Read Jinghpaw Common Language Bible 2009 YEREMIA 12 Bible Online

YEREMIA 12 - Jinghpaw Common Language Bible 2009 bible

YEREMIA 12

¹“MADU e, ngai nang hte amu dangrang hkat yang; nang ding hpring nga ndai hpe nang sakse madun nga ndai. Timung, ngai gaw nang hpe teng man rap ra ai tara hte seng nna san na nngai. N hkru ai masha ni gaw hpa majaw grai ngamu ngamai nga ma ta? Myit magaw ai masha ni hpa majaw awng dang nga ma ta?

²Nang shanhte hpe hkai da ai hte shanhte ru jung nga ma ai; shanhte tu kaba wa nna asi si nga ai. Shanhte gaw na a mai kaja lam hpe tut nawng tsun ma ai, timung, shanhte gaw nang hpe teng teng hpa zawn n nawn nga ma ai.

³Rai ti mung, MADU e, nang gaw ngai hpe chye ndai; Ngai hpa galaw ai hte ngai nang hpe kade daram tsaw ra nga ai hpe nang mu ndai. Ndai n hkru ai amyu masha ni hpe sat na sagu ni hpe zawn dun garawt mat wa u; shanhte hpe sat kau na aten ladaw da ai du hkra shanhte hpe sin da u.

⁴Anhte a lamu ga gaw kaden du hkra hkun hkraw ai hte yi sun shagu hta tu ai tsingdu ni nyip mat na rai ta? Amyu masha ni gaw, ‘Anhte galaw nga ai amu hpe Karai Kasang n mu nga ai,’ nga nna tsun ai anhte a n hkru ai amyu masha ni a majaw, ashu ashan ni hte ntsa malen u ni si mat nga ai,’” ngu nna tsun ai.

⁵Dai MADU gaw, “Yeremia e, nang gaw masha ni hte gat shingjawng nna hki ba ai rai yang, kaning rai gumra ni hte gat shingjawng lu na rai nga n ta? Prang yang ga hta pyi nang n tsap lu ai rai yang, Yawdan hka kau na nam mali hta nang gara hku hpareng lajang lu na rai nga n ta?

⁶Na a kahpu kanau ni hte na a dinghku masha ni pyi nang hpe gumle gumlau kau masai; shanhte gaw nang hpe gasat ninghkap ai hta lawm mat manu ai. shanhte gaw jinghku ga she shaga ti mung, shanhte hpe hkum kam et,” ngu nna tsun wu ai.

⁷Dai MADU gaw, “Ngai gaw Israela hpe kau da ni ai; Ngai gaw lata la hkrum sai nye a amyu baw hpe n hkap la ni ai. Ngai tsaw ra ai amyu masha ni hpe shanhte a gumlau hpyen ni a lata de ap kau se ai.

⁸Lata la hkrum sai nye a amyu masha ni gaw ngai hpe myi man kayin kau masai; nam maling na hkanghkyi langai zawn shanhte ngai hpe shabam manu ai, dai rai nna, ngai shanhte hpe n dawng nngai.

⁹Lata la hkrum sai nye a amyu masha ni gaw man maga shagu kaw nna langji ni htim achye hkrum ai ntsa malen u zawn rai ma ai. Lusha poi hta sa du shang lawm na matu matse labye dusat ni hpe shaga dat mu!

¹⁰Law la ai maigan up hkang du salang ni gaw nye a sabyi sun hpe jahten kau manu ai; shanhte gaw nye a sun ni hpe kabye anut kau ya mi ai; shanhte gaw tsawm la ai nye a mungdan hpe zaibru jang shatai kau ya mani ai.

¹¹Shanhte gaw dai mungdan hpe katsi katsang shara shatai kau manu ai; dai gaw nye a man e shingran katsi nga ai. Mungdan ting gaw zaibru jang tai mat nna kadai mung n yu lajang nga ai.

¹²Nam mali hkan na tsaw ai kawng ni yawng hpe kashun kashe du daw sai hkaw amu galaw na matu masha ni du nga masai. Ngai gaw mungdan ting hpe jahten shabyak kau na matu majan baw dat ni ai; kadai mung ngwi pyaw sim sa ai hte nga lu na ra ai n rai.

¹³Nye a amyu masha ni gaw hkaulan mam hkai ti mung, tsing sha dan la lu na mara ai; shanhte gaw bungli galaw shaja ma ai, rai ti mung bungli shabrai a matu kaman lila hkam la nga ma ai. Nye a masin kahtet ai a majaw, nsi naisi ni sum mat nga manu ai,” nga nna tsun ai.

¹⁴Dai MADU gaw, “Nye a amyu masha Israela hpe ngai jaw tawn ai lamu ga hpe jahten sharun kau ya ai Israela a htingbu ni hte seng nna tsun dan na lam lama mi ngai lu nngai. Ngai gaw hkai bawng hpe gang baw kau ai zawn n hkru ai amyu masha ni hpe shanhte a mungdan ni kaw na baw kau na we ai; ngai gaw Yuda mung hpe shanhte a lata kaw nna hkye mawai la na nngai.

¹⁵Rai ti mung, shanhte hpe baw kau ngut ai hpang, ngai gaw shanhte hpe matsan dum la na nngai; ngai gaw amyu langai hte langai hpe tinang a lamu ga hte tinang a mungdan de woi nhtang wa na nngai.

¹⁶Shanhte gaw Bala hpara a mying gang nna dagam na matu nye a amyu masha ni hpe lang mi sharin ya mu ai hte maren, shanhte a myit masin mahkra hte nye a amyu masha ni a nawku htung hpe hkap la nna, ‘Dai MADU hkrung nga ai,’ nga nna dagam ai rai yang, shanhte gaw nye a amyu masha ni tai wa lu nhtawm ngamu ngamai wa na mara ai.

¹⁷Rai ti mung, kaning re ai masha amyu baw mi rai rai, ga shaga n madat ai rai yang, ngai gaw dai amyu baw hpe tsep kawp baw kau ai hte shamyit kau na nngai. Dai MADU ngai nan tsun ni ai,” nga nna tsun ai.