Read Jinghpaw Common Language Bible 2009 YEREMIA 13 Bible Online

YEREMIA 13 - Jinghpaw Common Language Bible 2009 bible

YEREMIA 13

¹Dai MADU gaw ngai hpe lachyit shingkyit nkau mi sa mari bu na matu tsun ni ai; rai ti mung, shi gaw dai hpe hka hta n tsing da na matu ngai hpe tsun ai.

²Dai rai nna, ngai gaw dai ni hpe mari la nna kyit nngai.

³Dai hpang, dai MADU gaw ngai hpe lang mi bai,

⁴“Uhprat hka nu de rawt sa nna lungpu hku langai mi hta dai shingkyit ni hpe makoi da su,” nga nna tsun ai.

⁵Dai rai nna, ngai rawt sa wa let Uhprat hka nu makau e dai ni hpe makoi da nngai.

⁶Tawng marang mi na mat ai hpang, dai MADU gaw ngai hpe Uhprat hka nu de bai nhtang sa nna lachyit shingkyit ni hpe sa shaw la na matu hkang dat wu ai.

⁷Dai rai nna, ngai bai nhtang sa wa ai hte dai ni hpe ngai makoi da ai shara hta mu tam la ai shaloi, kachyi mi mung n kaja mat sai hte tsam mat nga sai hpe ngai mu nngai.

⁸Dai hpang, dai MADU gaw ngai hpe bai ga tsun wu ai. Shi gaw,

⁹“Ndai gaw Yuda mung na gumrawng gumtawng ai hte Yerusalem na grau kaba ai gumrawng gumtawng hpe mung ngai kaning rai jahten sharun kau na lam rai nga ai.

¹⁰Ndai n hkru ai masha ni gaw nye a ga hpe hkan sa madat mara na matu n hkap la ma ai. Shanhte gaw shawng de na zawn du ja ai hte n hkru nga ma ai rai nna kaga hpara ni hpe nawku ai hte daw jau ma ai. Shanhte gaw loi mi pyi n kaja mat sai hte tsam mat sai ndai shingkyit ni zawn tai mat na mara ai.

¹¹Shingkyit ni gaw nshang grup grup hpe ting ting hkang hkang kyit tawn ai zawn, Israela hte Yuda amyu masha ni yawng ngai hta ngang ngang noi nga na matu ngai yaw shada da nngai. Shanhte gaw nye a amyu masha ni tai wa nna, nye a mying shingteng hpe shagrau shatsaw ai hte shakawn kungdawn na matu dai lam lajang da ni ai; rai ti mung shanhte gaw nye a ga hpe n madat hkraw ma ai,” ngu nna tsun wu ai.

¹²Dai MADU Karai Kasang gaw ngai hpe, “Yeremia e, sabyi namtau shagu hta sabyi ntsin hte hpring na ra ai ngu nna Israela a amyu masha ni hpe tsun u. Shanhte gaw sabyi namtau shagu hta sabyi ntsin hte hpring na ra ai gaw, anhte chye ga ai nga nna shanhte htan na mara ai.

¹³Dai hpang, shanhte hpe tsun u, Dai MADU ngai nan Dawi a aru arat ni rai nga ai hkawhkam ni, hkinjawng ni, myihtoi ni hte Yerusalem mare masha ni yawng sabyi ntsin nang mat ai aten du hkra, ndai mungdan hta nga ai amyu masha ni hpe sabyi ntsin hte jahpring da na we ai.

¹⁴Dai hpang, ngai gaw namtau shada ahkawk hkat ai zawn kaji kaba n nga, shanhte hpe agrawp daw kau na nngai. Lahpawt dum ai myit, matsan dum ai myit, n-gaw nwai ai myit hpa mung shanhte hpe sat shamyit kau na kaw na ngai hpe hkum da lu na ra ai n rai,” nga nna tsun ai.

¹⁵Israela amyu masha ni e, dai MADU ga tsun nu ai! Shagrit shanem ai hte shi a ga hpe madat mu.

¹⁶Shi gaw nsin hpe garai n sin shangun ai hte bum ni a ntsa e nang garai n ahtu kataw nna, shi gaw htat ai nsin de garai n kayin kau ai hte nhtoi hpe nang naw myit mada nga yang, dai MADU na a Karai Kasang hpe shagrau sha-a nga u.

¹⁷Dai ga ni hpe nang n madat ai rai yang, na a gumrawng gumtawng ai myit a majaw, ngai gaw n dan n leng ai shara hta hkrap na nngai; Dai MADU a amyu masha ni gaw bawng dung hkrum ai ni zawn rim hkrum nga ma ai majaw, ngai gaw ahkup ahka nga hkra hkrap ai hte nye a myi prwi lwi na ra ai.

¹⁸Dai MADU gaw ngai hpe, “Shanhte a htoi kabrim tsawm htap ai janmau ni di hkrat mat mu ai majaw, shanhte a magam tingnyang ni kaw na yu na matu, hkawhkam wa hte shi a kanu hpe tsun u.

¹⁹Yuda mung a dingda daw de na kahtawng ni gaw wang da hkrum nga ma ai majaw, kadai mung shanhte hpang de lai bang lu ai n rai. Yuda mung masha ni yawng hte gaw bawng dung hkrum mat nga masai,” ngu nna tsun ai.

²⁰Yerusalem e, yu u! Na a gumlau hpyen ni gaw dingdung maga de nna sa wa na mara ai! Nang hpe kam hpa ai amyu masha ni hte nang grai gumrawng lu ai na a amyu masha ni kanang rai nga ma ta?

²¹Na a jinghku jingyu ni nang hpe dang kau ai hte nang hpe up ai shaloi, nang kaning ngu tsun na nu ni? Nang gaw shinggyim machyi ai num zawn nchyi nmu hkrum na rin dai.

²²Ndai lam ni yawng nang hta hpa majaw byin a ta? Hpa majaw na a hpun palawng ni gang je kau hkrum ai hte roi rip hkrum nga ndai kun?, nga nna nang san ai rai yang, dai lam gaw grai hkrit tsang ra ai na a yubak a majaw rai nga ai.

²³Ehtiopi masha gaw shi a hkum hpyi hpe, rawnggawk gaw shi a ateng apang re ai hpe galai kau lu nga a ni? Shanhte galai kau lu ai rai yang, nang hpa n galaw ra nga ndai rai ti mung, n hkru ai amu galaw lu ai wa gaw jaw ai amu galaw na matu sharin la lu nga ai.

²⁴Dai MADU gaw zaibru jang na nbung hte shapoi kau ai numhkaw zawn nang hpe ahpawt shabra kau na ra ai.

²⁵Ndai gaw na a hpang jahtum na lam tai na ra ai, nga nna shi tsun nu ai. Nang gaw shi hpe malap kau nhtawm n teng n man ai karai ni hta manoi nga nit dai majaw, ndai lam nang hta shabyin dat na matu shi daw dan nu ai.

²⁶Dai MADU gaw shi nan na a hpun palawng hpe raw kau ya nna kaya kahpa hpe shadan shapra da na ra ai.

²⁷Shi gaw nang galaw ai shi n dawng ai amu ni hpe mu nu ai. Htingbu wa a madu jan hpe hkan asoi yu nna ngang katu ai lasha wa zawn mung, gumra u yi hpang hkan ai lau gung zawn mung, kawng ni a ntsa hkan hte pa layang hkan e gap da ai tara maigan hpara ni hpang de nang hkan nga ai hpe shi mu nu ai. Yerusalem amyu masha ni e, nang gaw dingnye hkrum nga ndai! Galoi mi she nang san pra wa na rai nga n ta?