹⁰Shanhte gaw ngai tsun ai ga hkan galaw na matu ningdang kau nga ai shanhte a kaji kawa ni a yubak lam de nhtang mat wa masai; shanhte gaw kaga karai ni hpe nawku mat masai. Israela hte Yuda yan gaw shanhte a kaji kawa ni hte ngai galaw tawn da sai ga shaka hpe jahten kau manu ai.

¹¹Ya chyawm gaw, dai MADU ngai nan shanhte kaw hten byak lam du shangun ai hte sadi jaw nngai, shanhte hprawng lawt lu na mara ai n rai. Shanhte gaw karum la na matu ngai kaw hpyi jahtau ma ai shaloi, ngai shanhte a nsen hpe madat ya na nngai n rai.

¹²Dai hpang, Yuda hte Yerusalem amyu masha ni gaw shanhte shagu hkungga nawng jau ya nga ai karai ni kaw sa nhtawm karum la na matu hpyi jahtau wa na mara ai. Rai ti mung dai karai ni gaw ndai jahten shabyak lam du ai shaloi, shanhte hpe hkye hkrang la lu na mara ai n rai.

¹³Yuda amyu masha ni gaw shanhte a mare ni law nga ai made karai ni mung law nga ma ai; Yerusalem mare masha ni mung mare kata hta nmaw lam ni law nga ai zawn matsat shabat re ai Bala hpara hpe shagu hkungga nawng jau ya na matu tawn hkungri ni hpe gaw sharawt da nga manu ai.

¹⁴Yeremia e, ndai amyu masha ni a malai, ngai kaw akyu hkum hpyi et; ngai kaw hkum hpyi lajin nga et. Shanhte ru yak hkrum ai shaloi karum la na matu ngai hpe shaga ti mung, shanhte a ga hpe ngai n madat ya na nngai,” ngu nna tsun wu ai.

¹⁵Dai MADU gaw, “Ngai tsaw ra ai ndai amyu masha ni gaw n hkru ai amu ni hpe galaw nga ma ai. Shanhte gaw nye a Nawku Htingnu kata hta nga lu na gaw kaning re ai ahkaw ahkang lu nga ma ta? Shanhte gaw ga sadi ni hpe tawn da ai hte yam nga shagu hkungga nawng jau ai hku ru yak tsin-yam tsindam hpe tau makawp maga lu na re ngu, shanhte myit nawn nga ma ni? Shing rai yang, shanhte kabu gara lu na ma ni?

¹⁶Lang mi, ngai gaw shanhte hpe tsawm htap ja kat ai asi ni hte hpring nna tsit lali ai tsanlun hpun langai mi ngu nna shamying da ti mung, ya chyawm gaw mu zawn wu kadu ai nsen hte ngai dai hpun lap ni hpe wan jahkru kau nna de a lakung lakying ni hpe agrawp daw kau we ai.

¹⁷“Chyahtum Chyalai N-gun hte hpring ai dai MADU ngai nan, Israela hte Yuda hpe hkai da ni ai; rai ti mung, ya gaw, ngai shanhte hpe ru yak tsin-yam tsindam hte jahkrit na nngai. Shanhte shut hpyit ai amu galaw ma ai majaw shanhte gaw shanhte hkum nan a matu ndai amu shapraw manu ai; shanhte gaw Bala hpara a man e, shagu hkungga nawng jau ai lai hte ngai hpe pawt sindawng shangun da mi ai,” ngu nna tsun wu ai.

¹⁸Dai MADU gaw nye a gumlau hpyen ni ngai hpe gyam nga ma ai lam ngai hpe shiga shana ya nga ai.

¹⁹Ngai mahtang, sat na matu dun shapraw sa wa ai sumnung ai sagu kasha zawn rai nga nngai; shanhte gaw n hkru ai amu ni galaw maw mawn nhtawm ngai hpe gumle gumlau galaw kau na, dai hku lajang nga ma ai hpe ngai n chye nngai. Shanhte gaw, “Anhte gaw ndai hpun asi ja kat nga ai aten hta kran daw kau ga; kadai e mung shi hpe galoi mung n dum lu manu ga, anhte shi hpe sat kau ga,” ngu nna tsun ma ai.

²⁰Dai hpang, ngai gaw, “Chyahtum Chyalai N-gun Rawng ai MADU e, nang gaw teng man ai tara agyi wa rai nga ndai; nang gaw amyu masha ni a myit mang lam ni hte hkam sha lam ni hpe chyam dinglik yu nga ndai. Ngai gaw nye a amu na a lata hta tawn da ni ai; ndai amyu masha ni hpe nang matai dawp ai hpe ngai sin yu nga n-ga,” ngu nna hpyi nem we ai.

²¹Anahtot masha ni gaw ngai hpe sat kau mayu nga ma ai; ngai rai nna dai MADU a mungga hpe matut hkaw tsun ai rai yang, shanhte ngai hpe sat kau na ma ai lam ngai hpe tsun ma ai.

²²Dai rai nna, Chyahtum Chyalai N-gun Rawng ai dai MADU gaw, “Ngai shanhte hpe ari jaw na we ai! Shanhte a shabrang ni gaw majan pa hta sat kau hkrum na mara ai; shanhte a shayi shadang sha ni mung kawsi hpang gara ai hte si mat na mara ai.

²³Ngai gaw Anahtot masha ni a ntsa de tsin-yam tsindam shapraw dat na aten masat da ya ni ai; dai aten du ai shaloi, shanhte hta na langai mi mung ngam nga na ra ai n rai,” ngu nna tsun wu ai.