Read Jinghpaw Common Language Bible 2009 YEREMIA 15 Bible Online

YEREMIA 15 - Jinghpaw Common Language Bible 2009 bible

YEREMIA 15

¹Dai hpang dai MADU gaw ngai hpe, “Mawshe hte Samuela yan gaw ndai shara hta tsap nga nna, ngai hpe hpyi lajin nga ma yang pyi ngai gaw ndai amyu masha ni a ntsa e matsan dum ai myit hpa mung madun dan na n rai. Shanhte hpe shaden kau mu; shanhte hpe nye a man kaw nna shapraw kau dat mu.

²Shanhte kade sa wa na rai ma ta?, nga nna nang hpe shanhte san ma ai shaloi, ngai tsun ni ai ga shanhte hpe tsun u: Nkau mi gaw ana ahkya hte si na matu dingnye hkrum nga ma ai- dai gaw shanhte sa wa na lam rai nga ai! Nkau mi gaw majan hta si na matu dingnye hkrum nga ai- dai gaw shanhte sa wa na lam rai nga ai! Nkau mi gaw kawsi hpang gara ai hte si na matu dingnye hkrum nga ai- dai gaw shanhte sa wa na lam rai nga ai! Kaga ni gaw bawng masha ni zawn woi la na dingnye hkrum nga ai- dai gaw shanhte sa wa na lam rai nga ai!

³Dai MADU ngai gaw shanhte hta hkrit hpa amu mali byin wa na lam hpe daw dan da ni ai: shanhte gaw majan hta sat kau ai hkrum na mara ai; shanhte a moi mang ni gaw gwi ni e garawt mat wa hkrum na mara ai; ntsa malen u ni gaw dai ni hpe sha na mara ai, matse labye dusat ni gaw ngam da ai mang ni hpe araw sha na mara ai.

⁴Hezekia a kasha Manashe Yuda hkawhkam tai nga yang, Yerusalem hta shi galaw sai amu a majaw, ngai gaw mungkan ga na masha ni yawng hta shanhte hpe hkrit hpa kumla shatai kau na we ai.”

⁵Dai MADU gaw, “Yerusalem amyu masha ni e, nang hpe kadai matsan dum nna, na a ntsa e kadai wa yawn na rai ta? Nang hkam kaja nga n ni?, nga nna kadai wa shayan san na rai ta?

⁶Nanhte amyu masha ni gaw ngai hpe kau da manit dai; nanhte ngai hpe shingdu kayin kau manit dai. Dai rai nna nye a masin kahtet ai hpe shakawp na hki ba mat ni ai majaw, ngai gaw lata ladawn ai hte nanhte hpe agrawp mani kau nngai.

⁷Ngai gaw nang hpe mungdan na mare shagu hta nbung e shapoi hkrum ai yihku zawn kabai kau nngai. Nye a amyu masha ni e, ngai nang hpe jahten sharun kau nngai, nang gaw na a n hkru ai lam ni hpe n jahkring da nga ndai majaw, na a kashu kasha ni hpe ngai sat kau ni ai.

⁸Na a mungdan na gaida ni gaw panglai makau na zaibru tum ni hta grau law nga ai. Ngai gaw na a shabrang ma ni hpe shanhte a wa-ngan aten ni hta sat kau ai hte shanhte a kanu ni hpe nni nkri jahkrum nngai. Ngai gaw shanhte hpe makyin madut hte hkrit kajawng hpa hte akajawng sha kayat ni ai.

⁹Ma sanit shamat kau ai kanu gaw gawng kya mat nu ai, nsa sa dawn nga ai. Shi a nhtoi gaw nsin tai mat nna, shi gaw myi man sum ai hte myit machyi nga ai. nanhte hta na naw hkrung nga ai ni hpe mung ngai gaw nanhte a gumlau hpyen ni hpe sat kau shangun na we ai. Dai MADU ngai nan tsun ni ai,” ngu nna tsun ai.

¹⁰Ngai gaw myit n pyaw ai masha she rai nga a hka! Nye a nu gaw hpa majaw ngai hpe ndai mungkan ga de sa shaprat da ai kun? Ngai gaw ndai lamu ga hta masha hkum shagu hte ga li ga law ai hte ndang kalang hkat ra nga nngai. Ngai gaw gumhpraw kade mi sha rai tim hkoi ya ai n rai, hkoi la ai mung n rai; rai ti mung, yawng mayawng gaw ngai hpe dagam let matsa ma ai.

¹¹MADU e, shanhte tsin-yam tsindam hte nni nkri hkrum nga ma ai shaloi, ngai nang hpe atsawm sha n daw jau ai hte nye a gumlau hpyen ni a malai ngai nang hpe n hpyi lajin ai rai yang, shanhte a dagam matsa ai ga ni yawng teng sha byin wa nu ga.

¹²(Kadai mung hpri hpe n daw lu nga ai, grau nna dingdung maga de na magri mang hte kayau da ai hpri hpe n lu daw nga ai.)

¹³Dai MADU gaw ngai hpe, “Mungdan ting hta shanhte shut kau ai yubak ni a majaw, shanhte hpe ari jaw na matu nye a amyu masha ni a sut gan arung arai ni hpe magawn mat wa na gumlau hpyen ni hpe ngai dat dat na nngai.

¹⁴Nye a myit kahtet ai gaw wan zawn rai nna dai gaw htani htana agrung nga na ra ai majaw, shanhte hpa mung n chye ai mungdan hta shanhte a gumlau hpyen ni a man e daw jau shangun na we ai,” ngu nna tsun ni ai.

¹⁵Dai hpang, ngai gaw, “MADU e, nang chye nga ndai; ngai hpe dum nga e law. Ngai hpe zingri zingrat ai ni hpe ngai matai dawp lu n-ga law. Shanhte ngai hpe sat ai hta awng dang ai hpe grai wa hkum yu sharang nga et. Na a majaw ngai n kaw n law hkrum nga nngai hpe dum nga u.

¹⁶Nang ngai hpe tsun shaga ai ga hkum shagu hte hpe ngai madat se ai. Chyahtum Chyalai N-gun Rawng ai MADU Karai Kasang e, nang ngai hpe madu da nga ndai majaw na a mungga ni nye a myit kraw lawang hta kabu gara ai hte awng sharawng ai hte jahpring ya nit dai.

¹⁷Ngai gaw nye a aten hpe kaga masha ni hte mani sengbreng hkawm nna aten shama kau ai n rai. Na a hkang da ai ga ni hpe madat mara na matu ngai hkrai sha nga nga nna masin kahtet ai hte hpring nga nngai.

¹⁸Ngai gaw hpa majaw nni nkri tut nawng hkrum sha nga nngai kun? Nye a nma ni hpa majaw n tsi lu nga a ni? Shanhte hpa majaw n shamai ya ma ni? Ginhtawng ta hta hkyet mat ai hka shi zawn ngai hpe myit shadaw jahten na matu, nang yaw shada n ni?,” ngu nna tsun ni ai.

¹⁹Dai lam a majaw dai MADU gaw, “Nang nhtang wa ai rai yang, ngai nang hpe woi nhtang wa na nngai, nang gaw nye a shangun ma bai tai lu na rai ndai. Lachyum n pru ai ga laban shaga na malai, manu dan ai mungga hpe nang hkaw tsun ai rai yang, nang gaw nye a myihtoi bai tai lu na rai ndai. Amyu masha ni mung nang kaw nhtang wa na mara ai, nang gaw shanhte kaw sa ra na ndai n rai.

²⁰Ngai gaw nang hpe shanhte hte seng nga dingsa, ngang ai magri mang bunghku zawn shatai na we ai. Shanhte gaw nang hpe gasat na mara ai, rai ti mung shanhte gaw nang hpe dang na mara ai n rai. Nang hpe makawp maga la na hte shim nga lu na matu, ngai nang hte rau arai nga na nngai.

²¹N hkru ai hte kashun kashe du daw sai hkaw amu galaw ai masha ni a lata kaw na ngai nang hpe mawai la na nngai. Dai MADU ngai nan tsun ni ai,” nga nna tsun htang wu ai.